ເພີ່ມທະວີການພົວພັນລະຫວ່າງວິທະຍາຄານປ້ອງກັນຊາດ ຫວຽດນາມ-ລາວ

ກ່າວຄຳເຫັນທີ່ພິທີ, ທ່ານພົນຈັດຕະວາ ແກ້ວສຸວັນ ອິນທະວົງສາ ຫົວໜ້າການທະຫານວິທະຍາຄານປ້ອງກັນຊາດ ໄກສອນ ພົມວິຫານ ໃຫ້ຮູ້ວ່າ ໃນຕະຫຼອດ 15 ປີຜ່ານມາ, ການພົວພັນຮ່ວມມືແຮກສ່ຽວລະຫວ່າງວິທະຍາຄານປ້ອງກັນຊາດຫວຽດນາມ ແລະວິທະຍາຄານປ້ອງກັນຊາດ ໄກສອນ ພົມວິຫານ ໄດ້ຮັບການປັບປຸງ ແລະພັດທະນາຢ່າງບໍ່ຢຸດຢັ້ງ, ສອງຝ່າຍຈັດຕັ້ງການຢ້ຽມຢາມ, ແລກປ່ຽນບົດຮຽນ ແລະວິທີການສິດສອນເປັນປະຈໍາ.

ທ່ານພົນຈັດຕະວາ ແກ້ວສຸວັນ ອິນທະວົງສາ ແບ່ງປັນວ່າ ໃນສະພາບການສາກົນ ແລະພາກພື້ນພວມມີການຜັນແປຢ່າງສັບສົນ ແລະຄາດເດົາໄດ້ຍາກ, ບັນດາກຳລັງປໍລະປັກຍາມໃດກໍ່ຊອກຫາວິທີ, ໝູນໃຊ້ບັນດາກົນອຸບາຍເລ່ລ່ຽມ ເພື່ອແບ່ງແຍກຄວາມສາມັກຄີພິເສດລະຫວ່າງສອງປະເທດ ລາວ-ຫວຽດນາມ, ສອງປະເທດ ລາວ-ຫວຽດນາມ ຕ້ອງເພີ່ມທະວີ, ປັບປຸງນ້ຳໃຈສາມັກຄີ, ມິດຕະພາບແບບພິເສດ ແລະການຮ່ວມມືຮອບດ້ານ, ພິເສດແມ່ນລະຫວ່າງສອງປະເທດ ແລະສອງວິທະຍາຄານປ້ອງກັນຊາດໃຫ້ນັບມື້ນັບໝັ້ນຄົງເຂັ້ມແຂງ ແລະເລິກເຊິ່ງກວ່າອີກ.

ລາຍການສະແດງສິລະປະທີ່ພິທີສະເຫຼີມສະຫຼອງ. ພາບ: ສໍານັກຂ່າວສານຫວຽດນາມ.

ທີ່ພິທີ, ທ່ານພົນຕີ ໂດ້ວັນແບງ, ຫົວໜ້າການເມືອງວິທະຍາຄານປ້ອງກັນຊາດຫວຽດນາມ ເນັ້ນໜັກວ່າ ເຫດການນີ້ມີຄວາມໝາຍສໍາຄັນເພື່ອໃຫ້ສອງວິທະຍາຄານຂອງສອງປະເທດສົມທົບກັນຕີລາຄາໝາກຜົນທີ່ບັນລຸໄດ້ ແລະສະເໜີທິດທາງຮ່ວມມືໃນໄລຍະຈະມາເຖິງ, ປະກອບສ່ວນສຳຄັນເຂົ້າໃນພາລະກິດກໍ່ສ້າງກອງທັບ, ປັບປຸງການປ້ອງກັນຊາດ, ປົກປັກຮັກສາປະເທດຊາດຂອງສອງປະເທດ; ພ້ອມທັງຊຸກຍູ້ຄວາມສາມັກຄີມິດຕະພາບ, ມູນເຊື້ອສະໜິດຕິດພັນ, ສັດຊື່ບໍລິສຸດ, ຈົງຮັກພັກດີ, ເປັນມິດລະຫວ່າງສອງວິທະຍາຄານ, ເຮັດໃຫ້ສາຍພົວພັນທີ່ເປັນມູນເຊື້ອມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງປະເທດ ຫວຽດນາມ-ລາວ ເລິກເຊິ່ງກວ່າອີກ.

ສິ້ນສຸດພິທີ, ຜູ້ຕາງໜ້າກະຊວງປ້ອງກັນປະເທດລາວ ໄດ້ຫຼຽນໄຊວິລະກໍາຊັ້ນ II ແລະຊັ້ນ III ໃຫ້ແກ່ພະນັກງານ, ຄູອາຈານຂອງວິທະຍາຄານປ້ອງກັນຊາດຫວຽດນາມ ຈໍານວນ 26 ສະຫາຍສໍາລັບຍ້ອນມີຜົນງານດີເດັ່ນໃນການປະກອບສ່ວນເພີ່ມທະວີສາຍພົວພັນມິດຕະພາບ, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ, ສອງກອງທັບ ແລະປະຊາຊົນສອງປະເທດ ລາວ-ຫວຽດນາມ. ເນື່ອງໃນໂອກາດນີ້, ວິທະຍາຄານປ້ອງກັນຊາດຫວຽດນາມ ແລະວິທະຍາຄານປ້ອງກັນຊາດ ໄກສອນ ພົມວິຫານ ໄດ້ລົງນາມໃນບົດບັນທຶກຊ່ວຍຈຳກ່ຽວກັບການຮ່ວມມືໃນໄລຍະຈະມາເຖິງ.

ໂດຍ: ຈາງຫງວຽນ