ຊຸກຍູ້ການພົວພັນຫວຽດນາມ - ນອກແວ ໃຫ້ພັດທະນາຢ່າງມີປະສິດທິຜົນ ແລະແທດຈິງ
ກປ.ອອນໄລ - ຕອນບ່າຍວັນທີ 20 ມັງກອນ, ຢູ່ສໍານັກງານກະຊວງການຕ່າງປະເທດ, ທ່ານນາງ ເລທິທູຮັ່ງ ຮອງລັດຖະມົນຕີກະຊວງການຕ່າງປະເທດຫວຽດນາມ ໄດ້ໃຫ້ການຕ້ອນຮັບຄະນະຜູ້ແທນສະມາຊິກລັດຖະສະພານອກແວ ໂດຍທ່ານນາງ Aslaug Sem-Jacobsen, ຮອງປະທານຄະນະກໍາມາທິການປະຈໍາສະພາແຫ່ງຊາດ ກ່ຽວກັບບັນຫາວັດທະນະທໍາ ແລະຄອບຄົວນອກແວ ນໍາໜ້າພ້ອມກັບບັນດາສະມາຊິກລັດຖະສະພາກໍາມາທິການພົວພັນຕ່າງປະເທດ ແລະປ້ອງກັນຊາດ, ການຄ້າ ແລະອຸດສາຫະກຳ, ຍຸຕິທຳ, ການສຶກສາ ແລະຄົ້ນຄ້ວາ, ສາທາລະນະສຸກ ທີ່ພວມມີຢ້ຽມຢາມຫວຽດນາມ.
ທີ່ການຕ້ອນຮັບ, ທ່ານນາງ ເລທິທູຮັ່ງ ຢືນຢັນວ່າ ຫວຽດນາມ ຖືເປັນສຳຄັນການພົວພັນມິດຕະພາບ ແລະການຮ່ວມມືຫຼາຍດ້ານກັບນອກແວ, ຊົມເຊີຍສອງຝ່າຍພວມມຸ່ງໄປເຖິງການລົງນາມຈົດໝາຍເຈດຈໍານົງກ່ຽວກັບການສ້າງຕັ້ງຄູ່ຮ່ວມມືຍຸດທະສາດສີຂຽວ ຫວຽດນາມ - ນອກແວ ເພື່ອແນໃສ່ເພີ່ມທະວີການຫັນປ່ຽນສີຂຽວ, ເສດຖະກິດໝູນວຽນ ແລະການປັບຕົວກັບການປ່ຽນແປງດິນຟ້າອາກາດ.
    |
 |
|
ບັນຍາກາດທີ່ການຕ້ອນຮັບ. ພາບ: ຊວນເຊີນ |
ຊົມເຊີຍການຮ່ວມມືເສດຖະກິດທາງທະເລລະຫວ່າງສອງຝ່າຍ, ທ່ານນາງຮອງລັດຖະມົນຕີ ສະເໜີໃຫ້ບັນດາສະມາຊິກລັດຖະສະພານອກແວ ໜູນຊ່ວຍຫວຽດນາມ ໃນການຍົກເລີກບັດເຫຼືອງກ່ຽວກັບການຫາປາຜິດກົດໝາຍ, ບໍ່ລາຍງານ ແລະບໍ່ປະຕິບັດຕາມລະບຽບການ (IUU) ຂອງຄະນະກຳມະການເອີຣົບ (EC) ກ່ຽວກັບການສົ່ງອອກສິນທະເລຂອງຫວຽດນາມ, ຊ່ວຍຫວຽດນາມ ລ້ຽງສິນໃນນໍ້າແບບຍືນຍົງ. ສ່ວນທ່ານນາງ Sem-Jacobsen ຢືນຢັນຄຳໝັ້ນສັນຍາຢ່າງແຮງຂອງສະພາແຫ່ງຊາດນອກແວ ໃນການຊຸກຍູ້ການພົວພັນກັບ ຫວຽດນາມ ໃຫ້ພັດທະນາຢ່າງມີປະສິດທິຜົນ ແລະແທດຈິງ.
ສອງຝ່າຍໄດ້ສະຫງວນເວລາປຶກສາຫາລືບັນດາບັນຫາສາກົນ ແລະພາກພື້ນທີ່ຕ່າງຝ່າຍຕ່າງມີຄວາມສົນໃຈ; ເຫັນດີເປັນເອກະສັນກ່ຽວກັບການເພີ່ມທະວີການສົມທົບກັນແກ້ໄຂບັນດາສິ່ງທ້າທາຍທົ່ວໂລກ, ສະໜັບສະໜູນຢ່າງແຂງແຮງກ່ຽວກັບການແກ້ໄຂຂໍ້ຂັດແຍ່ງຢູ່ທະເລຕາເວັນອອກໂດຍສັນຕິວິທີ, ສອດຄ່ອງກັບກົດໝາຍສາກົນ ແລະສົນທິສັນຍາຂອງສະຫະປະຊາຊາດ ກ່ຽວກັບກົດໝາຍວ່າດ້ວຍທະເລປີ 1982, ປະກອບສ່ວນເຂົ້າໃນການຮັບປະກັນຄວາມປອດໄພ, ຄວາມເສລີໃນການເດີນທະເລ, ປະກອບສ່ວນປັບປຸງສັນຕິພາບ, ສະຖຽນລະພາບ ແລະວັດທະນາຖາວອນຢູ່ພາກພື້ນ ແລະໃນໂລກ.
ໂດຍ: ທະນາພອນ