ການພົວພັນ ຫວຽດນາມ-ລາວ ນັບມື້ນັບເຂົ້າສູ່ລວງເລິກ, ແທດຈິງ ແລະມີປະສິດທິຜົນ
ກປ.ອອນໄລ - ວັນທີ 4 ທັນວາ, ຢູ່ສຳນັກງານສູນກາງພັກ, ສະຫາຍ ເຈິ່ນເກິມຕູ, ກຳມະການກົມການເມືອງ, ຜູ້ປະຈຳການຄະນະເລຂາທິການສູນກາງພັກ, ປະທານຄະນະກວດກາສູນກາງພັກ ໄດ້ມີການພົບປະທາງການກັບສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກປະຊາຊົນປະຕິວັດ ລາວ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ໃນຂອບເຂດການຢ້ຽມຢາມ ແລະເຮັດວຽກຢູ່ຫວຽດນາມ ໃນລະຫວ່າງວັນທີ 3-6 ທັນວາ 2024.
ທີ່ການພົບປະ, ສະຫາຍ ບຸນທອງ ຈິດມະນີ ຢືນຢັນວ່າ ພັກ, ລັດ ແລະປະຊາຊົນລາວ ຈະເຮັດຈົນສຸດຄວາມສາມາດຂອງຕົນພ້ອມກັບຫວຽດນາມ ຮັກສາ ແລະເພີ່ມພູນຄູນສ້າງການພົວພັນສາມັກຄີແບບພິເສດ ລາວ-ຫວຽດນາມ ໃຫ້ນັບມື້ນັບພັດທະນາ, ເພື່ອຜົນປະໂຫຍດຂອງປະຊາຊົນສອງປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື, ການພັດທະນາຢູ່ພາກພື້ນ ແລະໃນໂລກ.
    |
 |
|
ສະຫາຍ ເຈິ່ນເກິມຕູ, ຜູ້ປະຈໍາການຄະນະເລຂາທິການສູນກາງພັກ, ປະທານຄະນະກວດກາສູນກາງພັກ ແລະສະຫາຍ ບຸນທອງ ຈິດມະນີ, ຜູ້ປະຈໍາການຄະນະເລຂາທິການສູນກາງພັກປະຊາຊົນປະຕິວັດ ລາວ, ຮອງປະທານປະເທດລາວ. ພາບ: ສໍານັກຂ່າວສານຫວຽດນາມ |
ສະຫາຍ ເຈິ່ນເກິມຕູ ຊົມເຊີຍຜົນງານອັນໃຫຍ່ຫຼວງ, ຮອບດ້ານ, ມີຄວາມໝາຍປະຫວັດສາດ ເຊິ່ງ ພັກ, ລັດ ແລະປະຊາຊົນລາວ ບັນລຸໄດ້ພາຍຫຼັງເກືອບ 40 ປີແຫ່ງການປ່ຽນແປງໃໝ່; ເຊື່ອໝັ້ນວ່າ ພາຍໃຕ້ການນຳພາຂອງພັກປະຊາຊົນປະຕິວັດລາວ, ປະຊາຊົນລາວ ຈະສືບຕໍ່ບັນລຸໄດ້ຜົນງານໃໝ່ໃຫຍ່ຫຼວງກວ່າເກົ່າໃນກິດຈະການປ່ຽນແປງໃໝ່, ປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ ຢ່າງມີໄຊ, ສ້າງສາປະເທດລາວ ແຫ່ງສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະວັດທະນາຖາວອນຕາມເປົ້າໝາຍສັງຄົມນິຍົມ ໃຫ້ປະສົບຜົນສໍາເລັດ; ຢືນຢັນວ່າ ຫວຽດນາມ ຍາມໃດກໍ່ຖືເປັນສຳຄັນ ແລະໃຫ້ບຸລິມະສິດແຖວໜ້າແກ່ການພົວພັນກັບລາວ, ບໍ່ວ່າໃນສະພາບການໃດກໍ່ຈະເຮັດຈົນສຸດຄວາມສາມາດຂອງຕົນ ພ້ອມກັບລາວ ຮັກສາ, ປົກປັກຮັກສາ ແລະເພີ່ມພູນຄູນສ້າງໃຫ້ການພົວພັນສາມັກຄີແບບພິເສດລະຫວ່າງສອງປະເທດ.
|
|
 |
|
ບັນຍາກາດທີ່ການພົບປະ. ພາບ: ສໍານັກຂ່າວສານຫວຽດນາມ |
ແລກປ່ຽນກ່ຽວກັບຜົນການຮ່ວມມືລະອຽດລະຫວ່າງສອງພັກ, ສອງລັດໃນຫຼາຍຂົງເຂດ, ສອງຝ່າຍເຫັນດີເປັນເອກະພາບຕີລາຄາວ່າ ການພົວພັນຮ່ວມມື ຫວຽດນາມ-ລາວ ໃນໄລຍະຜ່ານມາມີບາດກ້າວພັດທະນາຢ່າງຕັ້ງໜ້າ, ນັບມື້ນັບເຂົ້າສູ່ລວງເລິກ, ແທດຈິງ ແລະມີປະສິດທິຜົນ. ໃນໄລຍະຈະມາເຖິງ, ສອງຝ່າຍເຫັນດີເປັນເອກະພາບ ຈະສົມທົບກັນຜັນຂະຫຍາຍຂໍ້ຕົກລົງຂັ້ນສູງ ຫວຽດນາມ-ລາວ ຢ່າງມີປະສິດທິຜົນ, ສືບຕໍ່ຍູ້ແຮງການຮ່ວມມືດ້ານການເມືອງ-ການຕ່າງປະເທດ, ການປ້ອງກັນຊາດ, ປ້ອງກັນຄວາມສະຫງົບ, ເສດຖະກິດ, ສັງຄົມ, ແລກປ່ຽນທິດສະດີ ແລະບົດຮຽນໃນວຽກງານກໍ່ສ້າງພັກທຸກດ້ານ.
* ໃນວັນດຽວກັນ, ສະຫາຍ ເລມິງຮືງ, ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ໄດ້ມີການເຮັດວຽກກັບສະຫາຍ ບຸນທອງ ຈິດມະນີ ເພື່ອແລກປ່ຽນ, ແບ່ງປັນບົດຮຽນໃນວຽກງານກໍ່ສ້າງພັກຂອງສອງຝ່າຍ.
ໂດຍ: ເຈິ່ນຮວ່ຽນ