6 ເດືອນຕົ້ນປີ 2018 ມີນັກທ່ອງທ່ຽວເຂົ້າມາທ່ຽວຊົມ ສປປ ລາວ 2 ລ້ານກວ່າເທື່ອຄົນ
ໃນບົດລາຍງານການຈັດຕັ້ງປະຕິບັດ ແລະສົ່ງເສີມປີທ່ອງທ່ຽວລາວ 2018 ເຫັນວ່າ 6 ເດືອນຕົ້ນປີ 2018 ມີຈຳນວນນັກທ່ອງທ່ຽວເຂົ້າມາທ່ຽວຊົມ ສປປ ລາວ ເຖິງ 2.126.730 ເທື່ອຄົນ ຫລື ເພີ່ມຂຶ້ນ 6% ເມື່ອທຽບໃສ່ໃນໄລຍະດຽວກັນໃນປີ 2017.
    |
 |
|
6 ເດືອນຕົ້ນປີ 2018 ມີນັກທ່ອງທ່ຽວເຂົ້າມາທ່ຽວຊົມ ສປປ ລາວ 2 ລ້ານກວ່າເທື່ອຄົນ. ພາບ: ຂປລ. |
ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະທ່ອງທ່ຽວ ໃຫ້ຮູ້ວ່າ: ໃນຕົ້ນປີ 2018 ມີຫລາຍກຸ່ມຕະຫລາດທ່ອງທ່ຽວເພີ່ມຂຶ້ນຢ່າງໂດດເດັ່ນ ເປັນຕົ້ນແມ່ນກຸ່ມຕະຫລາດອາເມລິກາ ເພີ່ມຂຶ້ນເຖິງ 16% ເປັນກຸ່ມຕະຫລາດທີ່ມີຄຸນນະພາບ ແລະຄ່າໃຊ້ຈ່າຍສູງຕໍ່ອຸດສາຫະກຳການທ່ອງທ່ຽວຂອງ ສປປ ລາວ; ສຳລັບກຸ່ມຕະຫລາດ ອາຊີປາຊີຟິກ ເພີ່ມຂຶ້ນພຽງ 6% ໃນນັ້ນກຸ່ມຕະຫລາດອາຊຽນ ມີອັດຕາຫລຸດລົງ - 3 ເຊິ່ງກວມຕະຫລາດ ເຖິງ 66% ຂອງນັກທ່ອງທ່ຽວທີ່ເຂົ້າມາທ່ຽວຊົມ ສປປ ລາວ, ໃນກຸ່ມນີ້ຕະຫລາດທີ່ສຳຄັນແມ່ນຕະຫລາດ ໄທ ກວມເອົາ 44%, ຫວຽດນາມ ກວມເອົາ 19%, ແລະຕະຫລາດອື່ນໆກວມເອົາ 37%, ພ້ອມນີ້ກຸ່ມຕະຫລາດບໍ່ແມ່ນອາຊຽນເພີ່ມຂຶ້ນເຖິງ 40% ເປັນກຸ່ມຕະຫລາດທີ່ມີຄວາມຫລາກຫລາຍໃນການທ່ອງທ່ຽວສ່ວນຫລາຍນິຍົມທ່ອງທ່ຽວຕາມເຂດເມືອງມໍລະດົກໂລກ, ຕົວເມືອງຕ່າງໆ ແລະສະຖານທີ່ທ່ອງທ່ຽວທີ່ມີການພັດທະນາແລ້ວ ເຊັ່ນ: ຕະຫລາດ ຈີນ ເພີ່ມຂຶ້ນ 50%, ສ.ເກົາຫລີ ເພີ່ມຂຶ້ນ 24%, ໃນກຸ່ມນີ້ແມ່ນມີຄວາມສົນໃຈໃນການທ່ອງທ່ຽວຕາມທຳມະຊາດ ແລະທ່ຽວຊົມວິຖີຊີວິດຂອງປະຊາຊົນລາວ ບັນດາເຜົ່າໄດ້ແກ່ກຸ່ມຕະຫລາດ ຍີ່ປຸ່ນ ເພີ່ມຂຶ້ນ 27% ແລະອົດສະຕາລີເພີ່ມຂຶ້ນ 3%.
ໃນຂະນະດຽວກັນ, ກຸ່ມຕະຫລາດ ເອີລົບ ມີອັດຕາຫລຸດລົງ - 2% ເປັນກຸ່ມນັກທ່ອງທ່ຽວມີຄຸນນະພາບສູງມີຄວາມສົນໃນການທ່ອງທ່ຽວຕາມເຂດປ່າສະຫງວນ, ທ່ຽວຊົມວັດທະນະທຳ ແລະວິຖີຊີວິດຂອງປະຊາຊົນບັນດາເຜົ່າ ແລະເປັນກຸ່ມທີ່ກະຈາຍລາຍໄດ້ໂດຍກົງໃຫ້ປະຊາຊົນໃນທ້ອງຖິ່ນ, ໃນນີ້, ຕະຫລາດຝຣັ່ງ ແມ່ນເພີ່ມຂຶ້ນໂດດເດັ່ນກວມເອົາ 11%, ສະວິດເຊີແລນ ເພີ່ມຂຶ້ນ 24%, ເນເທີແລນເພີ່ມຂຶ້ນ 12% ແລະສະວີເດັນ 43%; ພ້ອມນີ້, ກຸ່ມປະເທດອາຟຣິກາ ແລະຕາເວັນອອກກາງມີອັດຕາຫລຸດລົງ -32%.
ຂ່າວ: ຂປລ