ເພີ່ມທະວີການຮ່ວມມືດ້ານວັດທະນະທໍາ-ການທ່ອງທ່ຽວລະຫວ່າງ ຫວຽດນາມ-ລາວ

ທີ່ການເຮັດວຽກ, ສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການຜັນຂະຫຍາຍໂຄງການກໍ່ສ້າງສວນສາທາລະນະມິດຕະພາບ ລາວ-ຫວຽດນາມ ຢູ່ນະຄອນຫຼວງວຽງຈັນ ຄື: ວຽກງານວາງແຜນຜັງ, ອອກແບບ... ເພື່ອສ້າງເງື່ອນໄຂສະດວກທີ່ສຸດໃຫ້ແກ່ການລົງມືກໍ່ສ້າງ ໃນໄລຍະຈະມາເຖິງ...

ບັນຍາກາດທີ່ການເຮັດວຽກລະຫວ່າງຄະນະຜູ້ແທນກະຊວງວັດທະນະທໍາ, ກິລາ ແລະທ່ອງທ່ຽວຫວຽດນາມ ແລະຄະນະຜູ້ແທນຫ້ອງວ່າການສູນກາງພັກປະຊາຊົນປະຕິວັດ ລາວ. ພາບ: ສໍານັກຂ່າວສານຫວຽດນາມ.

ສິ້ນສຸດການເຮັດວຽກ, ຄະນະປະຕິບັດງານທັງສອງຝ່າຍພ້ອມກັນສໍາຫຼວດພູມສາດຕົວຈິງຂອງໂຄງການກໍ່ສ້າງສວນສາທາລະນະມິດຕະພາບ ລາວ-ຫວຽດນາມ. ໂຄງການມີເນື້ອທີ່ 30.653 ຕາແມັດ, ຂຶ້ນກັບບ້ານດົງໝາກຄາຍ, ເມືອງໄຊທານີ, ນະຄອນຫຼວງວຽງຈັນ.

ຄະນະ ລົງກວດກາພູມສາດຕົວຈິງໂຄງການກໍ່ສ້າງສວນສາທາລະນະມິດຕະພາບ ລາວ-ຫວຽດນາມ. ພາບ: ສໍານັກຂ່າວສານຫວຽດນາມ.

ກ່ອນໜ້ານັ້ນ, ຕອນບ່າຍວັນທີ 9 ທັນວາ, ຢູ່ນະຄອນຫຼວງວຽງຈັນ, ຄະນະຜູ້ແທນກະຊວງວັດທະນະທໍາ, ກິລາ ແລະທ່ອງທ່ຽວຫວຽດນາມ ນໍາໂດຍ ທ່ານ ຮວ່າງດ້າວເກືອງ ຮອງລັດຖະມົນຕີກະຊວງວັດທະນະທໍາ, ກິລາ ແລະທ່ອງທ່ຽວ ໄດ້ມີການເຮັດວຽກກັບທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະກິລາ ລາວ. 

ທີ່ການເຮັດວຽກ, ສອງຝ່າຍເຫັນດີສືບຕໍ່ຜັນຂະຫຍາຍແຜນການຮ່ວມມືດ້ານວັດທະນະທໍາ, ສິລະປະ ແລະການທ່ອງທ່ຽວ ຫວຽດນາມ-ລາວ ລະຫວ່າງກະຊວງວັດທະນະທໍາ, ກິລາ ແລະທ່ອງທ່ຽວຫວຽດນາມ ແລະກະຊວງຖະແຫຼງຂ່າວ, ວັດທະນະທໍາ ແລະການທ່ອງທ່ຽວ ລາວ ໄລຍະ 2021-2025.  ປີ 2025, ກະຊວງຖະແຫຼງຂ່າວ, ວັດທະນະທໍາ ແລະການທ່ອງທ່ຽວລາວ ຈະຈັດຕັ້ງສັບປະດາວັດທະນະທໍາ ລາວ ຢູ່ຫວຽດນາມ.

ທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະການທ່ອງທ່ຽວລາວ ຕ້ອງຮັບທ່ານຮອງລັດຖະມົນຕີ ຮວ່າງດ້າວເກື່ອງ. ພາບ: ສໍານັກຂ່າວສານຫວຽດນາມ.

ກ່ຽວກັບການທ່ອງທ່ຽວ, ສອງຝ່າຍສືບຕໍ່ຜັນຂະຫຍາຍສັນຍາຮ່ວມມືການທ່ອງທ່ຽວສອງຝ່າຍຂັ້ນລັດຖະບານ ແລະແຜນການ, ຍຸດທະສາດພັດທະນາການທ່ອງທ່ຽວຂັ້ນອະນຸພາກພື້ນອື່ນ; ສືບຕໍ່ສ້າງເງື່ອນໄຂສະດວກເພື່ອໃຫ້ແຂກທ່ອງທ່ຽວໄປມາຜ່ານຊາຍແດນລະຫວ່າງສອງປະເທດ ຫວຽດນາມ-ລາວ, ພ້ອມທັງຄົ້ນຄວ້າເປີດກວ້າງສາຍການບິນເຖິງບັນດາສະຖານທີ່ທ່ອງທ່ຽວໃໝ່ທີ່ໜ້າຈັບໃຈຂອງສອງປະເທດ, ພິຈາລະນາຄວາມສາມາດຮ່ວມມືໃນການໝູນໃຊ້ເຕັກໂນໂລຊີດີຈີຕອນໃນການສື່ສານໂຄສະນາການທ່ອງທ່ຽວ; ສ້າງເງື່ອນໄຂໃຫ້ບັນດາຝ່າຍເຂົ້າຮ່ວມງານຕະຫຼາດນັດສົ່ງເສີມການທ່ອງທ່ຽວຢູ່ແຕ່ລະປະເທດ; ສົ່ງເສີມວິສາຫະກິດ ແລະທ້ອງຖິ່ນສົມທົບກັນສໍາຫຼວດຄົ້ນຄວ້າ ແລະກໍ່ສ້າງຜະລິດຕະພັນລາຍການທ່ອງທ່ຽວໃໝ່, ເປັນເອກະລັກສະເພາະ ເພື່ອຮັບໃຊ້ຄວາມຕ້ອງການ ຂອງນັກທ່ອງທ່ຽວສອງປະເທດ ແລະຈາກປະເທດທີສາມ, ໂດຍສະເພາະແມ່ນຜະລິດຕະພັນການທ່ອງທ່ຽວຊາຍແດນ.

ໂດຍ: ໄຊຊະນະ