    |
 |
|
ການປຶກສາຫາລືດ້ານການເມືອງຂັ້ນລັດຖະມົນຕີການຕ່າງປະເທດຫວຽດນາມ-ລາວ ຄັ້ງທີິ 11. ພາບ: nhandan.vn |
ສິ່ງເຫຼົ່ານີ້ປະກອບສ່ວນສໍາຄັນເຂົ້າໃນການຮັກສາສະຖຽນລະພາບດ້ານການເມືອງ, ຮັບປະກັນປ້ອງກັນຊາດ-ປ້ອງກັນຄວາມສະຫງົບ ແລະພັດທະນາເສດຖະກິດ-ສັງຄົມຢູ່ແຕ່ລະປະເທດ, ພ້ອມທັງປະກອບສ່ວນຢ່າງຕັ້ງໜ້າ ເພື່ອສັນຕິພາບ, ການຮ່ວມມື ແລະການພັດທະນາຢູ່ພາກພື້ນ.
ໃນຂອບເຂດບັນດາການຢ້ຽມຢາມເຊິ່ງກັນ ແລະກັນ, ການສົນທະນາທາງໂທລະສັບ ແລະນອກເວທີປາໄສຫຼາຍຝ່າຍ, ການນໍາຂັ້ນສູງ ກໍ່ຄືທຸກຂັ້ນຂອງຫວຽດນາມ ແລະລາວ ລ້ວນແຕ່ຢັ້ງຢືນວ່າຍາມໃດກໍ່ຖືເປັນສໍາຄັນ ແລະບຸລິມະສິດສູງສຸດໃຫ້ແກ່ການພົວພັນແບບພິເສດລະຫວ່າງສອງປະເທດ.
ບົນພື້ນຖານນັ້ນ, ບັນດາຂໍ້ຕົກລົງ, ຍຸດທະສາດ, ສັນຍາການຮ່ວມມືລະຫວ່າງສອງຝ່າຍໄດ້ຮັບການຜັນຂະຫຍາຍຢ່າງຕັ້ງໜ້າ ແລະມີປະສິດທິຜົນ. ການພົວພັນດ້ານການເມືອງລະຫວ່າງສອງຝ່າຍສືບຕໍ່ໄດ້ຮັບການປັບປຸງ ແລະເພີ່ມທະວີ.
ການຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບໄດ້ຮັກສາໄວ້ ແລະແມ່ນໜຶ່ງໃນບັນດາເສົາຄໍ້າສໍາຄັນ. ສອງຝ່າຍກໍ່ໄດ້ຮັບໝາກຜົນ ຕັ້ງໜ້າຫຼາຍຢ່າງໃນການຮ່ວມມືເສດຖະກິດ, ການສຶກສາ, ວິທະຍາສາດ-ເຕັກນິກ... ການຮ່ວມມືລະຫວ່າງບັນດາທ້ອງຖິ່ນມີເສັ້ນຊາຍແດນຮ່ວມໄດ້ຮັບການຍູ້ແຮງ, ໃນນັ້ນມີການກໍ່ສ້າງພື້ນຖານໂຄງລ່າງ, ການເບິ່ງແຍງດູແລສາທາລະນະສຸກ, ກໍ່ສ້າງ, ພັດທະນາຊັບພະຍາກອນມະນຸດ, ລົບລ້າງຄວາມທຸກຍາກ, ຮັບປະກັນຄວາມໝັ້ນຄົງ, ຄວາມເປັນລະບຽບຮຽບຮ້ອຍ.
ສອງພັກ, ສອງລັດ ແລະປະຊາຊົນສອງປະເທດໄດ້ເພີ່ມພູນຄູນສ້າງຄວາມສາມັກຄີ, ມິດຕະພາບຢ່າງບໍ່ຢຸດຢັ້ງຜ່ານການເຄື່ອນໄຫວວັດທະນະທໍາ, ກິລາ, ທ່ອງທ່ຽວ, ການພົບປະແລກປ່ຽນປະຊາຊົນ... ທີ່ດໍາເນີນຢູ່ທັງຫວຽດນາມ ແລະລາວ. ເດືອນ ທັນວາ 2024 ຜ່ານມາ, ທີ່ຫໍວັດທະນະທໍາແຫ່ງຊາດລາວ ຢູ່ນະຄອນຫຼວງວຽງຈັນ, ກະຊວງວັດທະນະທໍາ, ກິລາ ແລະທ່ອງທ່ຽວສົມທົບກັບກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວລາວ ຈັດຕັ້ງສັບປະດາວັດທະນະທຳຫວຽດນາມ ຢູ່ລາວ ປີ 2024 ດ້ວຍຫົວຂໍ້ “ສິສັນວັດທະນະທໍາຫວຽດນາມ, ນໍ້າໃຈມິດຕະພາບຫວຽດນາມ-ລາວ”.
ບັນດານັກສິລະປິນຫວຽດນາມ ພ້ອມກັບພວກນ້ອງນັກຮຽນໂຮງຮຽນສອງພາສາລາວ-ຫວຽດນາມ ຫງວຽນຢູ ມີລາຍການສະແດງສິລະປະ ຟ້ອນລຳ, ດົນຕີຍ້ອງຍໍປະທານໂຮ່ຈີມິນ, ຄວາມຮັກຕໍ່ປະເທດຊາດ, ປະຊາຊົນ ແລະນໍ້າໃຈມິດຕະພາບອັນຍິ່ງໃຫຍ່ລະຫວ່າງສອງປະເທດ. ລາຍການເຮັດໃຫ້ຜູ້ຊົມຢູ່ລາວ ມີໂອກາດເຂົ້າໃຈກວ່າກ່ຽວກັບພື້ນຖານວັດທະນະທໍາຫວຽດນາມ, ກໍ່ຄືການພົວພັນແບບພິເສດລະຫວ່າງສອງປະເທດກວ່າອີກ.
ທ່ານ ວັນສີ ກົ່ວມົວ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວລາວ ຊີ້ແຈ້ງວ່າ ນີ້ແມ່ນໜຶ່ງໃນຫຼາຍເຫດການເພື່ອແນໃສ່ຜັນຂະຫຍາຍແຜນການຮ່ວມມືດ້ານວັດທະນະທໍາ, ສິລະປະ ແລະທ່ອງທ່ຽວລະຫວ່າງສອງປະເທດໄລຍະ 2021-2025, ປະກອບສ່ວນເພີ່ມທະວີຄວາມເຂົ້າໃຈເຊິ່ງກັນ ແລະກັນ, ຮັດແໜ້ນນໍ້າໃຈມິດຕະພາບລະຫວ່າງປະຊາຊົນສອງປະເທດຕື່ມອີກ.
ຫວຽດນາມ ແລະລາວ ຍາມໃດກໍ່ສະໜັບສະໜູນເຊິ່ງກັນ ແລະກັນ ແລະຮ່ວມມືຢ່າງແໜ້ນແຟ້ນຢູ່ບັນດາອົງການ, ເວທີປາໄສຫຼາຍຝ່າຍ, ໂດຍສະເພາະແມ່ນໃນຂອບອາຊຽນ, ສປຊ ແລະບັນດາກົນໄກອະນຸພາກພື້ນ.
ເດືອນ ທັນວາ 2024 ຜ່ານມາ, ທ່ານ ບຸ່ຍແທັງເຊິນ ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ແລະທ່ານ ທອງສະຫວັນ ພົມວິຫານ ລັດຖະມົນຕີການຕ່າງປະເທດລາວ ເປັນປະທານຮ່ວມການປຶກສາຫາລືດ້ານການເມືອງຂັ້ນລັດຖະມົນຕີການຕ່າງປະເທດຫວຽດນາມ-ລາວ ຄັ້ງທີ 11, ໃນນັ້ນ ແລກປ່ຽນຢ່າງເລິກເຊິ່ງກວ້າງຂວາງກ່ຽວກັບບັນດາບັນຫາພາກພື້ນ ແລະສາກົນທີ່ຕ່າງຝ່າຍຕ່າງມີຄວາມສົນໃຈ.
ທ່ານ ທອງສະຫວັນ ພົມວິຫານ ຂອບໃຈຫວຽດນາມ ຕັ້ງໜ້າໜູນຊ່ວຍລາວ ປະຕິບັດສໍາເລັດໜ້າທີ່ເປັນປະທານອາຊຽນ ແລະປະທານສະພາລັດຖະສະພາອາຊຽນ (AIPA) ປີ 2024. ທ່ານ ທອງສະຫວັນ ພົມວິຫານ ຢືນຢັນວ່າ ລາວຈະສະໜັບສະໜູນ ແລະສົມທົບກັບຫວຽດນາມ ຈັດຕັ້ງເວທີປາໄສອະນາຄົດອາຊຽນ ຄັ້ງທີສອງ, ເຊິ່ງຄາດວ່າຈະດໍາເນີນໃນຕົ້ນປີ 2025 ໃຫ້ປະສົບຜົນສຳເລັດ.
ທ່ານນາງ ຄຳເພົາ ເອີນທະວັນ ເອກອັກຄະລັດຖະທູດລາວ ປະຈໍາ ຫວຽດນາມ ໃຫ້ຂໍ້ສັງເກດວ່າ ການພົວພັນລະຫວ່າງສອງປະເທດບໍ່ພຽງແຕ່ປະກອບສ່ວນຮັກສາສະພາບສັນຕິພາບ, ສະຖຽນລະພາບເທົ່ານັ້ນ ຫາກຍັງສ້າງກໍາລັງໜູນຊຸກຍູ້ການພັດທະນາຮອບດ້ານຂອງແຕ່ລະປະເທດ.
ຕາມທ່ານນາງ ເອກອັກຄະລັດຖະທູດ ແລ້ວ ຜົນງານເຊິ່ງສອງຝ່າຍບັນລຸໄດ້ແມ່ນຫຼັກຖານພິສູດໃຫ້ເຫັນຢ່າງຈະແຈ້ງສິ່ງເຫຼົ່ານີ້. ທ່ານນາງ ເອກອັກຄະບັດຖະທູດເນັ້ນໜັກວ່າ ຜົນງານຂອງຫວຽດນາມ ໃນກິດຈະການປ່ຽນແປງໃໝ່ບໍ່ພຽງແຕ່ແມ່ນຄວາມເອກອ້າງທະນົງໃຈຂອງປະຊາຊົນຫວຽດນາມ ເທົ່ານັ້ນ ຫາກຍັງແມ່ນຄວາມປິຕິຊົມຊື່ນຂອງເພື່ອນມິດສາກົນ, ໃນນັ້ນ ມີລາວ.
ໃນສະຖານະການຫວຽດນາມ ແລະລາວ ພວມມຸ່ງເຖິງຂີດໝາຍ ໃໝ່ໃນກິດຈະການກໍ່ສ້າງ ແລະພັດທະນາປະເທດ, ທ່ານນາງ ຢືນຢັນວ່າ ພັກ, ລັດ ແລະປະຊາຊົນລາວ ສືບຕໍ່ຄຽງບ່າຄຽງໄຫຼ່ພ້ອມກັບພັກ, ລັດ ແລະປະຊາຊົນຫວຽດນາມ.
ໂດຍ: ໄຊນີດາ