ເພີ່ມພູນຄູນສ້າງສາຍພົວພັນ ຫວຽດນາມ-ລາວ ໃຫ້ນັບມື້ນັບພັດທະນາ

ໃນຂອບເຂດການຢ້ຽມຢາມ, ສະຫາຍ ຫງວຽນຢຸຍງອັກ ໄດ້ເຂົ້າຢ້ຽມຂ່ຳນັບສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ ແລະສະຫາຍ ສອນໄຊ ສີພັນດອນ ນາຍົກລັດຖະມົນຕີລາວ.

ສະຫາຍ ຫງວຽນຢຸຍງອັກ ຢືນຢັນວ່າ ພັກ, ລັດ ແລະປະຊາຊົນຫວຽດນາມ ຍາມໃດກໍ່ສະໜັບສະໜູນກິດຈະການປ່ຽນແປງໃໝ່ຂອງລາວ ຢ່າງແຂງແຮງ; ຖືເປັນສໍາຄັນ ແລະໃຫ້ບຸລິມະສິດສູງສຸດໃນການປັບປຸງ, ເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານກັບພັກ, ລັດ ແລະປະຊາຊົນລາວ; ເນັ້ນໜັກວ່າ ການພັດທະນາການພົວພັນ ຫວຽດນາມ-ລາວ ແມ່ນໜ້າທີ່ຍຸດທະສາດ, ມີຄວາມໝາຍເປັນຕາຍໃນພາລະກິດປະຕິວັດ, ສ້າງສາ ແລະປົກປັກຮັກສາປະເທດຊາດຂອງແຕ່ລະປະເທດ ແລະຈະເຮັດຈົນສຸດຄວາມສາມາດຂອງຕົນພ້ອມກັບລາວ ຮັກສາ, ເພີ່ມພູນຄູນສ້າງສາຍພົວພັນແບບພິເສດ ຫວຽດນາມ-ລາວ ໃຫ້ນັບມື້ນັບພັດທະນາເຂົ້າສູ່ລວງເລິກ, ແທດຈິງ, ມີປະສິດທິຜົນໃນທຸກຂົງເຂດ, ປະກອບສ່ວນເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະການພັດທະນາຢູ່ພາກພື້ນ ແລະໃນໂລກ.

ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ ຕ້ອນຮັບສະຫາຍ ຫງວຽນຢຸຍງອັກ, ເລຂາທິການສູນກາງພັກ, ຫົວໜ້າຫ້ອງວ່າສູນກາງພັກກອມມູນິດຫວຽດນາມ. ພາບ: nhandan.vn

ສ່ວນສະຫາຍ ທອງລຸນ ສີສຸລິດ ແລະສະຫາຍ ສອນໄຊ ສີພັນດອນ ກໍ່ສະແດງຄວາມປິຕິຊົມຊື່ນ ແລະຕີລາຄາສູງຕໍ່ສາຍພົວພັນ ຫວຽດນາມ-ລາວ ນັບມື້ນັບພັດທະນາຢ່າງເລິກເຊິ່ງກວ້າງຂວາງ, ນຳເອົາຜົນປະໂຫຍດແທດຈິງມາໃຫ້ປະຊາຊົນແຕ່ລະປະເທດ, ໃນນັ້ນມີການປະກອບສ່ວນອັນສຳຄັນຂອງສອງຫ້ອງວ່າການສູນກາງພັກ; ໄດ້ເນັ້ນໜັກເຖິງຄວາມໝາຍ ແລະຄວາມສຳຄັນຂອງສາຍພົວພັນສາມັກຄີແບບພິເສດ ຫວຽດນາມ-ລາວ ແລະສະເໜີໃຫ້ສອງຫ້ອງວ່າການສືບຕໍ່ສົມທົບກັນຢ່າງແໜ້ນແຟ້ນ, ຮ່ວມມືກັນຢ່າງມີປະສິດທິຜົນ, ເສີມຂະຫຍາຍບົດບາດໃນການຮັກສາ, ເພີ່ມພູນຄູນສ້າງສາຍພົວພັນ ຫວຽດນາມ-ລາວ ໃຫ້ນັບມື້ນັບພັດທະນາ. ກໍ່ໃນການຢ້ຽມຢາມນີ້, ສະຫາຍ ຫງວຽນຢຸຍງອັກ ໄດ້ມີການພົບປະສອງຝ່າຍກັບສະຫາຍ ທອງສະລິດ ມັງໜໍ່ເມກ.

ໂດຍ: ເຈິ່ນຮວ່ຽນ