    |
 |
|
ທ່ານພົນເອກ ຟານວັນຢາງ ລັດຖະມົນຕີກະຊວງປ້ອງກັນປະເທດ ເປັນປະທານກອງປະຊຸມມອບ-ຮັບໜ້າທີ່ຜູ້ບັນຊາການທະຫານເຂດ 3. ພາບ: qdnd.vn |
ກ່າວຄຳເຫັນທີ່ກອງປະຊຸມ, ໂດຍຕາງໜ້າໃຫ້ຄະນະພັກການທະຫານສູນກາງ, ກະຊວງປ້ອງກັນປະເທດ, ທ່ານພົນເອກ ຟານວັນຢາງ ໄດ້ອວຍພອນທ່ານພົນຕີ ຫງວຽນກວາງຫງອກ, ກຳມະການສູນກາງພັກ, ຜູ້ບັນຊາການທະຫານເຂດ 3 ທີ່ໄດ້ຮັບການແຕ່ງຕັ້ງໃຫ້ດໍາລົງຕໍາແໜ່ງເປັນຮອງຫົວໜ້າກົມໃຫຍ່ເສນາທິການກອງທັບປະຊາຊົນຫວຽດນາມ; ທ່ານພົນຈັດຕະວາ ເລືອງວັນກ໊ຽມ, ຮອງຜູ້ບັນຊາການທະຫານເຂດ 3 ໄດ້ຮັບມອບໝາຍໜ້າທີ່ຮັບຜິດຊອບຜູ້ບັນຊາການທະຫານເຂດ 3 ໂດຍກະຊວງປ້ອງກັນປະເທດ .
ເຫັນດີຕໍ່ກັບເນື້ອໃນບົດບັນທຶກກອງປະຊຸມມອບ-ຮັບໜ້າທີ່ ແລະຄຳເຫັນປະກອບທີ່ກອງປະຊຸມ, ທ່ານພົນເອກ ຟານວັນຢາງ ຮຽກຮ້ອງໃຫ້ທ່ານພົນຈັດຕະວາ ເລືອງວັນກ໊ຽມ ໃນຖານະຕໍາແໜ່ງໃໝ່ຈົ່ງສືບທອດ, ເສີມຂະຫຍາຍໝາກຜົນ, ຜົນງານທີ່ກໍາລັງທະຫານເຂດ 3 ບັນລຸໄດ້ໃນໄລຍະມໍ່ໆມານີ້, ພ້ອມກັບຄະນະປະຈໍາຄະນະພັກ ແລະກອງບັນຊາການທະຫານເຂດ 3 ປະຕິບັດໜ້າທີ່ຢ່າງທັນທີ; ເອົາໃຈໃສ່ເຖິງການຊີ້ນຳນໍາພາ, ສົມທົບກັບທ້ອງຖິ່ນ ເພື່ອກໍ່ສ້າງພື້ນຖານປ້ອງກັນຊາດທົ່ວປວງຊົນ, ກໍ່ສ້າງທ່າສະໜາມປ້ອງກັນຊາດທົ່ວປວງຊົນ ຕິດພັນກັບທ່າສະໜາມປ້ອງກັນຄວາມສະຫົງບປະຊາຊົນ ແລະ “ທ່າສະໜາມໃນໃຈປະຊາຊົນ” ໃຫ້ນັບມື້ນັບໝັ້ນຄົງເຂັ້ມແຂງ.
|
|
 |
|
ທ່ານພົນຕີ ຫງວຽນກວາງຫງອກ ກ່າວຄໍາເຫັນທີ່ກອງປະຊຸມ. ພາບ: qdnd.vn |
ພ້ອມກັນນັ້ນ, ສືບຕໍ່ຊາບຊຶມ ແລະຜັນຂະຫຍາຍປະຕິບັດມະຕິ, ຂໍ້ສະຫຼຸບຂອງກົມການເມືອງ, ສູນກາງພັກ ຢ່າງເຂັ້ມງວດ, ບັນດາຍຸດທະສາດ, ແຜນຮ່າງຂອງຄະນະພັກການທະຫານສູນກາງ, ກະຊວງປ້ອງກັນປະເທດ ກ່ຽວກັບໜ້າທີ່ການທະຫານ, ການປ້ອງກັນຊາດ.
ທ່ານພົນເອກ ຟານວັນຢາງ ຮຽກຮ້ອງໃຫ້ຄະນະພັກ, ກອງບັນຊາການທະຫານເຂດ 3 ສືບຕໍ່ຊີ້ນໍາ, ນໍາພາ, ເບິ່ງແຍງດູແລ, ເສີມຂະຫຍາຍປະສິດທິຜົນການເຄື່ອນໄຫວຝຶກແອບ ສົມທົບກັບການປະຕິບັດວຽກງານຂົນຂວາຍປະຊາຊົນ, ປະກອບສ່ວນກໍ່ສ້າງຮາກຖານການເມືອງຢູ່ທ້ອງຖິ່ນໃຫ້ໝັ້ນຄົງໃຫ້ເຂັ້ມແຂງ; ຊີ້ນຳການປະຕິບັດວຽກງານພະລາທິການ-ເຕັກໂນໂລຢີໃຫ້ດີ, ຄຸ້ມຄອງ, ນຳໃຊ້, ຊຳລະສະສາງສະຫຼຸບບັນຊີດ້ານການເງິນໃຫ້ຖືກຕາມຂໍ້ກໍານົດ, ລະບຽບການ, ຫຼັກການ. ຍູ້ແຮງຂະບວນການເພີ່ມພູນຜະລິດຜົນ, ປະຕິບັດການປະຢັດ, ຕ້ານການຟຸມເຟືອຍ; ປັບປຸງ ແລະຍົກສູງຊີວິດການເປັນຢູ່ທາງດ້ານວັດຖຸ ແລະ ຈິດໃຈໃຫ້ແກ່ທະຫານຢ່າງບໍ່ຢຸດຢັ້ງ...
|
|
 |
|
ທ່ານພົນເອກ ຟານວັນຢາງ ລັດຖະມົນຕີກະຊວງປ້ອງກັນປະເທດ ອວຍພອນທ່ານພົນຈັດຕະວາ ເລືອງວັນກ໊ຽມ. ພາບ: qdnd.vn |
ທ່ານລັດຖະມົນຕີກະຊວງປ້ອງກັນປະເທດ ສະແດງຄວາມເຊື່ອໝັ້ນວ່າ ໃນຖານະຕໍາແໜ່ງໃໝ່, ທ່ານພົນຕີ ຫງວຽນກວາງຫງອກ ຈະເສີມຂະຫຍາຍຄວາມຮູ້ຄວາມສາມາດ ແລະປະສົບການເປັນຢ່າງດີ; ທ່ານພົນຈັດຕະວາ ເລືອງວັນກ໊ຽມ ຈະພ້ອມກັບຄະນະພັກ, ກອງບັນຊາການທະຫານເຂດ 3 ເສີມຂະຫຍາຍປະຊາທິປະໄຕ, ຄວາມສາມັກຄີ, ເປັນເອກະພາບສູງ; ສົມທົບກັນຢ່າງແໜ້ນແຟ້ນກັບຄະນະພັກ ແລະອຳນາດການປົກຄອງທ້ອງຖິ່ນຢູ່ບໍລິເວນຂອງທະຫານເຂດ, ຊີ້ນໍານຳພາກຳລັງປະກອບອາວຸດທະຫານເຂດ 3 ປະຕິບັດສຳເລັດໜ້າທີ່ການທະຫານ, ການປ້ອງກັນຊາດຢູ່ທ້ອງຖິ່ນໃຫ້ເປັນຢ່າງດີ, ຕອບສະໜອງຄວາມຮຽກຮ້ອງຕ້ອງການ ແລະ ໜ້າທີ່ວຽກງານປົກປັກຮັກສາປະເທດຊາດໃນສະພາບການໃໝ່.
ໂດຍ: ທູຈາງ