ການຮ່ວມມືສອງຝ່າຍ ຫວຽດນາມ - ລາວ ພັດທະນາໃນຫຼາຍຂົງເຂດຢ່າງຕັ້ງໜ້າ

ທີ່ການພົບປະກັບທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ, ທ່ານ ບຸ່ຍແທງເຊີນ ໄດ້ຊົມເຊີຍຜົນງານອັນສຳຄັນຂອງລາວ; ເຊື່ອໝັ້ນວ່າ ລາວ ຈະຈັດຕັ້ງກອງປະຊຸມໃຫຍ່ຂອງພັກທຸກຂັ້ນປະສົບຜົນສຳເລັດ, ມຸ່ງໄປເຖິງກອງປະຊຸມໃຫຍ່ຂອງພັກທົ່ວປະເທດ ຄັ້ງທີ 12, ສືບຕໍ່ສ້າງສາປະເທດລາວ ໃຫ້ຮັ່ງມີເຂັ້ມແຂງ, ວັດທະນາຖາວອນ, ມີຖານະສູງຂຶ້ນຕື່ມໃນພາກພື້ນ ແລະເວທີສາກົນ; ໄດ້ສະແດງຄວາມປີຕິຊົມຊື່ນຕໍ່ການຮ່ວມມືສອງຝ່າຍທີ່ພັດທະນາໃນຫຼາຍຂົງເຂດຢ່າງຕັ້ງໜ້າ, ສະແດງໃຫ້ເຫັນຜ່ານການພົບປະຂອງທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ແລະທ່ານ ໂຕເລິມ ເລຂາທິການໃຫຍ່, ການພົບປະລະຫວ່າງສອງກົມການເມືອງ ກໍຄືການພົບປະຂອງການນຳຂັ້ນສູງຂອງສອງປະເທດ.

ທ່ານ ບຸ່ຍແທງເຊີນ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ ພົບປະກັບທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ. ພາບ: ສໍານັກຂ່າວສານຫວຽດນາມ

ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ໄດ້ຕີລາຄາສູງໝາກຜົນການຮ່ວມມືລະຫວ່າງສອງປະເທດໃນໄລຍະຜ່ານມາ; ສະເໜີໃຫ້ສອງປະເທດຕັ້ງໜ້າແລກປ່ຽນຂໍ້ມູນຂ່າວສານ, ແບ່ງປັນບົດຮຽນໃນການກະກຽມໃຫ້ແກ່ກອງປະຊຸມໃຫຍ່ຂອງພັກທົ່ວປະເທດຂອງແຕ່ລະປະເທດ, ກ່ຽວກັບວຽກງານກໍ່ສ້າງພັກ, ກໍ່ສ້າງລະບົບການເມືອງ, ການຄຸ້ມຄອງເສດຖະກິດ - ສັງຄົມ, ເຊື່ອມໂຍງເຂົ້າກັບສາກົນ ແລະມາດຕະການປະຕິບັດມະຕິກອງປະຊຸມໃຫຍ່ຂອງແຕ່ລະພັກໃນໄລຍະຈະມາເຖິງ; ສະແດງຄວາມປິຕິຊົມຊື່ນເມື່ອຄວາມຫຍຸ້ງຍາກ, ຂໍ້ຕິດຄັດຂອງບາງໂຄງການຈຸດສຸມໄດ້, ກໍາລັງ ແລະຈະແກ້ໄຂຢ່າງເດັດຂາດໂດຍໄວ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງລາວ ແລະການພົວພັນລະຫວ່າງສອງປະເທດຢ່າງຕັ້ງໜ້າ.

*ທີ່ການພົບປະກັບທ່ານ ສອນໄຊ ສີພັນດອນ ນາຍົກລັດຖະມົນຕີ, ທ່ານ ບຸ່ຍແທງເຊີນ ໄດ້ຊົມເຊີຍ ສປປ ລາວ ທີ່ສຳເລັດໜ້າທີ່ເປັນປະທານອາຊຽນ ໃນປີ 2024; ຢືນຢັນວ່າ ກະຊວງການຕ່າງປະເທດຂອງ 2 ປະເທດຈະມານະພະຍາຍາມສົມທົບກັບບັນດາກະຊວງ, ຂະແໜງການຂອງ 2 ຝ່າຍສືບຕໍ່ປະຕິບັດບັນດາຂໍ້ຕົກລົງ, ລາຍການ ແລະໂຄງການຮ່ວມມືລະຫວ່າງ ຫວຽດນາມ - ລາວ ເປັນຢ່າງດີ, ພ້ອມທັງຕັ້ງໜ້າກະກຽມໃຫ້ແກ່ບັນດາການເຄື່ອນໄຫວພົວພັນຕ່າງປະເທດສໍາຄັນຂອງສອງປະເທດໃນໄລຍະຈະມາເຖິງ.

ທ່ານ ບຸ່ຍແທງເຊີນ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ ພົບປະກັບທ່ານ ສອນໄຊ ສີພັນດອນ ນາຍົກລັດຖະມົນຕີລາວ. ພາບ: ສໍານັກຂ່າວສານຫວຽດນາມ

ທ່ານ ສອນໄຊ ສີພັນດອນ ຢືນຢັນວ່າ ພັກ, ລັດ, ລັດຖະບານ ແລະປະຊາຊົນລາວ ຍາມໃດກໍ່ຖືເປັນສຳຄັນ ແລະໃຫ້ບຸລິມະສິດສູງສຸດເພື່ອປັບປຸງ, ເພີ່ມທະວີການພົວພັນອັນດີງາມ, ຄວາມສາມັກຄີແບບພິເສດ ແລະການຮ່ວມມືຮອບດ້ານກັບຫວຽດນາມ; ເນັ້ນໜັກເຖິງຄວາມໄວ້ເນື້ອເຊື່ອໃຈທາງດ້ານການເມືອງສູງໃນຂະນະທີ່ນາຍົກລັດຖະມົນຕີສອງທ່ານມີຫຼາຍການພົບປະສອງຝ່າຍໃນປີ 2024.

ໂດຍ: ຈາງຫງວຽນ