ເລຂາທິການໃຫຍ່ ໂຕເລິມ ເຂົ້າວາງພວງມາລາໄວ້ອາໄລຕໍ່ການຈາກໄປຂອງສະຫາຍພົນເອກ ຄຳໄຕ ສີພັນດອນ

ເນື່ອງໃນໂອກາດນີ້, ສະຫາຍ ເລຂາທິການໃຫຍ່ ໂຕເລິມ ໄດ້ມີການພົບປະກັບສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ ແລະສະຫາຍ ສອນໄຊ ສີພັນດອນ ນາຍົກລັດຖະມົນຕີລາວ.

ສະຫາຍ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ນໍາໜ້າຄະນະຜູ້ແທນການນໍາຂັ້ນສູງຂອງພັກ, ລັດ ສສ ຫວຽດນາມ ເຂົ້າວາງພວງມາລາໄວ້ອາໄລສະຫາຍ ພົນເອກ ຄຳໄຕ ສີພັນດອນ ອະດີດປະທານຄະນະບໍລິຫານງານສູນກາງພັກ, ອະດີດປະທານປະເທດ ແຫ່ງ ສປປ ລາວ. ພາບ: ສໍານັກຂ່າວສານຫວຽດນາມ

ຕາງໜ້າພັກ, ລັດ ແລະປະຊາຊົນຫວຽດນາມ, ສະຫາຍ ເລຂາທິການໃຫຍ່ ໂຕເລິມ ສະແດງຄວາມໂສກເສົ້າຕໍ່ການຈາກໄປຂອງສະຫາຍພົນເອກ ຄໍາໄຕ ສີພັນດອນ ແລະແບ່ງປັນຄວາມໂສກເສົ້າເສຍດາຍເຖິງບັນດາສະຫາຍການນຳຂັ້ນສູງລາວ, ປະຊາຊົນລາວທັງຊາດ ແລະຄອບຄົວສະຫາຍພົນເອກ ຄໍາໄຕ ສີພັນດອນ. ສະຫາຍ ເລຂາທິການໃຫຍ່ ໂຕເລິມ ເນັ້ນໜັກວ່າ, ສະຫາຍພົນເອກ ຄຳໄຕ ສີພັນດອນ ບໍ່ພຽງແຕ່ແມ່ນການນຳທີ່ດີເດັ່ນຂອງລາວ ເທົ່ານັ້ນ ຫາກຍັງແມ່ນເພື່ອນມິດສັດຊື່ບໍລິສຸດ, ສະຫາຍທີ່ສະໜິດສະໜົມ, ຄວາມສະໜິດຕິດພັນ, ຍາມໃດກໍ່ຄຽງບ່າຄຽງໄຫຼ່ກັບຫວຽດນາມ ໃນຕະຫຼອດໄລຍະຕໍ່ສູ້ປົກປັກຮັກສາປະເທດຊາດ ແລະສ້າງສາປະເທດຂອງສອງຊາດ. ການຈາກໄປຂອງສະຫາຍແມ່ນການສູນເສຍຢ່າງໃຫຍ່ຫຼວງຕໍ່ພັກ, ລັດ ແລະປະຊາຊົນສອງປະເທດລາວ ແລະຫວຽດນາມ. ສະຫາຍເລຂາທິການໃຫຍ່ ໂຕເລິມ ແຈ້ງວ່າ ເພື່ອສະແດງຄວາມຮູ້ບຸນຄຸນຕໍ່ການປະກອບສ່ວນຂອງສະຫາຍ ພົນເອກ ຄຳໄຕ ສີພັນດອນ ໃຫ້ການພັດທະນາສາຍພົວພັນສະໜິດຕິດພັນລະຫວ່າງ ຫວຽດນາມ-ລາວ, ພັກ, ລັດຫວຽດນາມ ໄດ້ຕົກລົງຈະຈັດຕັ້ງງານສົບລະດັບຊາດ.

ສະຫາຍ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ພົບປະກັບສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ.  ພາບ: ສໍານັກຂ່າວສານຫວຽດນາມ

ສະຫາຍ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ພົບປະກັບສະຫາຍ ສອນໄຊ ສີພັນດອນ ນາຍົກລັດຖະມົນຕີລາວ. ພາບ: ສໍານັກຂ່າວສານຫວຽດນາມ

ທີ່ການພົບປະຕ່າງໆ, ສອງຝ່າຍໄດ້ຕີລາຄາສູງຕໍ່ການພັດທະນາຢ່າງຕັ້ງໜ້າໃນການພົວພັນສອງປະເທດ; ເຫັນດີເປັນເອກະພາບການແລກປ່ຽນຄະນະຜູ້ແທນທຸກຂັ້ນ, ພິເສດແມ່ນຂັ້ນສູງ; ສືບຕໍ່ສົມທົບກັນຜັນຂະຫຍາຍບັນດາຂໍ້ຕົກລົງທີ່ບັນລຸໄດ້ຢ່າງມີປະສິດທິຜົນ; ຢືນຢັນວ່າ ຫວຽດນາມ ແລະລາວ ຄວນຄຽງບ່າຄຽງໄຫຼ່, ສະໜັບສະໜູນ ແລະໜູນຊ່ວຍເຊິ່ງກັນ ແລະກັນ ເຮັດຈົນສຸດຄວາມສາມາດຂອງຕົນ ເພື່ອເພີ່ມພູນຄູນສ້າງໃຫ້ນໍ້າໃຈມິດຕະພາບອັນຍິ່ງໃຫຍ່ ແລະຄວາມສະໜິດຕິດພັນແບບພິເສດລະຫວ່າງສອງພັກ, ສອງລັດ, ສອງຊາດໃຫ້ຂຽວສົດງົດງາມ, ນັບມື້ນັບເກີດດອກອອກຜົນ.

ໂດຍ: ເຈິ່ນຮວ່ຽນ