ກອງທັບຫວຽດນາມ ແລະລາວ ແລກປ່ຽນບົດຮຽນໃນວຽກງານການເງິນ

ທ່ານພົນຈັດຕະວາ ລຶວສີກຸຍ ຫົວໜ້າກົມການເງິນ, ກະຊວງປ້ອງກັນປະເທດ ເປັນຫົວໜ້າຄະນະຜູ້ແທນຫວຽດນາມ. ຄະນະຜູ້ແທນລາວ ນຳໂດຍທ່ານພັນເອກ ລໍາເງິນ ສຸຂະວົງ ຫົວໜ້າກົມການເງິນ, ກົມໃຫຍ່ພະລາທິການ, ກະຊວງປ້ອງກັນປະເທດລາວ.

ໂດຍເລີ່ມມາຈາກມູນເຊື້ອຄວາມສາມັກຄີ, ມິດຕະພາບ, ຄວາມສະໜິດຕິດພັນແບບພິເສດລະຫວ່າງພັກ, ລັດ, ກອງທັບ ແລະປະຊາຊົນສອງປະເທດຫວຽດນາມ - ລາວ, ພິທີແຮກສ່ຽວໄດ້ຈັດຕັ້ງຂຶ້ນກໍ່ເພື່ອແນໃສ່ສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ (22-12-1944 / 22-12-2024) ແລະ 75 ປີແຫ່ງວັນສ້າງຕັ້ງກອງທັບປະຊາຊົນລາວ (20-1-1949 / 20-1-2024); ປະຕິບັດເນື້ອໃນໃນບົດບັນທຶກຊ່ວຍຈຳລະຫວ່າງກົມການເງິນ, ກະຊວງປ້ອງກັນປະເທດຫວຽດນາມ ແລະກົມການເງິນ, ກົມໃຫຍ່ພະລາທິການ ກະຊວງປ້ອງກັນປະເທດລາວ ທີ່ລົງນາມໃນວັນທີ 3 ມິຖຸນາ 2024 ທີ່ນະຄອນຫຼວງວຽງຈັນ (ລາວ).

ສອງຝ່າຍລົງນາມ, ແລກປ່ຽນບົດບັນທຶກການແຮກສ່ຽວ. ພາບ: ເລຫຽວ.

ກ່າວຄຳເຫັນທີ່ພິທີ, ທ່ານພົນຈັດຕະວາ ລຶວສີກຸຍ ໃຫ້ຮູ້ວ່າ: “ການປະຕິບັດເນື້ອໃນຂອງບົດບັນທຶກຊ່ວຍຈຳລະຫວ່າງສອງອົງການ, ກົມການເງິນ, ກະຊວງປ້ອງກັນປະເທດຫວຽດນາມ ໄດ້ຕັ້ງໜ້າ, ເປັນເຈົ້າການ ແລະສົມທົບກັບບັນດາອົງການທີ່ກ່ຽວຂ້ອງຂອງກະຊວງປ້ອງກັນປະເທດຫວຽດນາມ ເພື່ອເປັນເສນາທິການ, ສະເໜີລາຍງານຕໍ່ການນໍາກະຊວງປ້ອງກັນປະເທດ ເພື່ອໃຫ້ອະນຸຍາດຈັດຕັ້ງພິທີແຮກສ່ຽວກັບກົມການເງິນ ກົມໃຫຍ່ພະລາທິການ ກະຊວງປ້ອງກັນປະເທດລາວ. ເນື້ອໃນຂອງບົດບັນທຶກຊ່ວຍຈຳແມ່ນສອດຄ່ອງກັບຂໍ້ກຳນົດຂອງກະຊວງປ້ອງກັນປະເທດສອງປະເທດ ກ່ຽວກັບວຽກງານການພົວພັນຕ່າງປະເທດດ້ານປ້ອງກັນຊາດ, ການຈັດຕັ້ງບັນຈຸ ແລະພາລະບົດບາດ, ໜ້າທີ່ຂອງສອງອົງການ”.

ຕາມນັ້ນແລ້ວ, ເນື້ອໃນແຮກສ່ຽວລະຫວ່າງກົມການເງິນ, ກະຊວງປ້ອງກັນປະເທດຫວຽດນາມ ແລະກົມການເງິນ, ກົມໃຫຍ່ພະລາທິການ, ກະຊວງປ້ອງກັນປະເທດລາວ ລວມມີການເຄື່ອນໄຫວແລກປ່ຽນຄະນະຜູ້ແທນ, ແລກປ່ຽນຂໍ້ມູນຂ່າວສານໃນຂອບເຂດ, ພາລະບົດບາດ, ໜ້າທີ່ ແລະສິດອຳນາດຂອງທັງສອງຝ່າຍ; ການຮ່ວມມືດ້ານການຝຶກອົບຮົມ, ບໍາລຸງສ້າງ... ສອງຝ່າຍຍັງໄດ້ສ້າງຕັ້ງໜ່ວຍປະຕິບັດງານທີ່ເປັນຜູ້ຕາງໜ້າ ເພື່ອແນໃສ່ແລກປ່ຽນຂໍ້ມູນຂ່າວສານກ່ຽວກັບຂົງເຂດປະຕິບັດງານຂອງແຕ່ລະຝ່າຍ, ໝາກຜົນຄວາມຄືບໜ້າໃນການປະຕິບັດເນື້ອໃນແຮກສ່ຽວ.

ໂດຍ: ຈາງຫງວຽນ