ບົດລາຍງານທີ່ກອງປະຊຸມ ໂດຍທ່ານນາງພັນເອກພິເສດ ຫງວຽນທິທູຮ່ຽນ, ຫົວໜ້າຫ້ອງການແມ່ຍິງກອງທັບ ນໍາສະເໜີໄດ້ຕີລາຄາວ່າ: ປີ 2024, ວຽກງານເພື່ອຄວາມກ້າວໜ້າຂອງແມ່ຍິງ ແລະ ຄວາມສະເໝີພາບລະຫວ່າງຍິງ-ຊາຍໃນກອງທັບ ໄດ້ຜັນຂະຫຍາຍປະຕິບັດຢ່າງຮອບດ້ານ, ມີປະສິດທິຜົນແທດຈິງ.
ຄຽງຂ້າງນັ້ນ, ສະຫະພັນແມ່ຍິງບັນດາກົມກອງ ໄດ້ປະຕິບັດບົດບາດເປັນຕົວແທນ, ເບິ່ງແຍງ, ປົກປ້ອງສິດ, ຜົນປະໂຫຍດອັນຊອບທຳຂອງແມ່ຍິງ ແລະ ເດັກນ້ອຍ. ພະນັກງານ, ສະມາຊິກແມ່ຍິງ ຍາມໃດກໍ່ຍົກສູງສະຕິ, ຄວາມຮັບຜິດຊອບ, ປະຕິບັດໜ້າທີ່ທີ່ໄດ້ຮັບມອບໝາຍໃຫ້ເປັນຢ່າງດີ.
ກ່ຽວກັບທິດທາງ ແລະໜ້າທີ່ປີ 2025, ພະແນກເພື່ອຄວາມກ້າວໜ້າຂອງແມ່ຍິງ ກະຊວງປ້ອງກັນປະເທດ ກຳນົດວ່າ ຈະສືບຕໍ່ປະຕິບັດວຽກງານໂຄສະນາສຶກສາອົບຮົມ, ຍົກສູງຄວາມຮູ້ໃຫ້ພະນັກງານ, ພາລະກອນ, ນັກຮົບ, ຜູ້ອອກແຮງງານໃນກອງທັບກ່ຽວກັບການປະຕິບັດຄວາມສະເໝີພາບລະຫວ່າງຍິງ-ຊາຍ ແລະການປ້ອງກັນ, ຮັບມືກັບການໃຊ້ຄວາມຮຸນແຮງບົນພື້ນຖານທາງເພດ.
    |
 |
|
ທ່ານພົນໂທ ເລກວາງມິງ, ຮອງຫົວໜ້າກົມໃຫຍ່ການເມືອງ ກອງທັບປະຊາຊົນຫວຽດນາມ ມອບໃບຍ້ອງຍໍໃຫ້ໝູ່ຄະນະ, ບຸກຄົນທີ່ມີຜົນງານດີເດັ່ນໃນວຽກງານເພື່ອຄວາມກ້າວໜ້າຂອງແມ່ຍິງ ແລະ ຄວາມສະເໝີພາບລະຫວ່າງຍິງ-ຊາຍ ໃນກອງທັບ ປີ 2024. ພາບ: qdnd.vn |
ຜ່ານການຮັບຟັງບົດລາຍງານ ແລະຄໍາເຫັນປະກອບຂອງຜູ້ແທນ, ກ່າວຄຳເຫັນຊີ້ນຳກອງປະຊຸມ, ທ່ານພົນໂທ ເລກວາງມິງ ຮອງຫົວໜ້າກົມໃຫຍ່ການເມືອງ ກອງທັບປະຊາຊົນຫວຽດນາມ ຮັບຮູ້, ຕີລາຄາສູງໝາກຜົນຕັ້ງໜ້າທີ່ບັນລຸໄດ້ ໃນວຽກງານເພື່ອຄວາມກ້າວໜ້າຂອງແມ່ຍິງ ແລະຄວາມສະເໝີພາບລະຫວ່າງຍິງ-ຊາຍ ໃນກອງທັບ; ພ້ອມກັນນັ້ນຮຽກຮ້ອງຕ້ອງເພີ່ມທະວີການຊີ້ນຳນຳພາຂອງຄະນະພັກ, ຫົວໜ້າການເມືອງ, ຜູ້ບັນຊາການ ແລະພະແນກເພື່ອຄວາມກ້າວໜ້າຂອງແມ່ຍິງທຸກຂັ້ນ ຕໍ່ກັບການປະຕິບັດນະໂຍບາຍ, ກົດໝາຍວ່າດ້ວຍຄວາມສະເໝີພາບລະຫວ່າງຍິງ-ຊາຍ, ນຳເອົາເນື້ອໃນດັ່ງກ່າວເຂົ້າໃນມະຕິນໍາພາຂອງຄະນະພັກ, ແຜນການວຽກງານຂອງຫົວໜ້າການເມືອງ, ຜູ້ບັນຊາການ.
ພ້ອມກັນນັ້ນ, ເອົາໃຈໃສ່ເຖິງການກໍ່ສ້າງ ແລະພັດທະນາຖັນແຖວພະນັກງານຍິງ; ວາງແຜນ, ບໍາລຸງກໍ່ສ້າງຕິດພັນກັບການນຳໃຊ້ ແລະແຕ່ງຕັ້ງພະນັກງານຍິງ ເຂົ້າໃນຕໍາແໜ່ງບັນຊາ ແລະຄຸ້ມຄອງໃນຂົງເຂດທີ່ເໝາະສົມ; ເອົາໃຈໃສ່, ຜັນຂະຫຍາຍບັນດາມາດຕະການ ເພື່ອຮັບປະກັນຍົກອັດຕາສະມາຊິກພັກຍິງເຂົ້າຮ່ວມຄະນະພັກທຸກຂັ້ນ; ສ້າງເງື່ອນໄຂເພື່ອໃຫ້ແມ່ຍິງເສີມຂະຫຍາຍຄວາມສາມາດບົ່ມຊ້ອນ ແລະການປະດິດຄິດສ້າງໃນທຸກຂົງເຂດ.
ໂດຍ: ທະນາພອນ