ປະຊາກອນໃນນະຄອນຫຼວງປັກກິງ ຫຼຸດລົງເປັນເທື່ອທຳອິດ
ປະຊາກອນໃນນະຄອນຫຼວງປັກກິງ ຂອງຈີນ ໄດ້ຫຼຸດລົງເປັນເທື່ອທຳອິດໃນປີ 2017 ແລະອັດຕາສ່ວນການເກີດ ຍັງຄົງຢູ່ໃນລະດັບຕ່ຳ ເຖິງວ່າໃນປີ 2016 ລັດຖະບານຈີນ ໄດ້ປະກາດໃຊ້ນະໂຍບາຍເກີດລູກ 2 ຄົນ ໄປແລ້ວກໍ່ຕາມ.
ປຶ້ມປົກຂຽວກ່ຽວກັບ “ບົດລາຍງານການພັດທະນາ ແລະຄົ້ນຄວ້າປະຊາກອນປັກກິງ ປີ 2018” ໂດຍແມ່ນສະຖາບັນຄົ້ນຄວ້າກ່ຽວກັບປະຊາກອນປັກກິງ ນຳອອກມາເປີດເຜີຍເມື່ອວັນທີ 10 ທັນວານີ້ ໃຫ້ຮູ້ວ່າຈຳນວນປະຊາກອນທີ່ອາໃສຢູ່ເປັນປະຈຳໃນປັກກິງ ພາຍໃນປີ 2017 ຢູ່ທີ່ 21,7 ລ້ານຄົນ ຫຼຸດລົງ 22.000 ຄົນ ເມື່ອທຽບໃສ່ປີ 2016. ໃນນັ້ນຈຳນວນປະຊາຊົນຕ່າງແຂວງທີ່ອາໃສຢູ່ໃນປັກກິງ ໄດ້ຫຼຸດລົງ 132.000 ຄົນ ມາຍັງເຫຼືອທີ່ 7,9 ລ້ານຄົນ ໃນຂະນະທີ່ຈຳນວນປະຊາຊົນທີ່ອາໄສໄດ້ຂຶ້ນທະບຽນສຳມະໂນຄົວປະຈຳ ກໍ່ຫຼຸດລົງ 37.000 ຄົນ ມາຍັງເຫຼືອທີ່ 13,6 ລ້ານຄົນ.
ຄຽງຄູ່ກັນນັ້ນ ປຶ້ມປົກຂຽວດັ່ງກ່າວໄດ້ຊີ້ແຈງວ່າ ອັດຕາສ່ວນການເກີດຢູ່ໃນນະຄອນຫຼວງປັກກິງ ໄດ້ເພີ່ມຂຶ້ນຈາກ 7,96/1.000 ໃນປີ 2015 ເປັນ 9,06/1.000 ໃນປີ 2017 ແຕ່ກໍ່ຍັງຄົງຕ່ຳຢູ່ຫຼາຍ.
ໃນຂະນະດຽວກັນປຶ້ມປົກຂຽວດັ່ງກ່າວກໍ່ແຈ້ງເຕືອນວ່າບັນຫາຄົນຊະລາຢູ່ໃນປະຊາກອນຂອງປັກກິງ ນັບມື້ນັບຮ້າຍແຮງຂຶ້ນໂດຍທີ່ປະລິມານປະຊາຊົນທີ່ອາໃສຢູ່ທີ່ນັ້ນໃນໄວແຕ່ 65 ປີຂຶ້ນເມືອໄດ້ເພີ່ມຂຶ້ນຈາກ 1,7 ລ້ານຄົນ ໃນປີ 2010 ເປັນ 2,4 ລ້ານຄົນ ໃນປີ 2017.
ຂ່າວ: ວຽງຈັນໃໝ່