ປະທານສະພາແຫ່ງຊາດ ເຈິ່ນແທັງເໝິນ ຕ້ອນຮັບເລຂາທິການໃຫຍ່ AIPA
ກປ.ອອນໄລ - ຕອນບ່າຍວັນທີ 25 ສິງຫາ, ຢູ່ຫໍສະພາແຫ່ງຊາດ, ທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ໄດ້ໃຫ້ການຕ້ອນຮັບທ່ານນາງ Siti Rozaimeriyanty Dato Haji Abdul Rahman, ເລຂາທິການໃຫຍ່ສະມັດຊາໃຫຍ່ລັດຖະສະພາລະຫວ່າງຊາດອາຊຽນ (AIPA) ເນື່ອງໃນໂອກາດເຂົ້າຮ່ວມການເຄື່ອນໄຫວ AIPA Roadshow ຢູ່ຫວຽດນາມ ໂດຍຄະນະກຳມາທິການປ້ອງກັນຊາດ-ປ້ອງກັນຄວາມສະຫງົບ ແລະການຕ່າງປະເທດ, ຄະນະປະຈຳການກຸ່ມສະມາຊິກສະພາແຫ່ງຊາດໜຸ່ມຫວຽດນາມ ຊຸດທີ XV ສົມທົບກັບຄະນະເລຂາ AIPA ຈັດຕັ້ງ.
    |
 |
|
ທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ຕ້ອນຮັບທ່ານນາງ Siti Rozaimeriyanty Dato Haji Abdul Rahman ເລຂາທິການໃຫຍ່ AIPA. ພາບ: ຟ້າມທັ໊ງ |
ທີ່ການຕ້ອນຮັບ, ສອງຝ່າຍໄດ້ແລກປ່ຽນກ່ຽວກັບສະພາບການພາກພື້ນ ແລະກໍານົດທິດການເຄື່ອນໄຫວຂອງ AIPA ໃນໄລຍະຈະມາເຖິງ. ທ່ານປະທານສະພາແຫ່ງຊາດ ເຈິ່ນແທັງເໝິນ ຢືນຢັນວ່າ ປະຊາຄົມອາຊຽນສາມັກຄີຈະນຳພາການພັດທະນາຂອງແຕ່ລະປະເທດ ແລະຂອງທັງກຸ່ມ. ສະນັ້ນ, ບັນດາລັດຖະສະພາສະມາຊິກຄວນສືບຕໍ່ເພີ່ມທະວີການແລກປ່ຽນ, ແບ່ງປັນຂໍ້ມູນຂ່າວສານ, ບົດຮຽນດ້ານນິຕິບັນຍັດ, ຕິດຕາມກວດກາ ແລະຕັດສິນໃຈບັນຫາສຳຄັນຂອງແຕ່ລະປະເທດ. ບັນດາສະມາຊິກລັດຖະສະພາ, ລັດຖະສະພາສະມາຊິກ AIPA, ເປັນຕົ້ນແມ່ນສະມາຊິກລັດຖະສະພາໜຸ່ມ, ສະມາຊິກລັດຖະສະພາຍິງເພີ່ມທະວີການພົບປະແລກປ່ຽນ, ແບ່ງປັນບົດຮຽນການເຄື່ອນໄຫວ ແລະບັນຫາທີ່ຕ່າງຝ່າຍຕ່າງມີຄວາມສົນໃຈ.
|
|
 |
|
ທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ແລະທ່ານນາງ Siti Rozaimeriyanty Dato Haji Abdul Rahman ເລຂາທິການໃຫຍ່ AIPA. ພາບ: ຟ້າມທັ໊ງ |
ທ່ານ ເຈິ່ນແທັງເໝິນ ຢືນຢັນວ່າ, ສະພາແຫ່ງຊາດຫວຽດນາມ ຈະສືບຕໍ່ປະກອບສ່ວນຢ່າງຕັ້ງໜ້າເຂົ້າໃນບັນດາການເຄື່ອນໄຫວຂອງ AIPA; ຜ່ານ AIPA, ບັນດາລັດຖະສະພາສະມາຊິກສາມາດພ້ອມກັນສ້າງພື້ນຖານນິຕິກຳທີ່ໝັ້ນຄົງ, ໜູນຊ່ວຍບັນດາລັດຖະບານໃນການຫັນຄຳໝັ້ນສັນຍາຂອງອາຊຽນໃຫ້ປະກົດຜົນເປັນຈິງ. ສະພາແຫ່ງຊາດຫວຽດນາມ ພວມຕັ້ງໜ້າກະກຽມ, ສະເໜີບາງເນື້ອໃນກ່ຽວກັບຫົວຂໍ້ທີ່ກ່ຽວຂ້ອງຢູ່ຄະນະກໍາມະການຂອງ AIPA ພ້ອມແລ້ວທີ່ຈະເຂົ້າຮ່ວມການປຶກສາຫາລື, ປະກອບສ່ວນເຂົ້າໃນບັນດາຮ່າງມະຕິ, ຂໍ້ລິເລີ່ມອື່ນໆໂດຍບັນດາລັດຖະສະພາສະມາຊິກ AIPA ສະເໜີ ແລະແຈ້ງການຮ່ວມຂອງສະມັດຊາໃຫຍ່ AIPA-46.
ທ່ານເລຂາທິການໃຫຍ່ AIPA ສະແດງຄວາມເຫັນດີເປັນເອກະພາບຕໍ່ຄຳເຫັນຂອງທ່ານປະທານສະພາແຫ່ງຊາດ ເຈິ່ນແທັງເໝິນ; ເນັ້ນໜັກວ່າ, ຫວຽດນາມ ຍາມໃດກໍ່ແມ່ນສະມາຊິກທີ່ຕັ້ງໜ້າ ແລະມີຄວາມຮັບຜິດຊອບໃນ AIPA, ພິເສດແມ່ນໃນການຊຸກຍູ້ບັນດາຂໍ້ລິເລີ່ມທີ່ກ່ຽວຂ້ອງເຖິງຊາວໜຸ່ມ, ແມ່ຍິງ ແລະການພັດທະນາແບບຍືນຍົງ. ພ້ອມທັງປາດຖະໜາວ່າ ສະພາແຫ່ງຊາດຫວຽດນາມ ຈະສືບຕໍ່ສະໜັບສະໜູນ, ເພີ່ມທະວີການຮ່ວມມືກັບຄະນະເລຂາ AIPA ເພື່ອຍູ້ແຮງບົດບາດຂອງຊາວໜຸ່ມ, ສະມາຊິກລັດຖະສະພາໜຸ່ມໃນການເຄື່ອນໄຫວຂອງ AIPA.
ໂດຍ: ເຈິ່ນຮວ່ຽນ