ຕາງໜ້າການນໍາພັກ, ລັດ, ທ່ານປະທານປະເທດຫວຽດນາມ ເຈິ່ນດ້າຍກວາງ ເຂົ້າຮ່ວມບັນດາການເຄື່ອນໄຫວວັດທະນະທໍາ, ອວຍພອນປີໃໝ່ປະຊາຄົມບັນດາເຜົ່າຫວຽດນາມ.
ໃນໂອກາດຕົ້ນປີໃໝ່, ທ່ານປະທານປະເທດ ເຈິ່ນດ້າຍກວາງ ສົ່ງເຖິງພໍ່ແມ່ປະຊາຊົນບັນດາເຜົ່າ ອາລົມຈິດອັນສະໜິດສະໜົມ ແລະຄໍາອວຍພອນປີໃໝ່. ທ່ານປະທານປະເທດ ເຈິ່ນດ້າຍກວາງ ເນັ້ນໜັກວ່າ, ໃນຕະຫຼອດໄລຍະປະຫວັດສາດ, 54 ຊົນເຜົ່າອ້າຍນ້ອງໄດ້ຮ່ວມທຸກຮ່ວມສຸກຮ່ວມເປັນຮ່ວມຕາຍ, ສາມັກຄີ, ສະໜິດຕິດພັນນໍາຊົນຊາດຫວຽດນາມ ຜ່ານຜ່າສິ່ງທົດສອບນາໆປະການ, ສ້າງເປັນຄວາມສະຫງ່າອົງອາດຫວຽດນາມ, ຈິດໃຈຫວຽດນາມ, ວັດທະນະທໍາຫວຽດນາມ ແລະປະເທດຫວຽດນາມ.
|
|
ທ່ານປະທານປະເທດ ເຈິ່ນດ້າຍກວາງ ເຂົ້າຮ່ວມວັນບຸນ “ສີສັນລະດູບານໃໝ່ໃນທົ່ວທຸກແຖບຖິ່ນຂອງປະເທດຊາດ” ອວຍພອນພັກ, ອວຍພອນລະດູບານໃໝ່ປີຈໍ 2018 ແລະອວຍພອນປີໃໝ່ປະຊາຄົມບັນດາເຜົ່າຫວຽດນາມ ຢູ່ບ້ານວັດທະນະທໍາ-ທ່ອງທ່ຽວບັນດາເຜົ່າຫວຽດນາມ. ພາບ: ສໍານັກຂ່າວສານຫວຽດນາມ. |
ທ່ານປະທານປະເທດ ເຈິ່ນດ້າຍກວາງ ຕີລາຄາສູງກະຊວງວັດທະນະທໍາ, ກິລາ ແລະທ່ອງທ່ຽວ, ຄະນະຄຸ້ມຄອງບ້ານວັດທະນະທໍາ-ທ່ອງທ່ຽວບັນດາເຜົ່າຫວຽດນາມ ແລະພໍ່ແມ່ປະຊາຊົນບັນດາເຜົ່າເຄື່ອນໄຫວຢູ່ບ້ານໄດ້ມີຄວາມມານະພະຍາຍາມ, ປະກອບສ່ວນເຂົ້າໃນພາລະກິດອະນຸລັກຮັກສາ, ພັດທະນາວັດທະນະທໍາ, ຢືນຢັນພະລັງຊີວິດທີ່ຍືນຍົງຄົງຕົວຂອງບັນດາຄຸນຄ່າວັດທະນະທໍາທີ່ເປັນມູນເຊື້ອຂອງຊາດ, ເຮັດໃຫ້ບ້ານວັດທະນະທໍາ-ທ່ອງທ່ຽວກາຍເປັນສະຖານທີ່ທ່ອງທ່ຽວເທື່ອລະກ້າວ. ພິເສດ, ວັນບຸນ “ສີສັນລະດູບານໃໝ່ໃນທົ່ວທຸກແຖບຖິ່ນຂອງປະເທດຊາດ” ຜ່ານການຈັດຕັ້ງໃນແຕ່ລະປີໄດ້ຕ້ອນຮັບພໍ່ແມ່ປະຊາຊົນບັນດາເຜົ່ານັບໝື່ນເທື່ອຄົນເຂົ້າຮ່ວມກວ່າ 50 ງານບຸນ ແລະການເຄື່ອນໄຫວ. ນີ້ແມ່ນສະຖານທີ່ເຕົ້າໂຮມ, ແຜ່ຂະຫຍາຍມູນເຊື້ອວັດທະນະທໍາ, ໂດຍສະເພາະແມ່ນໃນໂອກາດບຸນປີໃໝ່ປະຈໍາຊາດ.
|
|
ທ່ານປະທານປະເທດ ເຈິ່ນດ້າຍກວາງ ກ່າວຄໍາເຫັນໃນວັນບຸນ “ສີສັນລະດູບານໃໝ່ໃນທົ່ວທຸກແຖບຖິ່ນຂອງປະເທດຊາດ” ລະດູບານໃໝ່ປີຈໍ 2018. ພາບ: ສໍານັກຂ່າວສານຫວຽດນາມ. |
ທ່ານປະທານປະເທດຫວຽດນາມ ປາດຖະໜາວ່າບັນດາເຈົ້າກົກເຈົ້າເຫຼົ່າ, ນາຍບ້ານ, ສິລະປະກອນ, ຜູ້ມີຍົດສັກຕໍາແໜ່ງສາສະໜາ, ຜູ້ມີອິດທິພົນຊື່ສຽງ ທີ່ຕາງໜ້າບັນດາເຜົ່າ, ເຂດ, ພາກ ສືບຕໍ່ຕັ້ງໜ້າໂຄສະນາເຜີຍແຜ່, ປຸກລະດົມພໍ່ແມ່ປະຊາຊົນບັນດາເຜົ່າປະຕິບັດແຜນນະໂຍບາຍ, ນະໂຍບາຍຂອງ ພັກ, ລັດ; ປະຕິບັດວຽກງານອະນຸລັກຮັກສາ, ເສີມຂະຫຍາຍຄຸນຄ່າວັດທະນະທໍາທີ່ເປັນມູນເຊື້ອຂອງຊາດ, ປະກອບສ່ວນສ້າງບ້ານເກີດເມືອງນອນ, ປະເທດຊາດໃຫ້ຮັ່ງມີເຂັ້ມແຂງ ເພື່ອໃຫ້ສີສັນລະດູບານໃໝ່, ບັນຍາກາດລະດູບານໃໝ່ແຜ່ຂະຫຍາຍໄປທົ່ວປະເທດ.
|
|
ທ່ານປະທານປະເທດ ເຈິ່ນດ້າຍກວາງ ກັບຜູ້ແທນປະຊາຄົມບັນດາເຜົ່າຫວຽດນາມ. ພາບ: ສໍານັກຂ່າວສານຫວຽດນາມ. |
ທ່ານປະທານປະເທດ ເຈິ່ນດ້າຍກວາງ ສະເໜີທຸກຂັ້ນ, ທຸກຂະແໜງການ, ອົງການຈັດຕັ້ງມະຫາຊົນແຕ່ຂັ້ນສູນກາງລົງຮອດທ້ອງຖິ່ນປະຕິບັດຕາມຄໍາສັ່ງສອນຂອງປະທານ ໂຮ່ຈິມິນ ທີ່ແສນເຄົາລົບຮັກ: “ພໍ່ແມ່ປະຊາຊົນຊາວເຜົ່າ ກິງ ຫຼື ໂຖ, ເມື່ອງ ຫຼື ມ໋ານ, ຢາຣາຍ ຫຼື ເອເດ, ເຊດັງ ຫຼື ບານາ ແລະບັນດາຊົນເຜົ່າສ່ວນໜ້ອຍອື່ນໆ, ລ້ວນແຕ່ເປັນລູກຫຼານຫວຽດນາມ, ເປັນອ້າຍນ້ອງຄີງ” ໃຫ້ດີ, ປະຕິບັດບັນດາມາດຕະການ, ວຽກງານລະອຽດ, ແທດຈິງ ເພື່ອໜູນຊ່ວຍພໍ່ແມ່ປະຊາຊົນບັນດາເຜົ່າໃນການພັດທະນາເສດຖະກິດ-ສັງຄົມ, ການສຶກສາ, ວັດທະນະທໍາ, ສາທາລະນະສຸກ...
ໃນບັນຍາກາດວັນບຸນວັດທະນະທໍາທີ່ເປັນເອກະລັກສະເພະ, ທ່ານປະທານປະເທດ ເຈິ່ນດ້າຍກວາງ ໄດ້ຕີຄ້ອງໄຂວັນບຸນ, ເຂົ້າຮ່ວມການຟ້ອນແຊມະຫາສາມັກຄີບັນດາເຜົ່າ ພ້ອມກັບປະຊາຄົມບັນດາເຜົ່າຫວຽດນາມ ທີ່ເຂົ້າຮ່ວມວັນບຸນ.
ແປໂດຍ: ຮວ່າງເຈື່ອງ