ປະທານສະພາແຫ່ງຊາດ ໄປຮອດສະວິດ ເພື່ອເຂົ້າຮ່ວມກອງປະຊຸມປະທານສະພາແຫ່ງຊາດສາກົນ
ກປ.ອອນໄລ - ຕອນບ່າຍວັນທີ 27 ກໍລະກົດ, ຕາມເວລາທ້ອງຖິ່ນ, ພາຍຫຼັງສິ້ນສຸດການຢ້ຽມຢາມ ມາຣົກ ຢ່າງເປັນທາງການ, ທ່ານ ເຈິ່ນແທັງເໝິນ ປະທານສະພາແຫ່ງຊາດ ພ້ອມດ້ວຍພັນລະຍາ ແລະຄະນະຜູ້ແທນຂັ້ນສູງຫວຽດນາມ ໄດ້ໄປຮອດສະໜາມບິນສາກົນ ເຊີແນວ, ປະເທດສະວິດ ເພື່ອເຂົ້າຮ່ວມກອງປະຊຸມປະທານສະພາແຫ່ງຊາດສາກົນ ຄັ້ງທີ 6 ແລະດໍາເນີນການເຄື່ອນໄຫວສອງຝ່າຍ ຢູ່ສະວິດ ແຕ່ວັນທີ 27-30 ກໍລະກົດ ຕາມຄໍາເຊີນ ຂອງທ່ານ Tulia Ackson ປະທານສະຫະພັນລັດຖະສະພາສາກົນ (IPU) ແລະທ່ານ Martin Chungong ເລຂາທິການໃຫຍ່ IPU.
    |
 |
|
ທ່ານ ເຈິ່ນແທັງເໝິນ ປະທານສະພາແຫ່ງຊາດ ແລະພັນລະຍາ ໄດ້ໄປຮອດເຊີແນວ, ເລີ່ມຕົ້ນການເຂົ້າຮ່ວມກອງປະຊຸມປະທານສະພາແຫ່ງຊາດສາກົນ. ພາບ: ຫວູຢຸງ. |
ຕ້ອນຮັບທ່ານ ເຈິ່ນແທັງເໝິນ ປະທານສະພາແຫ່ງຊາດ ພ້ອມດ້ວຍພັນລະຍາ ແລະຄະນະຜູ້ແທນຂັ້ນສູງຫວຽດນາມ ຢູ່ສະໜາມບິນ ມີ: ທ່ານ ມາຍຟານຢຸ້ງ ເອກອັກຄະລັດຖະທູດ, ຫົວໜ້າຄະນະຜູ້ຕາງໜ້າຫວຽດນາມ ຄຽງຂ້າງສະຫະປະຊາຊາດ, ຜູ້ຕາງໜ້າອົງການການຄ້າໂລກ (WTO) ແລະອົງການຈັດຕັ້ງສາກົນຢູ່ເຊີແນວ; ທ່ານ ຟຸ່ງເທ໋ລອງ ເອກອັກຄະລັດຖະທູດຫວຽດນາມ ປະຈຳສະວິດ ພ້ອມດ້ວຍພະນັກງານ, ລັດຖະກອນສະຖານທູດ...
|
|
 |
|
ພິທີຕ້ອນຮັບທ່ານ ເຈິ່ນແທັງເໝິນ ປະທານສະພາແຫ່ງຊາດ ແລະພັນລະຍາ ຢູ່ສະໜາມບິນສາກົນ ເຊີແນວ. ພາບ: ຫວູຢຸງ. |
ກອງປະຊຸມປະທານສະພາແຫ່ງຊາດສາກົນ ແມ່ນກົນໄກຂອງ IPU ບົນພື້ນຖານການຮ່ວມມືຢ່າງແໜ້ນແຟ້ນກັບ ສປຊ, ແມ່ນໂອກາດເພື່ອໃຫ້ບັນດາຜູ້ນຳລັດຖະສະພາ ປະກອບສ່ວນເຂົ້າໃນໂຄງການດໍາເນີນງານຂອງສະຫະປະຊາຊາດ. ນີ້ແມ່ນເຫດການທີ່ຈັດຂຶ້ນ 5 ປີເທື່ອໜຶ່ງ. ການເຂົ້າຮ່ວມຂອງທ່ານ ເຈິ່ນແທັງເໝິນ ປະທານສະພາແຫ່ງຊາດ ໄດ້ສະແດງໃຫ້ເຫັນຄຳໝັ້ນສັນຍາຢ່າງແຂງແຮງຂອງຫວຽດນາມ ຕໍ່ລັດທິຫຼາຍຝ່າຍ, ພ້ອມທັງຍົກສູງພາບພົດ ແລະຖານະທີ່ຕັ້ງຂອງຫວຽດນາມ ແລະສະພາແຫ່ງຊາດຫວຽດນາມ ໃນເວທີສາກົນ; ສືບຕໍ່ຢືນຢັນບົດບາດເປັນເຈົ້າການ, ຕັ້ງໜ້າ ແລະມີຄວາມຮັບຜິດຊອບຂອງຫວຽດນາມ ໃນເວທີປາໄສຫຼາຍຝ່າຍ, ການປະກອບສ່ວນຢ່າງແທດຈິງຂອງຫວຽດນາມ ແລະສະພາແຫ່ງຊາດຫວຽດນາມ ຕໍ່ກັບໃນການເຄື່ອນໄຫວຂອງ ສປຊ ແລະ IPU.
ທາງດ້ານສອງຝ່າຍ, ນີ້ແມ່ນການຢ້ຽມຢາມຕ່າງປະເທດຄັ້ງທຳອິດຂອງທ່ານ ເຈິ່ນແທັງເໝິນ ເຖິງສະວິດ. ການຢ້ຽມຢາມຈະສືບຕໍ່ຢືນຢັນແຜນນະໂຍບາຍສະເໝີຕົ້ນສະເໝີປາຍຂອງຫວຽດນາມ ແມ່ນຍາມໃດກໍຖືເປັນສໍາຄັນ ແລະປາດຖະໜາຢາກຊຸກຍູ້ການພົວພັນຄູ່ຮ່ວມມືຮອບດ້ານ ຫວຽດນາມ-ສະວິດ; ເພີ່ມທະວີການແລກປ່ຽນຄະນະຜູ້ແທນຂັ້ນສູງ ແລະທຸກຂັ້ນກັບສະວິດ; ສົມທົບກັນຍູ້ໄວວິວັດການເຈລະຈາສັນຍາການຄ້າເສລີລະຫວ່າງຫວຽດນາມ ແລະສະມາຄົມການຄ້າເສລີເອີລົບ (EFTA), ສືບຕໍ່ເປີດກວ້າງການຮ່ວມມືໃນຂົງເຂດອື່ນ, ຄື: ການສຶກສາ-ບໍາລຸງກໍ່ສ້າງ, ວິທະຍາສາດ - ເຕັກໂນໂລຢີ, ວັດທະນະທຳ, ການທ່ອງທ່ຽວ, ການຮັບມືການປ່ຽນແປງຂອງສະພາບດິນຟ້າອາກາດ...
ພາຍຫຼັງພິທີຕ້ອນຮັບ, ທ່ານ ເຈິ່ນແທັງເໝິນ ປະທານສະພາແຫ່ງຊາດ ພ້ອມດ້ວຍພັນລະຍາ ແລະຄະນະຜູ້ແທນຂັ້ນສູງຫວຽດນາມ ໄດ້ໄປຢ້ຽມຢາມ ແລະພົບປະໂອ້ລົມກັບພະນັກງານ, ລັດຖະກອນຄະນະຜູ້ຕາງໜ້າຫວຽດນາມ ປະຈຳ ສປຊ ແລະບັນດາອົງການຈັດຕັ້ງສາກົນປະຈໍາເຊີແນວ, ສະຖານທູດ ແລະປະຊາຄົມຊາວຫວຽດນາມ ອາໄສຢູ່ ສະວິດ.
ໂດຍ: ໄຊຊະນະ