ພັດທະນາແຂວງຢາລາຍ ໃຫ້ກາຍເປັນແຂວງທີ່ດີຂອງເຂດແຄມທະເລພາກກາງ - ໄຕຫງວຽນ

ທ່ານ ໂຕເລິມ ເລຂາທິການໃຫຍ່ ພົບປະກັບບັນດາຜູ້ແທນ. ພາບ: ສໍານັກຂ່າວສານຫວຽດນາມ

ກ່າວຄຳເຫັນທີ່ການເຮັດວຽກ, ທ່ານ ໂຕເລິມ ໄດ້ເນັ້ນໜັກເຖິງຄວາມຕັດສິນໃຈພັດທະນາແຂວງຢາລາຍ ໃຫ້ກາຍເປັນແຂວງທີ່ດີຂອງເຂດແຄມທະເລພາກກາງ - ໄຕຫງວຽນ ມີກະສິກໍາປອດສານພິດທີ່ອຸດົມສົມບູນ, ຊີວະພາບທີ່ເປັນຫຼາຍຮູບຫຼາຍແບບ, ອຸດົມສົມບູນ, ວັດທະນະທໍາທີ່ເປັນເອກະລັກສະເພາະ, ສັງຄົມ ແລະສິ່ງແວດລ້ອມແບບຍືນຍົງ, ຍູ້ໄວລະດັບການພັດທະນາ ແລະ ຍົກສູງຄຸນນະພາບຊີວິດຂອງປະຊາຊົນ.

ທ່ານ ໂຕເລິມ ເລຂາທິການໃຫຍ່ ກ່າວຄໍາເຫັນທີ່ການເຮັດວຽກກັບແຂວງຢາລາຍ. ພາບ: ສໍານັກຂ່າວສານຫວຽດນາມ

ທ່ານເລຂາທິການໃຫຍ່ ຮຽກຮ້ອງວ່າ ຕ້ອງໃກ້ຊິດຕິດແທດກັບມະຕິຂອງສູນກາງ, ການວາງແຜນ ແລະຍຸດທະສາດ ທີ່ໄດ້ຮັບຮອງເອົາ, ຍູ້ແຮງການພັດທະນາເສດຖະກິດແຂວງຢາລາຍ ຢ່າງເລິກເຊິ່ງ, ຮອບດ້ານ ແລະກວມລວມ ໂດຍອີງໃສ່ 3 ເສົາຄ້ຳຕົ້ນຕໍ ຄື: ພັດທະນາພື້ນຖານກະສິກໍາເຕັກໂນໂລຢີສູງ, ປອດສານພິດ, ຍືນຍົງ, ຍົກສູງ; ພັດທະນາຂະແໜງອຸດສາຫະກຳຈຳນວນໜຶ່ງຄື: ອຸດສາຫະກຳປຸງແຕ່ງ, ພະລັງງານທົດແທນ, ວັດສະດຸກໍ່ສ້າງ; ພັດທະນາຂະແໜງທ່ອງທ່ຽວໃຫ້ກາຍເປັນຂະແໜງເສດຖະກິດສີຂຽວ, ເປັນຂະແໜງເສດຖະກິດປາຍແຫຼມ, ຍືນຍົງ ດ້ວຍຄຸນນະພາບ ແລະແຕກຕ່າງ, ມີສີສັນຂອງໄຕຫງວຽນ.

ທ່ານເລຂາທິການໃຫຍ່ ສະເໜີໃຫ້ແຂວງ ຕ້ອງປັບປຸງສະພາບແວດລ້ອມແຫ່ງການລົງທຶນ, ດຳເນີນທຸລະກິດໃຫ້ມີຄວາມໂປ່ງໃສ, ສະດວກ, ຄ່າໃຊ້ຈ່າຍຕ່ຳ; ຍູ້ແຮງການພັດທະນາເສດຖະກິດດີຈີຕອນ ແລະນະວັດຕະກໍາ, ປັບປຸງພື້ນຖານໂຄງລ່າງການຄົມມະນາຄົມເຊື່ອມຕໍ່ຕົວເມືອງ, ເຂດທີ່ເປັນກໍາລັງໜູນ, ເຂດວັດຖຸດິບ, ໃຈກາງເສດຖະກິດ, ພື້ນຖານໂຄງລ່າງຊົນລະປະທານ, ພື້ນຖານໂຄງລ່າງຂະແໜງອຸດສາຫະກຳ, ການບໍລິການ ແລະ ພັດທະນາການທ່ອງທ່ຽວ.

ບັນຍາກາດທີ່ການເຮັດວຽກ. ພາບ: ສໍານັກຂ່າວສານຫວຽດນາມ

ທ່ານເລຂາທິການໃຫຍ່ ຊີ້ແຈ້ງວ່າ, ຕ້ອງເພີ່ມທະວີການປັບປຸງການປ້ອງກັນຊາດ, ປ້ອງກັນຄວາມສະຫງົບ, ການພົວພັນຕ່າງປະເທດ, ຖືນີ້ແມ່ນໜ້າທີ່ສຳຄັນຍິ່ງ ແລະຈໍາເປັນ. ເຂດໄຕຫງວຽນ, ໃນນັ້ນມີແຂວງຢາລາຍ ໄດ້ຮັບການກໍານົດວ່າມີທີ່ຕັ້ງສຳຄັນຍິ່ງທາງດ້ານປ້ອງກັນຊາດ, ປ້ອງກັນຄວາມສະຫງົບ, ຄວນຕິດພັນການພັດທະນາເສດຖະກິດກັບການຮັບປະກັນການປ້ອງກັນຊາດ, ປ້ອງກັນຄວາມສະຫງົບຢ່າງແໜ້ນແຟ້ນ, ປົກປັກຮັກສາອະທິປະໄຕ, ຜືນແຜ່ນດິນຂອງຊາດ, ຄວາມໝັ້ນຄົງຢູ່ເຂດຊາຍແດນ, ສະກັດກັ້ນການແຊກຊຶມ, ການຄ້າເຖື່ອນ, ອາດຊະຍາກຳຂ້າມຊາຍແດນຢ່າງມີປະສິດທິຜົນ. ເປັນເຈົ້າການກໍາແໜ້ນສະພາບການ, ຍົກສູງສະຕິລະວັງຕົວຕໍ່ກົນອຸບາຍທໍາລາຍຂອງອິດທິກຳລັງປໍລະປັກ, ປະຕິການ; ເພີ່ມທະວີການປົກປັກຮັກສາຄວາມໝັ້ນຄົງດ້ານການເມືອງພາຍໃນ, ຄວາມໝັ້ນຄົງທາງສາສະໜາ, ຄວາມໝັ້ນຄົງດ້ານເສດຖະກິດ, ຄວາມໝັ້ນຄົງທາງເຄືອຂ່າຍອິນເຕີແນັດ, ປົກປັກຮັກສາຄວາມລັບຂອງລັດ. ແຂວງ ຄວນສືບຕໍ່ຮັກສາການພົວພັນອັນດີງາມກັບບັນດາແຂວງຕິດກັບຊາຍແດນ ເພື່ອປະກອບສ່ວນກໍ່ສ້າງພື້ນຖານເສດຖະກິດຢູ່ເຂດຊາຍແດນ ແລະກໍ່ສ້າງສາຍພົວພັນຖານບ້ານໃກ້ເຮືອນຄຽງສັນຕິພາບ,  ມິດຕະພາບ ແລະພັດທະນາ.

ທ່ານ ໂຕເລິມ ເລຂາທິການໃຫຍ່ ມອບໂຄງການກໍ່ສ້າງສຸກສາລາ ໃຫ້ຕາແສງ ກລາ (ເມືອງດັກດວາ, ແຂວງຢາລາຍ). ພາບ: ສໍານັກຂ່າວສານຫວຽດນາມ

ເນື່ອງໃນໂອກາດນີ້, ທ່ານ ໂຕເລິມ  ໄດ້ມອບໂຄງການກໍ່ສ້າງສຸກສາລາທີ່ມີມູນຄ່າ 5 ຕື້ດົ່ງ ໃຫ້ແກ່ຕາແສງ ກລາ (ເມືອງດັກ ດວາ, ແຂວງຢາລາຍ) ເພື່ອແນໃສ່ຍົກສູງຄຸນນະພາບການເບິ່ງແຍງດູແລສຸຂະພາບຂອງປະຊາຊົນ.

* ໃນວັນດຽວກັນ, ທ່ານ ໂຕເລິມ ເລຂາທິການໃຫຍ່, ເລຂາຄະນະພັກການທະຫານສູນກາງ ໄດ້ນຳໜ້າຄະນະປະຕິບັດງານສູນກາງ ລົງຢ້ຽມຢາມ ແລະ ເຮັດວຽກຢູ່ກອງພົນໃຫຍ່ 34 ແລະ ແມ່ທັບນ້ອຍ 15.

ທ່ານ ໂຕເລິມ ເລຂາທິການໃຫຍ່ ກວດແຖວກຽດຕິຍົດກອງພົນໃຫຍ່ 34. ພາບ: qdnd.vn

ກ່າວຄຳເຫັນຊີ້ນໍາທີ່ການເຮັດວຽກກັບກອງພົນໃຫຍ່ 34, ທ່ານເລຂາທິການໃຫຍ່ ໄດ້ສະແດງຄວາມເຫັນດີຕໍ່ກັບບາງໜ້າທີ່ວຽກງານ ແລະມາດຕະການແກ້ໄຂທີ່ຄະນະພັກ, ກອງບັນຊາການກອງພົນໃຫຍ່ 34 ໄດ້ກໍານົດໄວ້ ແລະຮຽກຮ້ອງວ່າ ໃນໄລຍະຈະມາເຖິງ ທາງກົມກອງຕ້ອງຊາບຊຶມ, ກໍາແໜ້ນທັດສະນະ, ແນວທາງ, ນະໂຍບາຍຂອງພັກ, ລັດກ່ຽວກັບການທະຫານ, ການປ້ອງກັນຊາດ. ກໍ່ສ້າງກອງພົນໃຫຍ່ ຍອດຢ້ຽມ, ກະທັດຮັດ, ເຂັ້ມແຂງ, ກ້າວຂຶ້ນທັນສະໄໝ, ມີກຳລັງແຮງສັງລວມ ແລະຄວາມສາມາດກຽມພ້ອມສູ້ຮົບສູງ, ຕອບສະໜອງຄວາມຮຽກຮ້ອງຕ້ອງການຂອງໜ້າທີ່ເປັນກຳລັງເຄື່ອນຖີ່ຍຸດທະສາດ ຂອງກອງທັບປະຊາຊົນຫວຽດນາມ.

ທ່ານ ໂຕເລິມ ເລຂາທິການໃຫຍ່ ມອບຂອງຂວັນໃຫ້ກອງພົນໃຫ່ 34. ພາບ: qdnd.vn

* ທີ່ແມ່ທັບນ້ອຍ 15, ທ່ານ ໂຕເລິມ ໄດ້ສະເໜີໃຫ້ແມ່ທັບນ້ອຍ 15 ສືບຕໍ່ເອົາໃຈໃສ່ຢ່າງເລິກເຊິ່ງກ່ຽວກັບທັດສະນະ, ແນວທາງການທະຫານ, ການປ້ອງກັນຊາດຂອງພັກ; ປະຕິບັດພາລະບົດບາດເປັນກອງທະຫານສູ້ຮົບ, ກອງທະຫານປະຕິບັດງານ ແລະກອງທະຫານອອກແຮງງານທຳການຜະລິດໃນຍຸກໃໝ່. ປັບປຸງຄວາມສາມາດຄຸ້ມຄອງ, ຊີ້ນຳ, ບໍລິຫານການເຄື່ອນໄຫວການຜະລິດ ແລະດຳເນີນທຸລະກິດຮັບປະກັນໃຫ້ມີປະສິດທິຜົນ ແລະການພັດທະນາແບບຍືນຍົງ; ເອົາໃຈໃສ່ເຖິງສ້າງວຽກເຮັດງານທຳ ແລະ ເພີ່ມລາຍຮັບໃຫ້ແກ່ພະນັກງານ, ນັກຮົບ, ຜູ້ອອກແຮງງານ ແລະ ປະຊາຊົນໃນບໍລິເວນ. ຊາບຊຶມ ແລະ ປະຕິບັດຄຳສັ່ງອົບຮົມຫັດແອບ, ກຽມພ້ອມສູ້ຮົບຢ່າງເຂັ້ມງວດ, ຍົກສູງຄຸນນະພາບການອົບຮົມຫັດແອບ, ຝຶກຊ້ອມ, ປ້ອງກັນ ແລະຕ້ານໄພທຳມະຊາດ, ຊອກຫາ ແລະກູ້ໄພກູ້ຊີບ. ສົມທົບກັນຢ່າງແໜ້ນແຟ້ນກັບຄະນະພັກ, ອຳນາດການປົກຄອງ ແລະປະຊາຊົນບັນດາເຜົ່າໃນບໍລິເວນ ຕັ້ງໜ້າເຂົ້າຮ່ວມການພັດທະນາເສດຖະກິດ, ວັດທະນະທຳ ແລະສັງຄົມ; ກໍ່ສ້າງຮາກຖານການເມືອງ ຢູ່ທ້ອງຖິ່ນໃຫ້ໝັ້ນຄົງເຂັ້ມແຂງ, ປະກອບສ່ວນກໍ່ສ້າງພື້ນຖານປ້ອງກັນຊາດທົ່ວປວງຊົນຕິດພັນກັບພື້ນຖານປ້ອງກັນຄວາມສະຫງົບປະຊາຊົນ, ທ່າສະໜາມປ້ອງກັນຊາດທົ່ວປວງຊົນ ຕິດພັນກັບທ່າສະໜາມປ້ອງກັນຄວາມສະຫງົບປະຊາຊົນ ໃຫ້ໝັ້ນຄົງເຂັ້ມແຂງ...

ທ່ານ ໂຕເລິມ ເລຂາທິການໃຫຍ່ ມອບຂອງຂວັນໃຫ້ເຈົ້າກົກເຈົ້າເຫຼົ່າ, ຜູ້ທີ່ມີອິດທິພົນຊື່ສຽງ. ພາບ: qdnd.vn

ໃນບັນຍາກາດຟົດຟື້ນມ່ວນຊື່ນໃນຊຸມວັນຕົ້ນປີ 2025, ທ່ານ ໂຕເລິມ ໄດ້ມອບຂອງຂວັນ ແລະສ່ົງຄໍາອວຍພອນປີໃໝ່ໃຫ້ພະນັກງານ, ນັກຮົບ, ຜູ້ອອກແຮງງານຂອງກອງພົນໃຫຍ່ 34 ແລະແມ່ທັບນ້ອຍ 15 ຈົ່ງມີສຸຂະພາບເຂັ້ມແຂງ, ມີຄວາມຜາສຸກ, ປີໃໝ່ຍາດເອົາໄຊຊະນະໃໝ່; ມອບຂອງຂວັນໃຫ້ຄອບຄົວນະໂຍບາຍ, ຜູ້ທີ່ມີຄຸນງາມຄວາມດີ, ເຈົ້າກົກເຈົ້າເຫຼົ່າ, ຜູ້ທີ່ມີອິດທິພົນຊື່ສຽງ.

ໂດຍ: ທູຈາງ