ຊຸກຍູ້ການຮ່ວມມືລະຫວ່າງ ຫວຽດນາມ-ເບລາຣຸດ ໃນຫຼາຍຂົງເຂດ

ທີ່ການຕ້ອນຮັບ, ທ່ານນາຍົກລັດຖະມົນຕີ ຟ້າມມິງຈິ໊ງ ຢືນຢັນວ່າ ຫວຽດນາມ ຍາມໃດກໍ່ເຄົາລົບນັບຖືການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືຫຼາຍດ້ານກັບເບລາຣຸດ, ພ້ອມທັງສະແດງຄວາມເພິ່ງພໍໃຈຕໍ່ການພັດທະນາຢ່າງຕັ້ງໜ້າຂອງການພົວພັນ ຫວຽດນາມ-ເບລາຣຸດ ໃນໄລຍະຜ່ານມາ, ພິເສດແມ່ນດ້ານການເມືອງ-ການທູດ.

ບັນຍາກາດທີ່ການຕ້ອນຮັບ. ພາບ: ສໍານັກຂ່າວສານຫວຽດນາມ

ທ່ານນາຍົກລັດຖະມົນຕີ ຟ້າມມິງຈິ໊ງ ສະເໜີສອງຝ່າຍສືບຕໍ່ເພີ່ມທະວີການຮ່ວມມືໃນຂົງເຂດອື່ນໆ, ໃນນັ້ນມີການປ້ອງກັນຊາດ-ປ້ອງກັນຄວາມສະຫງົບ; ເຕັກໂນໂລຢີຂໍ້ມູນຂ່າວສານ, ການຫັນເປັນດີຈີຕອນ, ພະລັງງານສະອາດ, ອຸດສາຫະກຳ, ກະສິກຳ, ການສຶກສາ, ວັດທະນະທຳ, ຍູ້ແຮງການຮ່ວມມືດ້ານວັດທະນະທຳ ແລະການພົບປະແລກປ່ຽນປະຊາຊົນ ເພື່ອແນໃສ່ເພີ່ມທະວີຄວາມເຂົ້າໃຈເຊິ່ງກັນ ແລະກັນ… ທ່ານນາຍົກລັດຖະມົນຕີ ຟ້າມມິງຈິ໊ງ ສະເໜີໃຫ້ສອງຝ່າຍເພີ່ມທະວີການແລກປ່ຽນທຶນການສຶກສາ, ເປັນຕົ້ນແມ່ນໃນວິທະຍາສາດພື້ນຖານ, ສິລະປະ, ບຳລຸງກໍ່ສ້າງຊັບພະຍາກອນມະນຸດທີ່ມີຄຸນນະພາບສູງໃນຂະແໜງອາຊີບທີ່ເໝາະສົມກັບທ່າອ່ຽງພັດທະນາຂອງໂລກ.

ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ແລະທ່ານ Anatoly Sivak ຮອງນາຍົກລັດຖະມົນຕີ ສາທາລະນະລັດ ເບລາຣຸດ. ພາບ: ສໍານັກຂ່າວສານຫວຽດນາມ

ທ່ານຮອງນາຍົກລັດຖະມົນຕີ Anatoly Sivak ເນັ້ນໜັກວ່າ ເບລາຣຸດ ຕີລາຄາສູງບົດບາດຂອງຫວຽດນາມ ຢູ່ອາຊີຕາເວັນອອກສ່ຽງໃຕ້ ແລະອາຊີ-ປາຊີຟິກ; ການນຳຂັ້ນສູງເບລາຣຸດ ມີຄວາມສົນໃຈ ແລະປາດຖະໜາຢາກຊຸກຍູ້ການຮ່ວມມືໃນຫຼາຍຂົງເຂດກັບຫວຽດນາມ. ທ່ານຮອງນາຍົກລັດຖະມົນຕີ Anatoly Sivak ສະແດງຄວາມເຫັນດີເປັນເອກະພາບຕໍ່ກັບການຕີລາຄາຂອງທ່ານນາຍົກລັດຖະມົນຕີ ຟ້າມມິງຈິ໊ງ ກ່ຽວກັບການພົວພັນສອງຝ່າຍ ແລະທິດທາງເພີ່ມທະວີການຮ່ວມມືໃນໄລຍະຈະມາເຖິງ.

ສອງຝ່າຍໄດ້ເຫັນດີເປັນເອກະພາບຊີ້ນຳບັນດາກະຊວງ, ຂະແໜງການ, ທ້ອງຖິ່ນ, ວິສາຫະກິດສອງປະເທດ ຕັ້ງໜ້າຜັນຂະຫຍາຍຂໍ້ຕົກລົງຈາກການຢ້ຽມຢາມ ແລະການພົບປະລະຫວ່າງການນຳຂັ້ນສູງສອງປະເທດໃນໄລຍະມໍ່ໆມານີ້, ກໍ່ຄືໝາກຜົນພົ້ນເດັ່ນຂອງກອງປະຊຸມ ຄັ້ງທີ 16 ຄະນະກໍາມະການລະຫວ່າງລັດຖະບານ ຫວຽດນາມ-ເບລາຣຸດ ກ່ຽວກັບການຮ່ວມມືດ້ານເສດຖະກິດ-ການຄ້າ ແລະວິທະຍາສາດ-ເຕັກນິກ ເພື່ອຊຸກຍູ້ການຮ່ວມມືໃນທຸກຂົງເຂດລະຫວ່າງຫວຽດນາມ ແລະເບລາຣຸດ ໃຫ້ຫຼາຍກວ່າອີກ.

ໂດຍ: ເຈິ່ນຮວ່ຽນ