ເລຂາທິການໃຫຍ່ ໂຕເລິມ ຕ້ອນຮັບເອກອັກຄະລັດຖະທູດສະຫະພັນລັດເຊຍ ປະຈຳ ຫວຽດນາມ

ທີ່ການພົບປະ, ທ່ານເລຂາທິການໃຫຍ່ ໂຕເລິມ ຢືນຢັນວ່າ ຫວຽດນາມ ຍາມໃດກໍ່ຖືລັດເຊຍ ແມ່ນໜຶ່ງໃນບັນດາຄູ່ຮ່ວມມືບຸລິມະສິດແຖວໜ້າໃນນະໂຍບາຍພົວພັນຕ່າງປະເທດ. ຫວຽດນາມ ປາດຖະໜາຢາກຮັກສາການພົວພັນທີ່ເປັນມູນເຊື້ອອັນດີງາມ, ຕອບສະໜອງຜົນປະໂຫຍດຂອງປະຊາຊົນສອງປະເທດ, ປະກອບສ່ວນຮັກສາສັນຕິພາບ, ການຮ່ວມມື ແລະການພັດທະນາຢູ່ສອງພາກພື້ນ ແລະໃນໂລກ.

ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຕ້ອນຮັບທ່ານ Gennady Bezdetko ເອກອັກຄະລັດຖະທູດສະຫະພັນລັດເຊຍ ປະຈຳ ຫວຽດນາມ. ພາບ: ກຽນຈູງ

ເພື່ອສືບຕໍ່ຍົກສູງປະສິດທິຜົນການຮ່ວມມືສອງຝ່າຍ, ພິເສດໃນປີ 2025 ກົງກັບໂອກາດສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດ, ທ່ານເລຂາທິການໃຫຍ່ ໂຕເລິມ ສະເໜີໃຫ້ສອງຝ່າຍສືບຕໍ່ເພີ່ມທະວີການແລກປ່ຽນຄະນະຜູ້ແທນຂັ້ນສູງ; ຮ່ວມມືຢ່າງແໜ້ນແຟ້ນໃນເວທີປາໄສຫຼາຍຝ່າຍ; ຜັນຂະຫຍາຍສັນຍາການຄ້າເສລີ ຫວຽດນາມ-ສະຫະພັນເສດຖະກິດ ອາຊີ-ເອີຣົບ ຢ່າງມີປະສິດທິຜົນ; ກຳນົດບັນດາທິດທາງ, ມາດຕະການ ແລະໂຄງການຮ່ວມມືໃໝ່ໃນຂົງເຂດປ້ອງກັນຊາດ, ປ້ອງກັນຄວາມສະຫງົບ, ເຕັກໂນໂລຢີສູງ, ພະລັງງານ, ໄຟຟ້ານິວເຄຼຍ, ວິທະຍາສາດພື້ນຖານ...

ໃນໄລຍະຈະມາເຖິງ, ສອງຝ່າຍກໍ່ຄວນສຸມໃສ່, ມານະພະຍາຍາມຜັນຂະຫຍາຍບັນດາຂໍ້ຕົກລົງສອງຝ່າຍຢ່າງມີປະສິດທິຜົນ, ກວດກາຄືນ ແລະແກ້ໄຂຂໍ້ຕິດຂັດທີ່ຍັງຄົງຄ້າງ, ຜ່ານນັ້ນເປີດກວ້າງ ແລະສ້າງບາດກ້າວບຸກທະລຸໃນການຮ່ວມມືແທດຈິງໃນການພົວພັນລະຫວ່າງສອງປະເທດ.

ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ແລະທ່ານ Gennady Bezdetko ເອກອັກຄະລັດຖະທູດສະຫະພັນລັດເຊຍ ປະຈຳ ຫວຽດນາມ. ພາບ: ກຽນຈູງ

ສ່ວນທ່ານເອກອັກຄະລັດຖະທູດ Gennady Bezdetko ໃຫ້ຄຳໝັ້ນສັນຍາ ຈະສືບຕໍ່ຊຸກຍູ້ບັນດາອົງການທີ່ກ່ຽວຂ້ອງຂອງລັດເຊຍ ຮ່ວມມືກັບບັນດາຄູ່ຮ່ວມມືຫວຽດນາມ ຢ່າງແໜ້ນແຟ້ນແນໃສ່ເພີ່ມທະວີ ແລະເຮັດໃຫ້ການພົວພັນຄູ່ຮ່ວມມືຍຸດທະສາດຮອບດ້ານເລິກເຊິ່ງກວ່າອີກ. ທ່ານເອກອັກຄະລັດຖະທູດ Gennady Bezdetko ຖືວ່າ ສອງປະເທດຈະຕັດສິນໃຈສືບຕໍ່ຊຸກຍູ້ການພົວພັນມິດຕະພາບທີ່ເປັນມູນເຊື້ອ, ຄູ່ຮ່ວມມືຍຸດທະສາດຮອບດ້ານ ຫວຽດນາມ-ລັດເຊຍ ນັບມື້ນັບເຂົ້າສູ່ລວງເລິກ, ແທດຈິງ ແລະມີປະສິດທິຜົນ, ເພື່ອຜົນປະໂຫຍດຂອງປະຊາຊົນສອງປະເທດ, ເພື່ອສັນຕິພາບ, ມິດຕະພາບ ແລະການພັດທະນາຢູ່ພາກພື້ນ ແລະໃນໂລກ.

ໂດຍ: ເຈິ່ນຮວ່ຽນ