ໃນຕະຫຼອດໄລຍະວາງສະແດງ, ສື່ມວນຊົນພາຍໃນປະເທດ ແລະສາກົນໄດ້ອັບເດັດ ແລະໃຫ້ຂ່າວສົດໆຮ້ອນໆກ່ຽວກັບພິທີເປີດຂະໜາດໃຫຍ່, ສ້າງຄວາມປະທັບໃຈ, ກ່ຽວກັບອຸປະກອນ, ອາວຸດ, ເຕັກໂນໂລຢີໃໝ່ ຫຼື ກ່ຽວກັບການພົບປະລະຫວ່າງບັນດາຄູ່ຮ່ວມມື. ການປະຊຸມຂ່າວຂອງເອກອັກຄະລັດຖະທູດ, ເຈົ້າໜ້າທີ່ປ້ອງກັນຊາດປະເທດຕ່າງໆທີ່ດຳເນີນຢູ່ງານວາງສະແດງລ້ວນແຕ່ມີການໂຄສະນາຂອງນັກຂ່າວສາກົນ.
ມີໜ້າແຕ່ຫົວທີຢູ່ງານວາງສະແດງແມ່ນກຸ່ມນັກຂ່າວ, ນັກຊ່ຽວຊານວິເຄາະດ້ານການທະຫານຂອງກຸ່ມບໍລິສັດສື່ມວນຊົນ Army Recognition ມີສໍານັກງານຢູ່ແບນຊິກ. ນັກຂ່າວ Halna du Fretay Erwan ຂອງ Army Recognition ໃຫ້ຂໍ້ສັງເກດວ່າ: “ຂ້າພະເຈົ້າ ຮູ້ສຶກປະຫຼາດໃຈທີ່ຮູ້ວ່ານີ້ແມ່ນຄັ້ງທີ 2 ທີ່ຫວຽດນາມ ຈັດຕັ້ງງານວາງສະແດງປ້ອງກັນຊາດ. ພວກເພື່ອນເຮັດໄດ້ດີຫຼາຍ. ພວກຂ້າພະເຈົ້າ ເຄີຍເຂົ້າຮ່ວມງານວາງສະແດງປ້ອງກັນຊາດຫຼາຍແລ້ວບໍ່ແມ່ນວ່າປະເທດໃດກໍ່ຈັດຕັ້ງຢ່າງລອບຄອບ, ມີແບບມີແຜນດ້ວຍຂະໜາດໃຫຍ່ຄືຢູ່ຫວຽດນາມ”.
    |
 |
|
ນັກຂ່າວທັງພາຍໃນ ແລະຕ່າງປະເທດທີ່ພິທີເປີດງານວາງສະແດງປ້ອງກັນຊາດສາກົນຫວຽດນາມ 2024. ພາບ: ຈ້ອງຫ໋າຍ |
ນັກຂ່າວ Michael Chaussee ໃຫ້ຂໍ້ສັງເກດວ່າ ເຂດວາງສະແດງຢູ່ກາງແຈ້ງໃຫຍ່ໂຕໂອໂຖງ. ນັກຂ່າວສາມາດສັງເກດກັບຕາຍານຍົນສູ້ຮົບ "ແທ້" ຫາກບໍ່ແມ່ນຮູບຈໍາລອງ. ພາຫະນະ, ອາວຸດ ແລະອຸປະກອນແມ່ນມີຫຼາຍປະເພດ. ນັກຂ່າວ Chaussee ໃຫ້ຮູ້ວ່າ: “ມັນສະແດງໃຫ້ເຫັນການພັດທະນາຢ່າງແຂງແຮງຂອງຂະແໜງອຸດສາຫະກໍາປ້ອງກັນຊາດຫວຽດນາມ, ຄວາມດຶງດູດຂອງງານວາງສະແດງດ້ວຍການເຂົ້າຮ່ວມຂອງວິສາຫະກິດນັບຮ້ອຍແຫ່ງທີ່ມາຈາກຫຼາຍປະເທດໃນໂລກ.
ໃນມື້ທໍາອິດພວກຂ້າພະເຈົ້າ ພຽງແຕ່ຢ້ຽມຢາມເຂດວາງສະແດງຢູ່ກາງແຈ້ງ, ໃນມື້ທີສອງ, ຈຶ່ງຢ້ຽມຢາມຮ້ານວາງສະແດງໃນຮົ່ມ, ຮຽນຮູ້ ແລະຄົ້ນຄວ້າຢ່າງລະອຽດກ່ຽວກັບຜະລິດຕະພັນ, ເຕັກໂນໂລຢີຫຼາຍປະເພດທີ່ນັກທຸລະກິດສາກົນນໍາມາງານວາງສະແດງ. ນັກຂ່າວ Halna du Fretay Erwan ສະແດງຄວາມປະທັບໃຈວ່າ: “ຍາກທີ່ຈະວາດນຶກໄດ້ວ່າທ່ານຈະໄດ້ເຫັນອຸປະກອນ, ອາວຸດຂອງສະຫະລັດອາເມລິກາ, ອັງກິດ, ລັດເຊຍ, ຝຣັ່ງ, ຈີນ, ຍີ່ປຸ່ນ... ຢູ່ທີ່ນີ້. ການອອກແບບ, ການຕົບແຕ່ງ, ການຈັດວາງແສງສະຫວ່າງຢູ່ຮ້ານວາງສະແດງລ້ວນແຕ່ໂດດເດັ່ນທີ່ສຸດ. ການມີໜ້າຂອງບັນດາປະເທດມະຫາອຳນາດດ້ານການທະຫານຢູ່ທີ່ນີ້ແມ່ນຫຼັກຖານສະແດງໃຫ້ເຫັນວ່າ ຫວຽດນາມ ມີໂອກາດຮ່ວມມືຫຼາຍຢ່າງກັບບັນດາປະເທດນີ້”.
|
|
 |
|
ແຂກມາຊົມເຂດວາງສະແດງອຸດສາຫະກຳປ້ອງກັນຊາດຫວຽດນາມ ເປັນຈຳນວນຫຼວງຫຼາຍ. ພາບ: ຈູງແທັ່ງ |
ຕາມສຳນັກຂ່າວສານ Reuters (ອັງກິດ) ແລ້ວ, ທີ່ງານວາງສະແດງ, ຫວຽດນາມ ໄດ້ແນະນຳບັນດາຜະລິດຕະພັນໂດຍອຸດສາຫະກຳປ້ອງກັນຊາດພາຍໃນປະເທດຜະລິດ. ງານວາງສະແດງດັ່ງກ່າວຖືກຈັດຂຶ້ນໃນສະພາບທີ່ຫວຽດນາມ ມານະພະຍາຍາມພັດທະນາອຸດສາຫະກຳປ້ອງກັນຊາດ, ຊອກຫາກາລະໂອກາດສົ່ງອອກຜະລິດຕະພັນອຸດສາຫະກຳປ້ອງກັນຊາດແມ່ນບຸລິມະສິດ. ງານວາງສະແດງຄັ້ງນີ້ມີເກືອບ 250 ວິສາຫະກິດວາງສະແດງ, ໃນນັ້ນມີວິສາຫະກິດແຖວໜ້າຂອງບັນດາປະເທດມະຫາອຳນາດ. Reuters ຄັດຄໍາເວົ້າຂອງທ່ານ ຟ້າມມິງຈິ໊ງ ນາຍົກລັດຖະມົນຕີ ທີ່ພິທີເປີດງານວາງສະແດງວ່າ: ງານວາງສະແດງປ້ອງກັນຊາດສາກົນຫວຽດນາມ 2024 ມີຄວາມໝາຍພິເສດ, ແມ່ນເຫດການສາກົນທີ່ພົ້ນເດັ່ນດ້ວຍສານ “ສັນຕິພາບ, ຮ່ວມມື ແລະພ້ອມກັນພັດທະນາ”. ສໍານັກຂ່າວສານ TASS (ລັດເຊຍ) ໃສ່ໃຈວ່າ ໂດຍໄດ້ຮັບການຈັດຕັ້ງເນື່ອງໃນໂອກາດາສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ ແລະ 35 ປີແຫ່ງວັນບຸນທົ່ວປວງຊົນປ້ອງກັນຊາດ, ງານວາງສະແດງໄດ້ສະແດງໃຫ້ເຫັນຄວາມປາຖະໜາຂອງຫວຽດນາມ ທີ່ຢາກຮ່ວມມືກັບບັນດາປະເທດ ເພື່ອໂລກສັນຕິພາບ, ສະຖຽນລະພາບ ແລະຄວາມວັດທະນາຖາວອນ.
ໃນຂະນະນັ້ນ, ຕາມສຳນັກຂ່າວສານ AFP (ຝຣັ່ງ), ຫວຽດນາມ ໄດ້ຈັດຕັ້ງງານວາງສະແດງແນໃສ່ຫັນການຮ່ວມມືຊື້, ຮັບເອົາ ແລະຖ່າຍທອດເຕັກໂນໂລຢີ ເພື່ອການຜະລິດປ້ອງກັນຊາດເປັນຫຼາຍຮູບຫຼາຍແບບ. ນັກຊ່ຽວຊານ ຫງວຽນຄັ໊ກຢາງ ຢູ່ສະຖາບັນຄົ້ນຄວ້າອາຊີຕາເວັນອອກສຽງໃຕ້ (ISEAS-Yusof Ishak) ຂອງ ສິງກະໂປ ເນັ້ນໜັກວ່າ: ການຫັນເປັນຫຼາຍຮູບຫຼາຍແບບ “ບໍ່ພຽງແຕ່ມີຄວາມຈຳເປັນເທົ່ານັ້ນ ຫາກຍັງແມ່ນໂອກາດເພື່ອໃຫ້ຫວຽດນາມ ເຂົ້າເຖິງບັນດາລະບົບອາວຸດທີ່ທັນສະໄໝກວ່າ”. ວາລະສານ Newsweek (ອາເມລິກາ) ໃຫ້ຂໍ້ສັງເກດວ່າ ງານວາງສະແດງແມ່ນພື້ນຖານສຳຄັນເພື່ອສະແດງໃຫ້ເຫັນຄວາມຕັດສິນໃຈຂອງຫວຽດນາມ ໃນການຫັນກອງທັບຫວຽດນາມ ເປັນທັນສະໄໝ. ເຫດການນີ້ສະແດງໃຫ້ເຫັນຄວາມມານະພະຍາຍາມຂອງຫວຽດນາມ ແນໃສ່ຫຼຸດຜ່ອນການຂຶ້ນກັບຕ່າງປະເທດດ້ວຍການວາງສະແດງອຸປະກອນ, ອາວຸດທີ່ຜະລິດຢູ່ພາຍໃນປະເທດ.
ວາລະສານ Nikkei Asia (ຍີ່ປຸ່ນ) ຕີລາຄາວ່າ ງານວາງສະແດງປ້ອງກັນຊາດສາກົນຫວຽດນາມ 2024 ແມ່ນ “ໜຶ່ງໃນບັນດາງານວາງສະແດງໃຫຍ່ທີ່ສຸດຢູ່ອາຊີຕາເວັນອອກສ່ຽງໃຕ້” ເມື່ອຫວຽດນາມ ພວມມານະພະຍາຍາມຫັນອາວຸດ, ອຸປະກອນເຕັກນິກເປັນທັນສະໄໝ ແລະຫັນການຮ່ວມມືຊື້ອຸປະກອນ, ອາວຸດເປັນຫຼາຍຮູບຫຼາຍແບບ. ງານວາງສະແດງໄດ້ຈັດຂຶ້ນ 2 ປີເທື່ອໜຶ່ງ, ສ້າງກາລະໂອກາດໃຫ້ບັນດາຫົວໜ່ວຍ, ວິສາຫະກິດແນະນຳ, ວາງສະແດງຜະລິດຕະພັນ, ຊອກຫາກາລະໂອກາດເປີດກວ້າງການຮ່ວມມື. ຕາມສຳນັກຂ່າວສານແຫ່ງລັດ IRNA ຂອງ ອີຣານ ແລ້ວ, ງານວາງສະແດງດັ່ງກ່າວໄດ້ສ້າງໂອກາດເປີດກວ້າງການຮ່ວມມືສາກົນໃນຂົງເຂດເຕັກໂນໂລຢີປ້ອງກັນຊາດ ແລະປ້ອງກັນຄວາມສະຫງົບໃຫ້ອີຣານ. ຜ່ານງານວາງສະແດງ, ອີຣານ ປາດຖະໜາຢາກເພີ່ມທະວີການພົວພັນຮ່ວມມືດ້ານປ້ອງກັນຊາດກັບບັນດາປະເທດ ແລະຊຸກຍູ້ການຖ່າຍທອດເຕັກໂນໂລຢີ ກໍ່ຄືຂໍ້ລິເລີ່ມຮ່ວມມືລວມ.
ສື່ມວນຊົນສາກົນລ້ວນແຕ່ໃຫ້ຂໍ້ສັງເກດວ່າ, ງານວາງສະແດງແມ່ນເຫດການທີ່ດຶງດູດບັນດາວິສາຫະກິດອຸດສາຫະກຳປ້ອງກັນຊາດໃນໂລກ. ສໍານັກຂ່າວສານ Caliber (ອາແຊກໄບຊານ) ເນັ້ນໜັກວ່າ, ງານວາງສະແດງດັ່ງກ່າວມີການເຂົ້າຮ່ວມຂອງວິສາຫະກິດອຸດສາຫະກຳປ້ອງກັນຊາດຫຼາຍແຫ່ງທີ່ມາຈາກ 49 ປະເທດ, ລວມມີບໍລິສັດໃຫຍ່ທີ່ມາຈາກອາເມລິກາ, ເອີຣົບ ແລະຫຼາຍປະເທດ. ສິ່ງເຫຼົ່ານັ້ນສະແດງໃຫ້ເຫັນຖານະບົດບາດນັບມື້ນັບເພີ່ມຂຶ້ນຂອງຫວຽດນາມ ໃນເວທີສາກົນ.
ໂດຍ: ເຈິ່ນຮວ່ຽນ