ຮ່າໂນ້ຍ - ວຽງຈັນ: ຊຸກຍູ້ການຮ່ວມມືດ້ານການຄ້າລະຫວ່າງສອງນະຄອນຫຼວງ

ຕາມທ່ານ ຫງວຽນເທ໊ຮຽບ, ຮອງຫົວໜ້າພະແນກອຸດສາຫະກໍາ ແລະການຄ້ານະຄອນຫຼວງຮ່າໂນ້ຍ, ໃນໄລຍະຜ່ານມາ, ການພົວພັນດ້ານເສດຖະກິດ, ການຄ້າຂອງນະຄອນຫຼວງຮ່າໂນ້ຍ ກັບນະຄອນຫຼວງວຽງຈັນ ເວົ້າສະເພາະ, ເວົ້າລວມແມ່ນ ລາວ ລ້ວນແຕ່ມີການເຕີບໂຕດີ. ການເຮັດວຽກລະຫວ່າງສອງພະແນກ ແມ່ນເປັນຂົວຕໍ່ເພື່ອໃຫ້ວິສາຫະກິດ ຫວຽດນາມ ແລະລາວ ມີໂອກາດໄດ້ແລກປ່ຽນ, ຮ່ວມມືດໍາເນີນທຸລະກິດ, ຊຸກຍູ້ການສົ່ງອອກ-ນໍາເຂົ້າສິນຄ້າ.

ບັນດາຜູ້ແທນ ຢ້ຽມຊົມສູນການຄ້າ AEON Mall ຮ່າດົງ (ຮ່າໂນ້ຍ). ພາບ: congthuong.vn

ທີ່ການເຮັດວຽກ, ທ່ານນາງ ທັດດາວອນ ສີກະເສີມຄ່ຽມ ຮອງຫົວໜ້າພະແນກອຸດສາຫະກໍາ ແລະການຄ້ານະຄອນຫຼວງວຽງຈັນ ໃຫ້ຮູ້ວ່າ, ພະແນກອຸດສາຫະກໍາ ແລະການຄ້ານະຄອນຫຼວງວຽງຈັນ ປາດຖະໜາຢາກແລກປ່ຽນ, ໂຄສະນາ, ນໍາຜະລິດຕະພັນຂອງລາວ ມາວາງຂາຍຢູ່ສູນການຄ້າແຫ່ງຕ່າງໆ ຢູ່ຮ່າໂນ້ຍ ເວົ້າລວມ, ເວົ້າສະເພາະແມ່ນສູນການຄ້າ AEON Mall ທີ່ຮ່າໂນ້ຍ ໃນໄລຍະຈະມາເຖິງ. ບັນດາປະເພດສິນຄ້າຂອງ ລາວ ທີ່ມີຄວາມສາມາດບົ່ມຊ້ອນນໍາເຂົ້າຕະຫຼາດຫວຽດນາມ ເວົ້າລວມ, ເວົ້າສະເພາະແມ່ນຮ່າໂນ້ຍ ແມ່ນຜະລິດຕະພັນກະເສດ, ວັດຖຸຜະລິດຢາ, ເຄື່ອງຫັດຖະກໍາ ແລະເບຍລາວ.

ທ່ານນາງ ທັດດາວອນ ສີກະເສີມຄ່ຽມ ກ່າວວ່າ “ພວກຂ້າພະເຈົ້າ ຫວັງວ່າ ພະແນກອຸດສາຫະກໍາ ແລະການຄ້າຮ່າໂນ້ຍ ຈະສືບຕໍ່ໜູນຊ່ວຍໃຫ້ຄໍາປຶກສາ, ຝຶກອົບຮົມກ່ຽວກັບມາດຕະຖານ, ເງື່ອນໄຂ, ຂັ້ນຕອນ ເພື່ອນໍາສິນຄ້າເຂົ້າລະບົບແຈກຢາຍທີ່ທັນສະໄໝຢູ່ຫວຽດນາມ; ພ້ອມທັງໜູນຊ່ວຍ, ສ້າງເງື່ອນໄຂເພື່ອໃຫ້ພວກຂ້າພະເຈົ້າ ມີເຂດວາງຂາຍຜະລິດຕະພັນສະເພາະຂອງລາວ”.

ທີ່ການເຮັດວຽກ, ສອງຝ່າຍ ເຫັນດີສືບຕໍ່ຍູ້ແຮງບັນດາການເຄື່ອນໄຫວສົ່ງເສີມການຄ້າ, ຊ່ວຍໃຫ້ວິສາຫະກິດສອງທ້ອງຖິ່ນ ເຊື່ອມຕໍ່ການຄ້າ, ນໍາສິນຄ້າໄປວາງຂາຍຢູ່ຕະຫຼາດຂອງກັນ ແລະບັນດາປະເທດອື່ນ.

ໂດຍ: ໄຊຊະນະ