ພັກກອມມູນິດຫວຽດນາມ ແລະພັກແຮງງານເມັກຊິກໂກ ເພີ່ມທະວີການແລກປ່ຽນ
ກປ.ອອນໄລ - ຕອນບ່າຍວັນທີ 29 ສິງຫາ, ຢູ່ສຳນັກງານສູນກາງພັກ, ສະຫາຍ ຟານດິ່ງຈາກ, ກຳມະການກົມການເມືອງ, ເລຂາທິການສູນກາງພັກ, ຫົວໜ້າຄະນະວຽກງານການເມືອງພາຍໃນສູນກາງ ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງພັກແຮງງານເມັກຊິກໂກ ນຳໂດຍສະຫາຍ Pedro Vazquez, ກຳມະການກົມການເມືອງ, ປະທານກຳມາທິການການພົວພັນຕ່າງປະເທດຂອງສະພາຕໍ່າເມັກຊິກໂກ ທີ່ພວມຢ້ຽມຢາມຫວຽດນາມ ແລະເຂົ້າຮ່ວມພິທີສະເຫຼີມສະຫຼອງ 80 ປີແຫ່ງການປະຕິວັດເດືອນສິງຫາ ສຳເລັດຜົນ ແລະວັນຊາດ ສສ ຫວຽດນາມ.
ສະຫາຍ ຟານດິ່ງຈາກ ຂອບໃຈຢ່າງຈິງໃຈ ແລະຕີລາຄາສູງພັກແຮງງານເມັກຊິກໂກ ທີ່ສົ່ງຄະນະຜູ້ແທນຂັ້ນສູງມາຢ້ຽມຢາມ ແລະເຂົ້າຮ່ວມພິທີສະເຫຼີມສະຫຼອງສຳຄັນຍິ່ງຂອງຫວຽດນາມ; ທ່ານຖືວ່າ, ນີ້ແມ່ນພະຍານຫຼັກຖານທີ່ມີຊີວິດຊີວາສະແດງໃຫ້ເຫັນສາຍພົວພັນມິດຕະພາບ, ການຮ່ວມມືທີ່ດີງາມ ແລະຄວາມໄວ້ເນື້ອເຊື່ອໃຈດ້ານການເມືອງສູງລະຫວ່າງສອງພັກ, ປະກອບສ່ວນເຮັດໃຫ້ການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືຮອບດ້ານຫວຽດນາມ - ເມັກຊິກໂກ ເລິກເຊິ່ງກວ່າອີກ.
    |
 |
|
ສະຫາຍ ຟານດິ່ງຈາກ, ກຳມະການກົມການເມືອງ, ເລຂາທິການສູນກາງພັກ, ຫົວໜ້າຄະນະວຽກງານການເມືອງພາຍໃນສູນກາງ ກ່າວຄໍາເຫັນທີ່ການຕ້ອນຮັບ. ພາບ: ສໍານັກຂ່າວສານຫວຽດນາມ |
ສະຫາຍ Vazquez ໄດ້ສະແດງຄວາມເປັນກຽດທີ່ໄດ້ຕາງໜ້າພັກແຮງງານເມັກຊິກໂກ ເຂົ້າຮ່ວມພິທີສະເຫຼີມສະຫຼອງສໍາຄັນພິເສດຂອງຫວຽດນາມ. ທ່ານສະແດງຄວາມຊົມເຊີຍຕໍ່ບັນດາຜົນງານອັນໃຫຍ່ຫຼວງຂອງຫວຽດນາມ ໃນພາລະກິດປ່ຽນແປງໃໝ່, ສ້າງສາ ແລະປົກປັກຮັກສາປະເທດ.
ທ່ານ ຟານດິ່ງຈາກ ເນັ້ນໜັກວ່າ ສອງພັກຄວນເພີ່ມທະວີການແລກປ່ຽນທິດສະດີ ແລະປະສົບການຕົວຈິງ; ສົ່ງເສີມ, ເຊື່ອມຕໍ່ບັນດາວິສາຫະກິດຂອງສອງປະເທດເປີດກວ້າງການຮ່ວມມື; ສືບຕໍ່ຮ່ວມມື ແລະສະໜັບສະໜູນເຊິ່ງກັນ ແລະກັນຢູ່ບັນດາອົງການຈັດຕັ້ງສາກົນ, ພິເສດແມ່ນຢູ່ສະຫະປະຊາຊາດ ແລະບັນດາເວທີປາໄສຫຼາຍຝ່າຍ ເພື່ອປົກປັກຮັກສາຜົນປະໂຫຍດອັນຊອບທຳຂອງສອງປະເທດ; ສະເໜີໃຫ້ສອງຝ່າຍສົມທົບກັນຢ່າງແໜ້ນແຟ້ນໃນການຜັນຂະຫຍາຍຂໍ້ຕົກລົງການຮ່ວມມື, ສຸມໃສ່ກວດກາຄືນ, ສະເໜີບັນດາຮູບການ, ມາດຕະການ ແລະຂົງເຂດຮ່ວມມືໃໝ່; ພ້ອມກັນນັ້ນສືບຕໍ່ເສີມຂະຫຍາຍບົດບາດຂອງສອງພັກໃນການຊຸກຍູ້ການແລກປ່ຽນຄະນະຜູ້ແທນຂັ້ນສູງ ແລະການຮ່ວມມືໃນຂົງເຂດເສດຖະກິດ, ການຄ້າ ແລະການລົງທຶນລະຫວ່າງສອງປະເທດ.
ໂດຍ: ດັ້ງເກື່ອງ