ລາດຕະເວນສອງຝ່າຍປົກປັກຮັກສາຊາຍແດນທາງບົກຫວຽດນາມ-ຈີນ

ສອງຝ່າຍດໍາເນີນພິທີເຄົາລົບຫຼັກໝາຍຊາຍແດນ. ພາບ: ຮຸຍເຢືອງ

ທີ່ພິທີເລີ່ມດໍາເນີນການລາດຕະເວນຮ່ວມ, ຄະນະຊີ້ນໍາການລາດຕະເວນສອງຝ່າຍ ໄດ້ເນັ້ນໜັກວ່າ ວຽກງານສົມທົບກັນລາດຕະເວນຮ່ວມແມ່ນໂອກາດເພື່ອເພີ່ມທະວີຄວາມເຂົ້າໃຈ, ຄວາມເຊື່ອໝັ້ນເຊິ່ງກັນ ແລະກັນລະຫວ່າງທະຫານຊາຍແດນສອງປະເທດ; ພ້ອມທັງຊຸກຍູ້ການຮໍ່າຮຽນ ແລະແລກປ່ຽນບົດຮຽນກ່ຽວກັບການລາດຕະເວນ, ຄວບຄຸມ, ຄຸ້ມຄອງຊາຍແດນລະຫວ່າງສອງຝ່າຍ.

ຫຼັງຈາກນັ້ນ, ສອງຝ່າຍໄດ້ດໍາເນີນການລາດຕະເວນຕອນເສັ້ນຊາຍແດນ ແຕ່ຫຼັກໝາຍທີ 807 ຮອດຫຼັກໝາຍທີ 808 ແລະແຕ່ຫຼັກໝາຍທີ 813 ຮອດຫຼັກໝາຍທີ 816; ພ້ອມກັນການລາດຕະເວນ ແລະຮັກສາຄວາມເປັນລະບຽບຮຽບຮ້ອຍຢູ່ເຂດຊາຍແດນ. ຜ່ານການກວດກາບໍ່ພົບເຫັນການກະທໍາທີ່ລະເມີດກົດໝາຍຄືຄ້າເຖື່ອນ, ການເຂົ້າ-ອອກເມືອງຜິດກົດໝາຍ...; ເຂດຊາຍແດນສອງຝ່າຍມີສະຖຽນລະພາບ, ຫຼັກໝາຍຊາຍແດນຍັງຢູ່ໃນສະພາບເດີມ. ໃນວິວັດການລາດຕະເວນຮ່ວມ, ສອງຝ່າຍໄດ້ສົມທົບໂຄສະນານະໂຍບາຍ, ກົດໝາຍ, ຊ່ວຍປະຊາຊົນທີ່ຢູ່ສອງຟາກຊາຍແດນຍົກສູງຄວາມຮູ້ໃນການປະຕິບັດຂໍ້ກໍານົດກ່ຽວກັບຊາຍແດນ, ຄື: ສັນຍາກ່ຽວກັບກົດລະບຽບຄຸ້ມຄອງຊາຍແດນທາງບົກລະຫວ່າງ ຫວຽດນາມ-ຈີນ,  ອະນຸສັນຍາແບ່ງເສັ້ນຂີດຫຼັກໝາຍຊາຍແດນທາງບົກຫວຽດນາມ-ຈີນ ແລະບັນດາຂໍ້ຕົກລົງທີ່ກ່ຽວຂ້ອງເຊິ່ງສອງຝ່າຍໄດ້ລົງນາມ.

ຜູ້ບັນຊາການກອງລາດຕະເວນສອງຝ່າຍ ກວດກາຫຼັກໝາຍຊາຍແດນ. ພາບ: ຮຸຍເຢືອງ

ຜູ້ບັນຊາການກອງລາດຕະເວນສອງຝ່າຍ ລົງນາມ, ແລກປ່ຽນບົດບັນທຶກຊ່ວຍຈໍາການລາດຕະເວນຮ່ວມ. ພາບ: ຮຸຍເຢືອງ

ຜ່ານວຽກງານສົມທົບກັນລາດຕະເວນ, ສອງຝ່າຍໄດ້ແລກປ່ຽນ, ເຫັນດີເປັນເອກະພາບ: ສອງຝ່າຍສືບຕໍ່ເພີ່ມທະວີການຮ່ວມມືຄຸ້ມຄອງ, ປົກປັກຮັກສາຊາຍແດນຕາມເອກະສານນິຕິກໍາຊາຍແດນທາງບົກຫວຽດນາມ-ຈີນ ສາມສະບັບ ແລະບັນດາຂໍ້ຕົກລົງ ເຊິ່ງສອງຝ່າຍໄດ້ລົງນາມໃຫ້ຫຼາຍກວ່າອີກ; ເພີ່ມທະວີການໂຄສະນາ, ສຶກສາ, ຄຸ້ມຄອງປະຊາຊົນຢູ່ເຂດຊາຍແດນຢ່າງແໜ້ນແຟ້ນ; ຄົ້ນພົບ, ປ້ອງກັນ ແລະແກ້ໄຂບັນດາການກະທໍາລະເມີດກົດໝາຍຊາຍແດນຢ່າງທັນການ. ສອງຝ່າຍເຫັນດີເປັນເອກະພາບສືບຕໍ່ຮັກສາການເຄື່ອນໄຫວລາດຕະເວນຮ່ວມຢູ່ຊາຍແດນ; ແລກປ່ຽນ ແລະແຈ້ງໃຫ້ກັນຮັບຊາບສະພາບການທີ່ກ່ຽວຂ້ອງເຖິງການຄຸ້ມຄອງຊາຍແດນຢ່າງທັນການ; ສົມທົບກັນແກ້ໄຂບັນດາຄະດີ, ເຫດການທີ່ເກີດຂຶ້ນຢູ່ຂັ້ນຮາກຖານໃຫ້ມີປະສິດທິຜົນ, ພ້ອມກັນກໍ່ສ້າງຊາຍແດນສັນຕິພາບ, ມິດຕະພາບ, ສະຖຽນລະພາບ ແລະພັດທະນາ.

ສິ້ນສຸດການລາດຕະເວນ, ຜູ້ບັນຊາການສອງຝ່າຍໄດ້ດໍາເນີນພິທີລົງນາມໃນບົດບັນທຶກຊ່ວຍຈໍາການລາດຕະເວນສອງຝ່າຍ.

ໂດຍ: ໄຊນີດາ