ຕອນບ່າຍວັນທີ 13 ທັນວາ, ຢູ່ສຳນັກງານກະຊວງການຕ່າງປະເທດ, ຮ່າໂນ້ຍ, ທ່ານນາງ ຫງວຽນມິງຮັ່ງ ຮອງລັດຖະມົນຕີການຕ່າງປະເທດ ແລະທ່ານ Samee Essa Johar Hayat ຜູ້ຊ່ວຍວຽກລັດຖະມົນຕີກະຊວງການຕ່າງປະເທດກູເວດ ຮັບຜິດຊອບອາຊີໄດ້ເປັນປະທານຮ່ວມກອງປະຊຸມປຶກສາຫາລືການເມືອງ ຄັ້ງທີ 4 ລະຫວ່າງກະຊວງການຕ່າງປະເທດຂອງສອງປະເທດ.

leftcenterrightdel
ທ່ານນາງ ຫງວຽນມິງຮັ່ງ ຮອງລັດຖະມົນຕີການຕ່າງປະເທດຫວຽດນາມ ແລະທ່ານ Samee Essa Johar Hayat ຜູ້ຊ່ວຍວຽກລັດຖະມົນຕີກະຊວງການຕ່າງປະເທດກູເວດ ຮັບຜິດຊອບອາຊີທີ່ກອງປະຊຸມປຶກສາຫາລືດ້ານເມືອງ. ພາບ: ສໍານັກຂ່າວສານຫວຽດນາມ

ທີ່ກອງປະຊຸມ, ສອງຝ່າຍໄດ້ເຫັນດີເປັນເອກະພາບບັນດາມາດຕະການເພີ່ມທະວີການພົວພັນຮ່ວມມືໃນໄລຍະຈະມາເຖິງ, ໃນນັ້ນໃຫ້ບຸລິມະສິດຊຸກຍູ້ການພົວພັນແລກປ່ຽນຄະນະຜູ້ແທນທຸກຂັ້ນ, ໂດຍສະເພາະແມ່ນບັນດາຄະນະຜູ້ແທນຂັ້ນສູງ ແລະເພີ່ມທະວີການພົວພັນແລກປ່ຽນປະຊາຊົນ, ພິເສດແມ່ນລະຫວ່າງຊາວໜຸ່ມສອງປະເທດ; ເນັ້ນໜັກເຖິງບຸລິມະສິດເພີ່ມທະວີການຮ່ວມມືດ້ານເສດຖະກິດ, ການຄ້າ.

ທ່ານນາງ ຫງວຽນມິງຮັ່ງ ສະເໜີໃຫ້ຊຸກຍູ້ການຮ່ວມມືໃນການແລກປ່ຽນປະສົບການ, ການຮັບຮູ້ເຊິ່ງກັນ ແລະກັນ ແລະການລົງທຶນຜະລິດບັນດາຜະລິດຕະພັນ Halal ເພື່ອເພີ່ມທະວີການສົ່ງອອກຂອງຫວຽດນາມ ໄປຍັງກູເວດ ແລະຕະຫຼາດພາກພື້ນ; ຊຸກຍູ້ການດຶງດູດການລົງທຶນ, ພິເສດແມ່ນຈາກອົງການລົງທຶນແຫ່ງຊາດກູເວດ (KIA) ເຂົ້າຫວຽດນາມ, ຍົກສູງປະສິດທິຜົນຂອງໂຄງການ ງີເຊີນ (ແທັງຮ໊ວາ).

ຄຽງຂ້າງກັນນັ້ນ, ສອງຝ່າຍໄດ້ເຫັນດີເພີ່ມທະວີການຮ່ວມມືໃນຂົງເຂດທີ່ມີຄວາມສາມາດບົ່ມຊ້ອນອື່ນ, ເຊັ່ນ: ຄວາມໝັ້ນຄົງດ້ານສະບຽງອາຫານ, ການທ່ອງທ່ຽວ, ແຮງງານ, ການບິນ..., ຊຸກຍູ້ການເຈລະຈາ ແລະເຊັນເອກະສານຮ່ວມມືເພື່ອສ້າງກອບນິຕິກໍາໃຫ້ແກ່ການຮ່ວມມືສອງຝ່າຍໃຫ້ສຳເລັດ. ທ່ານນາງ ຫງວຽນມິງຮັ່ງ ສະເໜີໃຫ້ ກູເວດ ພິຈາລະນາເພີ່ມທຶນການສຶກສາໃຫ້ນັກສຶກສາຫວຽດນາມ, ຂອບໃຈກູເວດ ທີ່ໄດ້ສະໜອງ ODA ໃຫ້ບັນດາໂຄງການພັດທະນາຢູ່ຫວຽດນາມ ໃນໄລຍະຜ່ານມາ ແລະສະເໜີໃຫ້ 2 ຝ່າຍສົມທົບກັນຢ່າງແໜ້ນແຟ້ນເພື່ອຜັນຂະຫຍາຍບັນດາໂຄງການຮ່ວມມື ODA ໃນໄລຍະຈະມາເຖິງໃຫ້ມີປະສິດທິຜົນ.

ໂດຍ: ໄຊນີດາ