ວິທະຍາສາດ - ເຕັກໂນໂລຢີ ແລະນະວັດຕະກຳ ແມ່ນການເລືອກເຟັ້ນຍຸດທະສາດຂອງຫວຽດນາມ

ທ່ານ ຟ້າມມິງຈິງ ນາຍົກລັດຖະມົນຕີຫວຽດນາມ ຕ້ອນຮັບທ່ານ Amandeep Singh Gill, ຮອງເລຂາທິການໃຫຍ່ ສປຊ ຮັບຜິດຊອບດ້ານເຕັກໂນໂລຢີດີຈີຕອນ ແລະເຕັກໂນໂລຢີທີ່ຫາກໍ່ພົ້ນເດັ່ນ ພ້ອມທັງເປັນທູດພິເສດຂອງທ່ານເລຂາທິການໃຫຍ່ ສປຊ ຮັບຜິດຊອບດ້ານເຕັກໂນໂລຢີ. ພາບ: ສໍານັກຂ່າວສານຫວຽດນາມ

ທີ່ການພົບປະ, ທ່ານນາຍົກລັດຖະມົນຕີ ໃຫ້ຮູ້ວ່າ ຫວຽດນາມ ຖື ວິທະຍາສາດ - ເຕັກໂນໂລຢີ ແລະນະວັດຕະກຳ ແມ່ນການເລືອກເຟັ້ນຍຸດທະສາດ, ແມ່ນບຸລິມະສິດແຖວໜ້າ. ໃນນັ້ນ, ຂົງເຂດຫັນເປັນດີຈີຕອນ, ຂໍ້ມູນໃຫຍ່, ອິນເຕີເນັດຊັບພະສິ່ງ, cloud computing, ພະລັງງານສະອາດ, ວັດຖຸດິບໃໝ່... ແມ່ນກຳລັງໜູນໃໝ່ເພື່ອພັດທະນາປະເທດຊາດ; ສູ້ຊົນບັນລຸລະດັບເຕີບໂຕໃຫ້ໄດ້ 8% ໃນປີ 2025 ແລະເພີ່ມຂຶ້ນເປັນສອງຕົວເລກໃນຊຸມປີຕໍ່ໄປ, ເພື່ອນຳຫວຽດນາມ ບັນລຸເປົ້າໝາຍກາຍເປັນປະເທດອຸດສາຫະກຳທັນສະໄໝໃນປີ 2030 ແລະມີລາຍຮັບສູງໃນປີ 2045. ທ່ານນາຍົກລັດຖະມົນຕີ ຊົມເຊີຍບັນດາຄຳໝັ້ນສັນຍາຂອງ ສປຊ ໃນການຊຸກຍູ້ການຮ່ວມມືສາກົນດ້ານເຕັກໂນໂລຢີ, ພິເສດແມ່ນໃນບັນດາຂົງເຂດ, ຄື: ປັນຍາປະດິດ (AI), ການຫັນເປັນດີຈີຕອນ ແລະນະວັດຕະກຳ.

ທ່ານ ຟ້າມມິງຈິງ ນາຍົກລັດຖະມົນຕີຫວຽດນາມ ແລະທ່ານ Amandeep Singh Gill ຮອງເລຂາທິການໃຫຍ່ ສປຊ ຮັບຜິດຊອບດ້ານເຕັກໂນໂລຢີດີຈີຕອນ ແລະເຕັກໂນໂລຢີທີ່ຫາກໍ່ພົ້ນເດັ່ນ ພ້ອມທັງເປັນທູດພິເສດຂອງທ່ານເລຂາທິການໃຫຍ່ ສປຊ ຮັບຜິດຊອບດ້ານເຕັກໂນໂລຢີ. ພາບ: ສໍານັກຂ່າວສານຫວຽດນາມ

ສ່ວນທ່ານ Amandeep Singh Gill ຕີລາຄາສູງບົດບາດນັບມື້ນັບໃຫຍ່ຂຶ້ນຂອງຫວຽດນາມ ໃນການພັດທະນາວິທະຍາສາດເຕັກໂນໂລຢີ, ນະວັດຕະກໍາ, ໃນນັ້ນມີຂົງເຂດ AI. ທ່ານ Amandeep Singh Gill ຖືວ່າ ເຕັກໂນໂລຢີດີຈີຕອນແມ່ນໂອກາດໃຫຍ່ເພື່ອໃຫ້ແຕ່ລະປະເທດກ້າວກະໂດດຂັ້ນ, ໃນນັ້ນ ຫວຽດນາມ ແມ່ນປະເທດທີ່ພົ້ນເດັ່ນ. ໃນໄລຍະຈະມາເຖິງ, ສປຊ ຫວັງວ່າ ຫວຽດນາມ ຈະຕັ້ງໜ້າເຂົ້າຮ່ວມການຊຸກຍູ້ການຮ່ວມມື ແລະເພີ່ມທະວີຄວາມສາມັກຄີໃນການພັດທະນາເຕັກໂນໂລຢີ; ສຸມໃສ່ການຜັນຂະຫຍາຍ, ການບໍລິຫານ, ການຮ່ວມມືສາກົນກ່ຽວກັບ AI; ສົ່ງເສີມວິສາຫະກິດເຕັກໂນໂລຢີຂອງຫວຽດນາມ ບໍ່ພຽງແຕ່ຊຸກຍູ້ການພັດທະນາເສດຖະກິດ-ສັງຄົມຢູ່ພາຍໃນປະເທດເທົ່ານັ້ນ ຫາກຍັງເຂົ້າຮ່ວມການແກ້ໄຂບັນຫາທົ່ວໂລກ, ເປັນຕົ້ນແມ່ນບັນດາປະເທດພວມພັດທະນາ, ຊຸກຍູ້ການຮ່ວມມືໃຕ້-ໃຕ້.

ໂດຍ: ເຈິ່ນຮວ່ຽນ