ພິທີໄຂ “ງານບຸນເຕະບານ ໃຫຍ່ທີ່ສຸດໃນໂລກ”

ພິທີໄຂ “ງານບຸນເຕະບານ ໃຫຍ່ທີ່ສຸດໃນໂລກ” - World Cup 2018

15 ມິຖຸນາ 2018 18:59

ກປ.ອອນໄລ - ຕອນຄໍ່າວັນທີ 14 ມິຖຸນາ, ພິທີໄຂການແຂ່ງຂັນເຕະບານໂລກ 2018 ຮອບສຸດທ້າຍ 2018 (World Cup 2018) ໄດ້ດໍາເນີນທີ່ສະໜາມກິລາ Luzhniki ຢູ່ນະຄອນຫຼວງ ມົດສກູ, ລັດເຊຍ, ເປີດສາກໃຫ້ການແຂ່ງຂັນ 64 ນັດທີ່ງານບຸນເຕະບານໃຫຍ່ທີ່ສຸດໃນໂລກ.

ພິທີໄຂໄດ້ຮັບການຖ່າຍທອດສົດທາງໂທລະພາບກວ່າ 200 ປະເທດ ແລະເຂດແຄ້ວນ, ດ້ວຍຈຳນວນຜູ້ຊົມຄາດຄະເນວ່າຈະຂຶ້ນເຖິງ 3,6 ຕື້ເທື່ອຄົນ.

ພິທີໄຂ ໄດ້ເປີດຂຶ້ນ ເມື່ອຂັນຄໍາຖືກນໍາມາສະໜາມກິລາ Luzhniki ໂດຍອະດີດຫົວໜ້າທີມ ແອັດສະປາຍ Iker Casillas ແລະນາງແບບ Natalia Vodianova. ຕໍ່ຈາກນັ້ນແມ່ນການປະກົດຕົວຂອງນັກບານເຕະ Ronaldo (ທີມ ບຣາຊີນ).

ບັນດາລາຍການດົນຕີໄດ້ເປີດສາກດ້ວຍການຮ້ອງເພງຂອງນັກຮ້ອງ Robbie Williams ແລະນັກຮ້ອງ Aida Garifullina. ຜູ້ຊົມກວ່າ 80 ພັນຄົນຢູ່ສະໜາມກິລາ Luzhniki ດ້ວຍສີສັນຫຼາກຫຼາຍ, ພ້ອມກັນມ່ວນຊື່ນສະໜຸກສະໜານກັບບັນດາລາຍການສະແດງທີ່ຟົດຟື້ນ.

“Live It Up” ແມ່ນບົດເພງທາງການຂອງ World Cup 2018 ເຊິ່ງໄດ້ຂັບຮ້ອງເປັນສອງພາສາ ອັງກິດ ແລະ ແອັດສະປາຍ, ດ້ວຍການສະແດງຂອງນັກຮ້ອງ 3 ຄົນ ແມ່ນ Will Smith, Nicky Jam ແລະ Era Istrefi.

ພິທີໄຂໄດ້ສິ້ນສຸດດ້ວຍບົດກ່າວປາໄສຄໍ່ານັບຮັບຕ້ອນຂອງທ່ານປະທານາທິບໍດີລັດເຊຍ V.Putin ແລະທ່ານປະທານ FIFA Gianni Infantino.