ເຖິງວ່າຈະປະສົບກັບສິ່ງທ້າທາຍຫຼາຍຢ່າງໃນເງື່ອນໄຂທໍາມະຊາດ ແລະເສດຖະກິດກໍ່ຕາມ, ແຕ່ຍ້ອນມີຄວາມມານະພະຍາຍາມຂອງທົ່ວລະບົບການເມືອງ, ອໍານາດການປົກຄອງ ແລະກຳລັງປະກອບອາວຸດ, ຊີວິດການເປັນຢູ່ຂອງປະຊາຊົນຢູ່ເຂດຊາຍແດນແຂວງເງະອານ ນັບມື້ນັບໄດ້ຮັບການປັບປຸງດີຂຶ້ນ. ທິດນຳ “3 ສະຫງົບ” (ປະຊາຊົນສະຫງົບ, ບໍລິເວນສະຫງົບ, ຊາຍແດນສະຫງົບ) ໄດ້ເສີມຂະຫຍາຍຄຸນປະໂຫຍດຢ່າງແທ້ຈິງໃນການຮັກສາຄວາມສະຫງົບ, ສະຖຽນລະພາບ ແລະການພັດທະນາຢູ່ເຂດຊາຍແດນ, ຊ່ວຍປະຊາຊົນດຳລົງຊີວິດ ແລະພັດທະນາເສດຖະກິດ
ຊາຍແດນສະຫງົບ ແລະພັດທະນາ
ເມື່ອໄປຢ້ຽມຢາມບັນດາເມືອງຕິດກັບຊາຍແດນຂອງແຂວງເງະອານ, ພວກຂ້າພະເຈົ້າ ໄດ້ເຫັນການປ່ຽນແປງຢ່າງຈະແຈ້ງກ່ຽວກັບພື້ນຖານໂຄງລ່າງ, ພິເສດແມ່ນຕາໜ່າງຄົມມະນາຄົມ. ບັນດາເສັ້ນທາງກ່ອນນີ້ປະສົບກັບຄວາມຫຍຸ້ງຍາກຫຼາຍນັ້ນ, ປະຈຸບັນໄດ້ຮັບການສ້ອມແປງ ແລະກໍ່ສ້າງດ້ວຍເບຕົງ, ສ້າງຄວາມສະດວກໃຫ້ແກ່ການໄປມາ, ພັດທະນາເສດຖະກິດ ແລະປົກປັກຮັກສາອະທິປະໄຕຂອງຊາດ. ຍ້ອນມີບັນດາເສັ້ນທາງດັ່ງກ່າວ, ປະຊາຊົນທຳມາຫາກິນ, ພັດທະນາເສດຖະກິດ ແລະເຊື່ອມຕໍ່ກັບເຂດອື່ນໆ. ຢູ່ຕາມເສັ້ນທາງຕ່າງໆ, ປະຊາຊົນໄດ້ເຕົ້າໂຮມກັນເປັນເທດສະບານຢູ່ຊາຍແດນ, ເຊັ່ນ: ແລວທາງຕາແສງ ເມືອງຕີບ, ເມືອງກີເຊີນ. ນີ້ແມ່ນເງື່ອນໄຂເພື່ອພັດທະນາຮູບແບບການຜະລິດ, ຜ່ານນັ້ນຊ່ວຍໃຫ້ຊີວິດຂອງຊາວເຜົ່າສ່ວນໜ້ອຍເປັນປົກກະຕິ.
    |
 |
|
ພະນັກງານກອງເສດຖະກິດ-ປ້ອງກັນຊາດ 4 (ທະຫານເຂດ 4) ແນະນຳວິທີປູກໝາກແຕງໃຫ້ປະຊາຊົນ. ພາບ: qdnd.vn |
ໜຶ່ງໃນບັນດາຂໍ້ລິເລີ່ມສຳຄັນໃນການປົກປັກຮັກສາ ແລະພັດທະນາເຂດຊາຍແດນນີ້ແມ່ນຂະບວນການແຮກສ່ຽວລະຫວ່າງບ້ານ, ໝູ່ບ້ານຢູ່ຊາຍແດນ ຫວຽດນາມ-ລາວ. ນັບແຕ່ປີ 2013 ເປັນຕົ້ນມາ, ແຂວງ ເງະອານ ໄດ້ປະກາດໃຊ້ຄຳສັ່ງຈັດຕັ້ງຂະບວນການແຮກສ່ຽວ ບ້ານ-ບ້ານ ລະຫວ່າງຊຸມຊົນຢູ່ສອງຟາກຊາຍແດນ. ຂະບວນການນີ້ບໍ່ພຽງແຕ່ເຊື່ອມຕໍ່ປະຊາຊົນຂອງສອງປະເທດເທົ່ານັ້ນ, ຫາກຍັງຍົກສູງຄວາມຮັບຮູ້ກ່ຽວກັບອະທິປະໄຕຜືນແຜ່ນດິນ ແລະຄວາມໝັ້ນຄົງຢູ່ເຂດຊາຍແດນ. ບັນດາຄູ່ບ້ານ-ບ້ານແຮກສ່ຽວໄດ້ຈັດຕັ້ງການເຄື່ອນໄຫວໂຄສະນາກ່ຽວກັບກົດໝາຍວ່າດ້ວຍຊາຍແດນເປັນປະຈຳ, ຜ່ານນັ້ນປັບປຸງສາຍພົວພັນສາມັກຄີ, ມິດຕະພາບ ແລະປົກປັກຮັກສາຊາຍແດນຢ່າງໝັ້ນຄົງ.
ທະຫານຊາຍແດນຫວຽດນາມ ແລະລາວ ສົມທົບກັນຢ່າງແໜ້ນແຟ້ນໃນວຽກງານລາດຕະເວນ, ປົກປັກຮັກສາຊາຍແດນ. ການລາດຕະເວນ ແລະກວດກາລະບົບຫຼັກໝາຍຊາຍແດນເປັນປະຈຳ ໄດ້ຊ່ວຍຮັບປະກັນຄວາມໝັ້ນຄົງ ແລະປົກປັກຮັກສາຄວາມປອດໄພໃຫ້ທັງສອງຝ່າຍ. ຍ້ອນການປະສານສົມທົບກັນດັ່ງກ່າວ, ການລະເມີດໄດ້ຮັບການແກ້ໄຂຢ່າງທັນການ, ສ້າງເຂດຊາຍແດນສັນຕິພາບ ແລະພັດທະນາ...
ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ
ຍ້ອນໄດ້ຮັບການໜູນຊ່ວຍຈາກໂຄງການພັດທະນາເສດຖະກິດ, ລົບລ້າງຄວາມອຶດຫີວ, ຫຼຸດຜ່ອນຄວາມທຸກຍາກ, ຊີວິດການເປັນຢູ່ຂອງປະຊາຊົນຢູ່ເຂດຊາຍແດນແຂວງເງະອານ ໄດ້ມີການປ່ຽນແປງຢ່າງຈະແຈ້ງ. ເລື່ອງລາວຂອງທ່ານ ຢ່າຕົ່ງທູ່, ຊາວນາຢູ່ບ້ານ ບວກມູ 2, ຕາແສງ ນາງອຍ, ເມືອງ ກີເຊີນ ແມ່ນຕົວຢ່າງທີ່ດີເດັ່ນ. ຄອບຄົວຂອງລາວ ໄດ້ຮັບການໜູນຊ່ວຍຈາກກອງເສດຖະກິດ-ປ້ອງກັນຊາດ 4 (ທະຫານເຂດ 4) ແນວມັນສາຄູ 100 ກິໂລ ແລະແນະນຳເຕັກນິກປູກຝັງ, ໃນລະດູການທຳອິດ, ເກັບກ່ຽວໄດ້ເກືອບ 10 ໂຕນ. ດ້ວຍລາຄາຂາຍແຕ່ 3.500 – 4.000 ດົ່ງ/ກິໂລ, ຄອບຄົວຂອງລາວມີລາຍຮັບເປັນປົກກະຕິ, ຊ່ວຍປັບປຸງຊີວິດການເປັນຢູ່ໃຫ້ດີຂຶ້ນ...
ກອງເສດຖະກິດ-ປ້ອງກັນຊາດ 4 ໄດ້ຜັນຂະຫຍາຍຫຼາຍໂຄງການໜູນຊ່ວຍປະຊາຊົນພັດທະນາກະສິກຳ ແລະລ້ຽງສັດ. ບັນດາຮູບແບບປູກຊາ Shan Tuyet, ມັນສາຄູ, ຂີງ, ໝາກນອດ, ກໍ່ຄືການລ້ຽງງົວ, ແບ້, ໝູ... ໄດ້ຊ່ວຍໃຫ້ປະຊາຊົນຢູ່ເຂດຊາຍແດນມີລາຍຮັບເປັນປົກກະຕິ ແລະຫຼຸດຜ່ອນຄວາມທຸກຍາກອຶດຫີວ. ບັນດາຮູບແບບນີ້ບໍ່ພຽງແຕ່ຍົກສູງຊີວິດການເປັນຢູ່ຂອງປະຊາຊົນເທົ່ານັ້ນຫາກຍັງສ້າງຮູບແບບການຜະລິດຢ່າງມີປະສິດທິຜົນ, ປະກອບສ່ວນສຳຄັນເຂົ້າໃນການພັດທະນາເສດຖະກິດຂອງພາກພື້ນ...
|
|
 |
|
ຄ້າຍທະຫານຊາຍແດນ ນໍ້າກ່ານ (ທະຫານຊາຍແດນແຂວງເງະອານ) ຊ່ວຍປະຊາຊົນເກັບກ່ຽວເຂົ້າ. ພາບ: ສໍານັກຂ່າວສານຫວຽດນາມ. |
ລາຍການ “ແຕ່ລະອົງການ, ກົມກອງຊ່ວຍ 1-2 ຄອບຄົວຫຼຸດຜ່ອນຄວາມທຸກຍາກ” ໄດ້ຮັບການຜັນຂະຫຍາຍຢ່າງກວ້າງຂວາງ ແລະນຳມາເຊິ່ງໝາກຜົນທີ່ຕັ້ງໜ້າ. ບັນດາກົມກອງຕັ້ງທັບໃນບໍລິເວນໄດ້ໜູນຊ່ວຍປະຊາຊົນດ້ວຍການສະໜອງແນວພັນພືດ, ສັດລ້ຽງ, ແນະນຳເຕັກນິກການຜະລິດ, ສ້າງເງື່ອນໄຂໃຫ້ຄອບຄົວທຸກຍາກຍົກລາຍຮັບ ແລະຫຼຸດພົ້ນອອກຈາກຄວາມທຸກຍາກແບບຍືນຍົງ. ນະໂຍບາຍນີ້ບໍ່ພຽງແຕ່ຊ່ວຍຫຼຸດຜ່ອນຄວາມທຸກຍາກເທົ່ານັ້ນ, ຫາກຍັງສ້າງຄວາມສາມັກຄີລະຫວ່າງລັດຖະບານ, ບັນດາກຳລັງປະກອບອາວຸດ ແລະປະຊາຄົມອີກດ້ວຍ. ລາຍການ “ລະດູບານໃໝ່ຢູ່ເຂດຊາຍແດນສ້າງຄວາມອົບອຸ່ນໃຫ້ຊາວບ້ານ” ໄດ້ມອບຂອງຂວັນບຸນເຕັດໃຫ້ນັບພັນຄອບຄົວຊ່ວຍປະຊາຊົນມີບຸນເຕັດຢ່າງສົມບູນ, ອົບອຸ່ນ. ຂອງຂວັນດັ່ງກ່າວບໍ່ພຽງແຕ່ນຳມາເຊິ່ງຄວາມເບີກບານມ່ວນຊື່ນໃຫ້ແກ່ປະຊາຊົນເທົ່ານັ້ນ ຫາກຍັງສະແດງໃຫ້ເຫັນເຖິງຄວາມເປັນຫ່ວງເປັນໄຍ, ການແບ່ງປັນຂອງກຳລັງປະກອບອາວຸດ, ອຳນາດການປົກຄອງຕໍ່ຊີວິດການເປັນຢູ່ຂອງປະຊາຊົນຢູ່ເຂດຊາຍແດນອີກດ້ວຍ.
ທ່ານພັນໂທ ຫງວຽນຈຸງກຽນ, ຫົວໜ້າຄ້າຍທະຫານຊາຍແດນນາງອຍ (ທະຫານຊາຍແດນແຂວງເງະອານ) ໃຫ້ຮູ້ວ່າ: ໃນເມື່ອກ່ອນ, ເຖິງວ່າຊີວິດການເປັນຢູ່ຍັງປະສົບກັບຄວາມຫຍຸ້ງຍາກກໍ່ຕາມ, ແຕ່ດ້ວຍຈິດໃຈຊ່ວຍເຫຼືອເຊິ່ງກັນ ແລະກັນ, ພະນັກງານ, ນັກຮົບຂອງຄ້າຍທະຫານຊາຍແດນ ໄດ້ປະກອບເງິນເດືອນຂອງຕົນເພື່ອຊ່ວຍເຫຼືອຄອບຄົວທຸກຍາກພັດທະນາເສດຖະກິດດ້ວຍວິທີເຮັດທີ່ມີປະສິດທິຜົນເຊັ່ນ: ຊ່ວຍແນວພັນສັດລ້ຽງ, ເບ້ຍໄມ້... ແລະສົ່ງພະນັກງານລົງແຕ່ລະບ້ານເພື່ອຊີ້ນຳເຕັກນິກການລ້ຽງສັດ ແລະປູກຝັງ, ຊ່ວຍໃຫ້ບັນດາຄອບຄົວຢູ່ທີ່ນີ້ປັບປຸງຊີວິດການເປັນຢູ່ໃຫ້ນັບມື້ນັບດີຂຶ້ນເທື່ອລະກ້າວ. ຈາກການໜູນຊ່ວຍໃນເບື້ອງຕົ້ນນັ້ນ, ຫຼາຍຄອບຄົວ ໄດ້ບືນຕົວຂຶ້ນ ແລະມີກິນມີໃຊ້, ມີໄວ້ມີເຫຼືອ.
ດ້ວຍການເຂົ້າຮ່ວມຂອງລະບົບການເມືອງ ແລະການຮ່ວມເດີນທາງຂອງກຳລັງປະກອບອາວຸດ, ເຂດຊາຍແດນເງະອານ ໄດ້ກາຍເປັນເຂດມີສະຖຽນລະພາບ, ພັດທະນາຢ່າງໝັ້ນຄົງ. ໝາກຜົນແຫ່ງການປົກປັກຮັກສາຊາຍແດນ, ພັດທະນາເສດຖະກິດ, ຮັບປະກັນຊີວິດສັງຄົມແມ່ນບາດກ້າວໝັ້ນຄົງເພື່ອໃຫ້ເຂດນີ້ສືບຕໍ່ພັດທະນາ ແລະສ້າງຊາຍແດນສັນຕິພາບ, ມິດຕະພາບ ແລະວັດທະນາຖາວອນ.
ໂດຍ: ຈາງຫງວຽນ