ປະທານປະເທດຫວຽດນາມ ຕ້ອນຮັບລັດຖະມົນຕີກະຊວງການຕ່າງປະເທດ ໂຕໂກ
ກປ.ອອນໄລ - ຕອນບ່າຍວັນທີ 8 ມັງກອນ, ຢູ່ທຳນຽບປະທານປະເທດ, ທ່ານ ເລືອງເກື່ອງ ປະທານປະເທດຫວຽດນາມ ໄດ້ໃຫ້ການຕ້ອນຮັບທ່ານ Robert Dussey, ລັດຖະມົນຕີກະຊວງການຕ່າງປະເທດ, ການເຊື່ອມໂຍງພາກພື້ນ ແລະຊາວຕ່າງດ້າວ ແຫ່ງ ສາທາລະນະລັດ ໂຕໂກ ທີ່ພວມມີການຢ້ຽມຢາມຫວຽດນາມ ຢ່າງເປັນທາງການ ແຕ່ວັນທີ 8-10 ມັງກອນ.
ທີ່ການຕ້ອນຮັບ, ທ່ານປະທານປະເທດ ເລືອງເກື່ອງ ເນັ້ນໜັກວ່າ, ການຢ້ຽມຢາມຂອງທ່ານລັດຖະມົນຕີ Robert Dussey ແລະຄະນະຜູ້ແທນໂຕໂກ ມີຄວາມໝາຍສຳຄັນ, ປະກອບສ່ວນຊຸກຍູ້ການພົວພັນມິດຕະພາບ ແລະການຮ່ວມມືຫຼາຍດ້ານລະຫວ່າງສອງປະເທດ, ເປັນຕົ້ນແມ່ນໃນສະພາບການຫວຽດນາມ ແລະໂຕໂກ ພວມມຸ່ງໄປເຖິງການສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ (8-2-1975 / 8-2-2025). ຫວຽດນາມ ຍາມໃດກໍ່ຖືເປັນສຳຄັນ ແລະປາດຖະໜາຢາກເຮັດໃຫ້ການພົວພັນຮ່ວມມືກັບບັນດາປະເທດເພື່ອນມິດອາຟະລິກາ, ໃນນັ້ນມີສາທາລະນະລັດ ໂຕໂກ ເລິກເຊິ່ງຂຶ້ນກວ່າເກົ່າ.
    |
 |
|
ທ່ານ ເລືອງເກື່ອງ ປະທານປະເທດຫວຽດນາມ ຕ້ອນຮັບທ່ານ Robert Dussey, ລັດຖະມົນຕີກະຊວງການຕ່າງປະເທດ, ການເຊື່ອມໂຍງພາກພື້ນ ແລະຊາວຕ່າງດ້າວ ແຫ່ງ ສາທາລະນະລັດ ໂຕໂກ. ພາບ: ຫງວຽນຕວ໊ນ |
ບົນພື້ນຖານນັ້ນ, ທ່ານປະທານປະເທດ ເລືອງເກື່ອງ ສະເໜີໃຫ້ສອງຝ່າຍສົມທົບກັນຜັນຂະຫຍາຍມາດຕະການເຮັດໃຫ້ການພົວພັນສອງຝ່າຍເລິກເຊິ່ງກວ່າອີກ, ເປັນຕົ້ນແມ່ນເພີ່ມທະວີການແລກປ່ຽນຄະນະຜູ້ແທນ ແລະທຸກຂັ້ນແນໃສ່ຮັດແໜ້ນຄວາມໄວ້ເນື້ອເຊື່ອໃຈດ້ານການເມືອງ, ສ້າງພື້ນຖານອັນໜັກແໜ້ນເພື່ອຍູ້ແຮງການຮ່ວມມືໃນທຸກຂົງເຂດ; ເພີ່ມທະວີການສົມທົບ ແລະສະໜັບສະໜູນເຊິ່ງກັນ ແລະກັນຢູ່ເວທີປາໄສຫຼາຍຝ່າຍ, ອົງການຈັດຕັ້ງພາກພື້ນ ແລະສາກົນ, ຄື: ສະຫະປະຊາຊາດ, ຂະບວນການບໍ່ຮ່ວມກຸ່ມ, ອົງການຝະລັ່ງໂກໂຟນີ, ສະຫະພາບອາຟະລິກາ...
ທ່ານປະທານປະເທດ ເລືອງເກື່ອງ ສະເໜີໃຫ້ສອງຝ່າຍເພີ່ມທະວີການແລກປ່ຽນກາລະໂອກາດຊຸກຍູ້ການຮ່ວມມືໃນຂົງເຂດການຄ້າ, ການລົງທຶນ, ກະສິກຳ, ໂທລະຄົມມະນາຄົມ... ກ່ຽວກັບການລົງທຶນ, ບົນພື້ນຖານຜົນສຳເລັດຂອງໂຄງການລົງທຶນຢູ່ຕ່າງປະເທດຂອງວິສາຫະກິດ ຫວຽດນາມ ຄື: ກຸ່ມບໍລິສັດອຸດສາຫະກໍາ-ໂທລະຄົມມະນາຄົມກອງທັບ (Viettel), Petrovietnam, ທ່ານປະທານປະເທດ ສະເໜີ ໂຕໂກ ແຈ້ງຂ່າວກ່ຽວກັບກາລະໂອກາດລົງທຶນ ແລະໃຫ້ນະໂຍບາຍບຸລິມະສິດເພື່ອໃຫ້ວິສາຫະກິດຫວຽດນາມ ຄົ້ນຄວ້າລົງທຶນຢູ່ໂຕໂກ…
|
|
 |
|
ທ່ານ ເລືອງເກື່ອງ ປະທານປະເທດຫວຽດນາມ ແລະທ່ານ Robert Dussey, ລັດຖະມົນຕີກະຊວງການຕ່າງປະເທດ, ການເຊື່ອມໂຍງພາກພື້ນ ແລະຊາວຕ່າງດ້າວ ແຫ່ງ ສາທາລະນະລັດ ໂຕໂກ. ພາບ: ຫງວຽນຕວ໊ນ |
ສ່ວນທ່ານລັດຖະມົນຕີ Robert Dussey ຢືນຢັນວ່າ ການຢ້ຽມຢາມຫວຽດນາມ ບໍ່ພຽງແຕ່ມີຄວາມໝາຍສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດເທົ່ານັ້ນ ຫາກຍັງແນໃສ່ຊຸກຍູ້ການຮ່ວມມືໃນຂົງເຂດເສດຖະກິດ, ການຄ້າ, ກະສິກຳ... ທ່ານລັດຖະມົນຕີ Robert Dussey ໃຫ້ຄຳໝັ້ນສັນຍາວ່າ ຈະຕັ້ງໜ້າສົມທົບ, ແລກປ່ຽນກັບບັນດາກະຊວງ, ຂະແໜງການ, ອົງການທີ່ກ່ຽວຂ້ອງຂອງຫວຽດນາມ ເພື່ອຍູ້ແຮງການຮ່ວມມືລະຫວ່າງສອງປະເທດໃນໄລຍະຈະມາເຖິງ.
ໂດຍ: ເຈິ່ນຮວ່ຽນ