ໄຂກອງປະຊຸມສຸດຍອດ NATO
ກປ.ອອນໄລ - ໃນວັນທີ 11 ກໍລະກົດ, ການນໍາ 29 ປະເທດສະມາຊິກອົງການສົນທິ ສັນຍາປ້ອງກັນອັດລັງຕິກເໜືອ (NATO) ພ້ອມກັບບັນດາຄູ່ຮ່ວມມື ໄດ້ໄຂກອງປະຊຸມສຸດຍອດທີ່ສໍານັກງານໃໝ່ຂອງອົງການຢູ່ ບຣຸກແຊນ, ແບນຊິກ.
ບັນດາການນໍາຈະຮ່ວມກັນປຶກສາຫາລືເພື່ອຍົກອອກຂໍ້ຕົກລົງກ່ຽວກັບເລື່ອງເພີ່ມຄວາມສາມາດນາບຂູ່ ແລະກຳລັງຄວາມສາມາດດ້ານປ້ອງກັນຊາດຂອງ NATO, ຍູ້ແຮງການຕໍ່ສູ້ຕ້ານພວກກໍ່ການຮ້າຍ ແລະຮຽກຮ້ອງໃຫ້ແບ່ງປັນຄວາມໜັກໜ່ວງກ່ຽວກັບລາຍຈ່າຍງົບປະມານປ້ອງກັນຊາດໃຫ້ສົມດູນກວ່າ.
ຕາມນັກຂ່າວສໍານັກຂ່າວສານຫວຽດນາມ ປະຈໍາ ບຣຸກແຊນ ແລ້ວ, ໃນມື້ເຮັດວຽກທໍາອິດ, ບັນດາການນໍາຈະສຸມໃສ່ເຂົ້າໃນບັນດາເນື້ອໃນເພີ່ມລາຍຈ່າຍ ແລະແບ່ງປັນຄວາມໜັກໜ່ວງດ້ານການເງິນລະຫວ່າງບັນດາປະເທດສະມາຊິກ.
|
|
ການນໍາບັນດາປະເທດສະມາຊິກ NATO ຖ່າຍຮູບລວມທີ່ກອງປະຊຸມສຸດຍອດ NATO ໃນວັນທີ 11 ກໍລະກົດ. ພາບ: ສໍານັກຂ່າວສານຫວຽດນາມ. |
ບັນດາການນໍາກໍ່ຈະຕົກລົງເພີ່ມທະວີບົດບາດຂອງ NATO ໃນການຕໍ່ສູ້ຕ້ານພວກກໍ່ການຮ້າຍ. ພ້ອມກັນນັ້ນ, NATO ກໍ່ຕ້ອງກໍານົດເລື່ອງເປີດລາຍການບໍາລຸງສ້າງໃໝ່ຢູ່ ອີຣັກ ດ້ວຍນັກຊ່ຽວຊານຝຶກແອບຫຼາຍຮ້ອຍຄົນຂອງອົງການ NATO. ບັນດາສໍາພັນທະມິດກໍ່ຈະເຫັນດີເຫັນພ້ອມກ່ຽວກັບແຜນນະໂຍບາຍເພີ່ມທະວີການສະໜັບສະໜູນໃຫ້ບັນດາຄູ່ຮ່ວມມືຕົ້ນຕໍຢູ່ຕາເວັນອອກກາງ ແລະອາຟະລິກາເໜືອ, ໃນນັ້ນມີ ຕູນີເຊຍ ແລະ ຈໍແດນ.
ກອງປະຊຸມສຸດຍອດຄັ້ງທີ 7 ນີ້ໄດ້ຈັດຕັ້ງຢູ່ ບຣຸກແຊນ. ເຂົ້າຮ່ວມມີ 54 ຄະນະຜູ້ແທນທາງການ, ເຊິ່ງລວມມີ 29 ປະເທດສະມາຊິກ, 20 ປະເທດຄູ່ຮ່ວມມືພ້ອມກັບບາງອົງການຈັດຕັ້ງສາກົນຄື: ສະຫະປະຊາຊາດ, ອີຢູ, ທະນາຄານໂລກ (WB) ແລະສະພາລັດຖະສະພາ NATO.
ແປໂດຍ: ເກື່ອງດັ້ງ