ນຳການພົວພັນລະຫວ່າງ ຫວຽດນາມ - ຍີ່ປຸ່ນ ເຂົ້າສູ່ລວງເລິກ, ແທດຈິງ ແລະມີປະສິດທິຜົນ

ທ່ານນາຍົກລັດຖະມົນຕີ ຕີລາຄາສູງຕໍ່ຝ່າຍຍີ່ປຸ່ນ ທີ່ໄດ້ໃຫ້ການໜູນຊ່ວຍດ້ານການເງິນຢ່າງມີປະສິດທິຜົນແກ່ຫວຽດນາມ ເພື່ອປະຕິບັດບັນດາໂຄງການລົງທຶນພື້ນຖານໂຄງລ່າງທີ່ມີຂອບຂະໜາດ. ທ່ານນາຍົກລັດຖະມົນຕີ ໃຫ້ຮູ້ວ່າ: ໃນໄລຍະຜ່ານມາ, ບັນດາຝ່າຍໄດ້ດຳເນີນຫຼາຍມາດຕະການສ້າງໂຄງປະກອບຄືນໃໝ່ເພື່ອໃຫ້ໂຄງການກັ່ນນ້ຳມັນ ຫງີເຊີນ (ແຂວງແທັງຮວ໋າ) ຍົກສູງປະສິດທິຜົນໃນການເຄື່ອນໄຫວ ແລະ ໄດ້ຮັບໝາກຜົນໃນເບື້ອງຕົ້ນ. ທ່ານນາຍົກລັດຖະມົນຕີ  ສະເໜີໃຫ້ທ່ານລັດຖະມົນຕີ ປະກອບທັດສະນະ ເພື່ອຊຸກຍູ້ໃຫ້ທະນາຄານຮ່ວມມືສາກົນຍີ່ປຸ່ນ ເຂົ້າຮ່ວມການສ້າງໂຄງປະກອບໂຄງການດັ່ງກ່າວຄືນໃໝ່ຢ່າງຕັ້ງໜ້າ ບົນຈິດໃຈສ້າງຄວາມກົມກຽວລະຫວ່າງຜົນປະໂຫຍດ,   ແບ່ງປັນຄວາມສ່ຽງເພື່ອໃຫ້ໂຄງການກາຍເປັນສັນຍາລັກແຫ່ງການຮ່ວມມືທີ່ມີປະສິດທິຜົນ ແລະຕ່າງຝ່າຍຕ່າງມີຜົນປະໂຫຍດຢ່າງແທດຈິງ.

ຕາມທ່ານນາຍົກລັດຖະມົນຕີ ແລ້ວ, ຫວຽດນາມ ພວມຕ້ອງການແຫຼ່ງທຶນອັນໃຫຍ່ຫຼວງ ໃຫ້ແກ່ພັດທະນາ, ຜັນຂະຫຍາຍບັນດາໂຄງການຢ່າງວ່ອງໄວ ແລະ ປະສິດທິຜົນ. ສະນັ້ນ, ຈຶ່ງມີຄວາມຕ້ອງການຮ່ວມມື ແລະ ການໜູນຊ່ວຍຈາກບັນດາຄູ່ຮ່ວມມືສາກົນ, ໃນນັ້ນມີ ຍີ່ປຸ່ນ.

ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ  ຕ້ອນຮັບທ່ານ Kato Katsunobu ລັດຖະມົນຕີການເງິນຍີ່ປຸ່ນ. ພາບ: ສໍານັກຂ່າວສານຫວຽດນາມ

ທ່ານນາຍົກລັດຖະມົນຕີ ສະເໜີໃຫ້ຝ່າຍຍີ່ປຸ່ນ ສືບຕໍ່ໜູນຊ່ວຍດ້ານການເງິນ, ຊຸກຍູ້ແຫຼ່ງທຶນ ODA ລຸ້ນໃໝ່ແກ່ຫວຽດນາມ ໃຫ້ເໝາະສົມກັບສະພາບປະຈຸບັນ ດ້ວຍອັດຕາດອກເບ້ຍບຸລິມະສິດ, ກົນໄກງ່າຍດາຍ, ລະບຽບການຄ່ອງຕົວ, ຜັນຂະຫຍາຍວ່ອງໄວເພື່ອປະຕິບັດໂຄງການພື້ນຖານໂຄງລ່າງຍຸດທະສາດ... ພ້ອມກັນນັ້ນ, ຍີ່ປຸ່ນ ສືບຕໍ່ຮ່ວມມືໃນການຖ່າຍທອດເຕັກໂນໂລຢີ, ໜູນຊ່ວຍການກໍ່ສ້າງ ແລະປັບປຸງລະບອບລະບຽບການໃຫ້ສົມບູນແບບ, ບຳລຸງສ້າງແຫຼ່ງຊັບພະຍາກອນມະນຸດ, ຍົກສູງຄວາມສາມາດໃນການຄຸ້ມຄອງ ດ້ວຍຂອບຂະໜາດທີ່ໃຫຍ່ກວ່າ, ມີລະດັບໄວກວ່າ, ຂອບເຂດ ກ້ວາງກວ່າ, ມີຈຸດສຸມ, ຈຸດໃຈກາງ, ສຸມໃສ່ບາງໂຄງການຂະໜາດໃຫຍ່. ພ້ອມກັນນັ້ນ, ຊຸກຍູ້ການຮ່ວມມືດ້ານການລົງທຶນ, ການຄ້າ, ການແລກປ່ຽນສິນຄ້າປະເພດຕ່າງໆ ທີ່ມີທ່າແຮງຂອງສອງຝ່າຍ; ການຮ່ວມມືລະຫວ່າງທ້ອງຖິ່ນ; ການຮ່ວມມືດ້ານວິທະຍາສາດ-ເຕັກໂນໂລຢີ, ນະວັດຕະກໍາ, ການຫັນເປັນດີຈີຕອນ, ການຂຸດຄົ້ນຢູ່ໃຕ້ດິນ, ນ່ານທະເລ, ອາວະກາດ ...

ສ່ວນທ່ານ Kato Katsunobu ຢືນຢັນວ່າ ຈະຕັ້ງໜ້າສະໜັບສະໜູນ, ຊຸກຍູ້ການຮ່ວມມືທີ່ຕ່າງຝ່າຍຕ່າງມີຜົນປະໂຫຍດໃນຂົງເຂດທີ່ຕ່າງຝ່າຍຕ່າງມີຄວາມສົນໃຈ. ທ່ານ Kato Katsunobu ໃຫ້ຮູ້ວ່າ ຝ່າຍຍີ່ປຸ່ນ ພວມສືບຕໍ່ກວດກາຄືນນະໂຍບາຍທີ່ສະດວກໃຫ້ແກ່ຊາວຕ່າງປະເທດ, ໃນນັ້ນມີຊາວຫວຽດນາມ. ທ່ານສະເໜີໃຫ້ສອງຝ່າຍມານະພະຍາຍາມກວ່າອີກ ເພື່ອແກ້ໄຂຂໍ້ຕິດຂັດ, ຊຸກຍູ້ບັນດາໂຄງການທີ່ມີຢູ່ແລ້ວ ແລະ ຜັນຂະຫຍາຍບັນດາໂຄງການໃໝ່; ຢືນຢັນວ່າ ຈະສືບຕໍ່ລາຍງານຕໍ່ລັດຖະບານຍີ່ປຸ່ນ, ແລກປ່ຽນກັບບັນດາວິສາຫະກິດກ່ຽວກັບການຮ່ວມມືກັບຫວຽດນາມ ໃນໂຄງການພື້ນຖານໂຄງລ່າງຍຸດທະສາດ; ປືກສາຫາລືກັບທະນາຄານຮ່ວມມືສາກົນຍີ່ປຸ່ນ ກ່ຽວກັບເນື້ອໃນທີ່ທ່ານນາຍົກລັດຖະມົນຕີ ກ່າວເຖິງກ່ຽວກັບໂຄງການກັ່ນນ້ຳມັນ ຫງີເຊີນ.

ໂດຍ: ທູຈາງ