ທ່ານ Fabio De Cillis ຫົວໜ້າຫ້ອງການການຄ້າອີຕາລີ ປະຈຳຫວຽດນາມ (ITA): ຊອກຫາກາລະໂອກາດເປີດກວ້າງການຮ່ວມມືກັບບັນດາວິສາຫະກິດຫວຽດນາມ
ທີ່ງານວາງສະແດງປ້ອງກັນຊາດສາກົນຫວຽດນາມ 2024, ITA ໄດ້ແນະນຳ 10 ວິສາຫະກິດອີຕາລີ ໃນຂົງເຂດປ້ອງກັນຊາດ. ທ່ານ Fabio De Cillis ໃຫ້ຮູ້ວ່າ: “ບັນດາວິສາຫະກິດອີຕາລີ ທີ່ເຂົ້າຮ່ວມງານວາງສະແດງ ລ້ວນແຕ່ຊອກຫາກາລະໂອກາດເປີດກວ້າງການຮ່ວມມື, ດ້ວຍເປົ້າໝາຍບໍ່ພຽງແຕ່ສ້າງການພົວພັນດ້ານການຄ້າກັບບັນດາບໍລິສັດຂອງຫວຽດນາມ ເທົ່ານັ້ນ, ຫາກຍັງຮ່ວມມືກັບລັດຖະບານຫວຽດນາມ ອີກດ້ວຍ”.
    |
 |
|
ທ່ານ Fabio De Cillis ຫົວໜ້າຫ້ອງການການຄ້າອີຕາລີ ປະຈໍາ ຫວຽດນາມ (ຊ້າຍ) ຕ້ອນຮັບ ທ່ານ Matteo Perego di Cremnago ຮອງລັດຖະມົນຕີກະຊວງປ້ອງກັນປະເທດອີຕາລີ ມາຢ້ຽມຢາມຮ້ານວາງສະແດງ. ພາບ: ງອກທື. |
ຕາມທ່ານ Fabio De Cillis ແລ້ວ, ເມື່ອທຽບໃສ່ງານວາງສະແດງຄັ້ງທຳອິດກ່ອນນີ້ 2 ປີ, ງານວາງສະແດງຄັ້ງນີ້ໄດ້ຮັບການເປີດກວ້າງທັງຂະໜາດ ແລະຈຳນວນວິສາຫະກິດ ແລະປະເທດເຂົ້າຮ່ວມ. ງານວາງສະແດງຄັ້ງນີ້ບໍ່ພຽງແຕ່ດຶງດູດບັນດາວິສາຫະກິດ, ບຸກຄົນທີ່ມີຄວາມຮູ້ ແລະເອົາໃຈໃສ່ເຖິງຂົງເຂດປ້ອງກັນຊາດ, ປ້ອງກັນຄວາມສະຫງົບເທົ່ານັ້ນ, ຫາກຍັງໄດ້ຮັບຄວາມເອົາໃຈໃສ່ຈາກປະຊາຊົນເປັນຈຳນວນຫຼວງຫຼາຍ. ສິ່ງນີ້ສະແດງໃຫ້ເຫັນຄວາມສຳຄັນ ແລະຄວາມໝາຍຂອງເຫດການນີ້. ທ່ານ Fabio De Cillis ແບ່ງປັນວ່າ: “ຂ້າພະເຈົ້າຫວັງວ່າ, ດ້ວຍຂະໜາດນັບມື້ນັບເປີດກວ້າງ, ງານວາງສະແດງປ້ອງກັນຊາດສາກົນຫວຽດນາມ ປີ 2026 ຈະມີຂະໜາດໃຫຍ່ກວ່າ, ຮ້ານວາງສະແດງຂອງອີຕາລີ ຈະໃຫຍ່ກວ່າ ແລະສວຍງາມກວ່າ”.
ທ່ານ Marc Knapper ເອກອັກຄະລັດຖະທູດອາເມລິກາ ປະຈຳຫວຽດນາມ: ອາເມລິກາ ແບ່ງປັນສານ “ສັນຕິພາບ, ຮ່ວມມື ພ້ອມກັນພັດທະນາ” ຂອງຫວຽດນາມ
ໂດຍມີໜ້າທີ່ກອງປະຊຸມຂ່າວ, ເຊິ່ງຈັດຕັ້ງຢູ່ສະໜາມບິນ ຢາເລິມ, ແຫ່ງທີ່ພວມດຳເນີນງານວາງສະແດງປ້ອງກັນຊາດສາກົນ ຫວຽດນາມ 2024 ໃນຕອນເຊົ້າວັນທີ 19 ທັນວາ, ທ່ານເອກອັກຄະລັດຖະທູດ Marc Knapper ແລະທ່ານພົນເອກ Samuel Paparo, ຫົວໜ້າກອງບັນຊາການມະຫາສະໝຸດອິນເດຍ - ປາຊີຟິກ ຂອງອາເມລິກາ ແລະທ່ານ Jedidiah Royal ຮອງຜູ້ຊ່ວຍວຽກລັດຖະມົນຕີຜູ້ປະຈຳການກະຊວງປ້ອງກັນປະເທດອາເມລິການ ຮັບຜິດຊອບບັນຫາຄວາມໝັ້ນຄົງ ຢູ່ມະຫາສະໝຸດອິນເດຍ - ປາຊີຟິກ ລ້ວນແຕ່ສະແດງຄວາມປະທັບໃຈຕໍ່ພິທີໄຂງານວາງສະແດງ. ທ່ານເອກອັກຄະລັດຖະທູດ Marc Knapper ເນັ້ນໜັກວ່າ: “ພວກຂ້າພະເຈົ້າລ້ວນແຕ່ມີຄວາມປະທັບໃຈທີ່ສຸດຕໍ່ງານວາງສະແດງປ້ອງກັນຊາດສາກົນຫວຽດນາມ 2024 ທີ່ຈັດຕັ້ງຢ່າງມີວິຊາຊີບດ້ວຍບັນດາລາຍການສະແດງທີ່ດີເລີດທີ່ພິທີເປີດ, ກໍ່ຄືສານທີ່ວ່າ “ສັນຕິພາບ,ຮ່ວມມື ພ້ອມກັນພັດທະນາ” ໃນບົດກ່າວປາໄສຂອງທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ. ນີ້ແມ່ນສານທີ່ພວກຂ້າພະເຈົ້າຢາກແປ່ງປັນ”.
ບັນດາເຈົ້າໜ້າທີ່ອາເມລິກາ ຊີ້ແຈ້ງວ່າ, ການເຂົ້າຮ່ວມດ້ວຍຂອບຂະໜາດໃຫຍ່ທີ່ບໍ່ເຄີຍມີມາກ່ອນ, ທັງດ້ານບຸກຄະລາກອນ ແລະເຄື່ອງອຸປະກອນຂອງອາເມລິກາ ຢູ່ງານວາງສະແດງປ້ອງກັນຊາດສາກົນຫວຽດນາມ 2024 ໄດ້ສະແດງໃຫ້ເຫັນຢ່າງຈະແຈ້ງຄໍາໝັ້ນສັນຍາ ແລະການສະໜັບສະໜູນຢ່າງຮງຂອງອາເມລິກາ ຕໍ່ຫວຽດນາມ ທີ່ໝັ້ນຄົງເຂັ້ມແຂງ, ວັດຖະນາຖາວອນ, ເອກະລາດເວົ້າລວມ; ແລະຄວາມມານະພະຍາຍາມຫັນເປັນທັນສະໄໝຂອງກອງທັບປະຊາຊົນຫວຽດນາມ ເວົ້າສະເພາະ. ທ່ານເອກອັກຄະລັດຖະທູດ Marc Knapper ຢືນຢັນວ່າ ອາເມລິກາ ປາດຖະໜາຢາກເພີ່ມທະວີການພົວພັນກັບຫວຽດນາມ ໃຫ້ເລິກເຊິ່ງກ່ວາອີກ. ບັນດາເຈົ້າໜ້າທີ່ອາເມລິກາ ຕີລາຄາວ່າ ບົນພື້ນຖານການພົວພັນສອງຝ່າຍອັນດີງາມ, ການຮ່ວມມືດ້ານປ້ອງກັນຊາດລະຫວ່າງສອງປະເທດໃນໄລຍະຜ່ານມາໄດ້ມີການພັດທະນາຢ່າງແຂງແຮງໃນຂົງເຂດຕ່າງໆ, ນັບແຕ່ເສນາຮັກ, ການແກ້ໄຂຜົນຮ້າຍຢ້ອນຫຼັງຈາກສົງຄາມ, ການຊ່ວຍເຫຼືອມະນຸດສະທຳ, ການຊ່ວຍເຫຼືອກູ້ໄພ, ສ້າງຄວາມສາມາດ, “ນຳມາເຊິ່ງຜົນປະໂຫຍດໃຫ້ແກ່ຫວຽດນາມ, ອາເມລິກາ ແລະທຸກປະເທດ.”
ທ່ານ Sunil BM ຮອງຫົວໜ້າຫ້ອງການຕາງໜ້າບໍລິສັດ Bharat Electronics Limited (BEL): ຜ່ານຈາກງານວາງສະແດງວິສາຫະກິດອິນເດຍ ຢາກເປີດກວ້າງຕະຫຼາດ
ເຂດວາງສະແດງຂອງບັນດາວິສາຫະກິດປ້ອງກັນຊາດອິນເດຍ ຢູ່ໃຈກາງງານວາງສະແດງໃນປີນີ້. ທ່ານ Sunil BM ແບ່ງປັນວ່າ “ຮ້ານວາງສະແດງອິນເດຍ ໄດ້ເຕົ້າໂຮມບັນດາວິສາຫະກິດອຸດສາຫະກໍາປ້ອງກັນຊາດແຖວໜ້າຂອງປະເທດພວກຂ້າພະເຈົ້າ. ພ້ອມກັບ BEL, ຍັງມີອົງການຄົ້ນຄວ້າ ແລະພັດທະນາດ້ານປ້ອງກັນຊາດ (DRDO), Hindustan Aeronautics Limited (HAL)... ພວກຂ້າພະເຈົ້າເຂົ້າຮ່ວມງານວາງສະແດງຄັ້ງນີ້ ດ້ວຍຄວາມປາຖະໜ້າຢາກເປີດກວ້າງຕະຫຼາດ, ເປີດກວ້າງການພົວພັນຮ່ວມມືໃນຂົງເຂດອຸດສາຫະກໍາປ້ອງກັນຊາດ”.
ຂຶ້ນກັບກະຊວງປ້ອງກັນປະເທດອິນເດຍ, ບໍລິສັດ BEL ແມ່ນບໍລິສັດເອເລັກໂຕນິກປ້ອງກັນຊາດແຖວໜ້າຂອງອິນເດຍ ທີ່ຜະລິດບັນດາຜະລິດຕະພັນ ແລະລະບົບເອເລັກໂຕນິກທີ່ທັນສະໄໝໃຫ້ແກ່ກໍາລັງທະຫານບົກ, ທະຫານອາກາດ, ທະຫານເຮືອ, ຕຳຫຼວດທະເລ, ທະຫານຊາຍແດນ ແລະອົງການປ້ອງກັນຄວາມສະຫງົບ. ແມ່ນບໍລິສັດໄດ້ຈັດອັນດັບທີ 56 ໃນບັນດາບໍລິສັດທີ່ມີຄວາມສາມາດປ້ອງກັນຊາດແຖວໜ້າຂອງໂລກ. ຢູ່ຫວຽດນາມ, BEL ໄດ້ເປີດຫ້ອງການຕາງໜ້າຢູ່ຮ່າໂນ້ຍ ນັບແຕ່ປີ 2018. ທ່ານ Sunil BM ໃຫ້ຮູ້ວ່າ, “ພວກຂ້າພະເຈົ້າມີບັນດາຄູ່ຮ່ວມມືສຳຄັນຂອງຫວຽດນາມ ຄື: ກຸ່ມບໍລິສັດອຸດສາຫະກຳ-ໂທລະຄົມມະນາຄົມກອງທັບ (Viettel)… ພວກຂ້າພະເຈົ້າຫວັງວ່າຈະເປີດກວ້າງການຮ່ວມມືກັບບັນດາຄູ່ຮ່ວມມືຫວຽດນາມ ໃນໄລຍະຈະມາເຖິງ”. ທ່ານ Sunil BM ກໍ່ເນັ້ນໜັກວ່າ BEL ພ້ອມແລ້ວທີ່ຈະຖ່າຍທອດເຕັກໂນໂລຢີເພື່ອໜູນຊ່ວຍຫວຽດນາມ ໃນການຍົກສູງຄວາມສາມາດຜະລິດດ້ານປ້ອງກັນຊາດ.
ຕີລາຄາກ່ຽວກັບວຽກງານຈັດຕັ້ງງານວາງສະແດງໃນປີນີ້, ທ່ານ Sunil BM ຖືວ່າ ງານວາງສະແດງໄດ້ຖືກຈັດຕັ້ງດ້ວຍຂະໜາດໃຫຍ່ກວ່າປີ 2022. ເຂດວາງສະແດງກວ້າງໄດ້ສ້າງຄວາມສະດວກໃຫ້ບັນດາວິສາຫະກິດວາງສະແດງຜະລິດຕະພັນຂອງຕົນ ກໍ່ຄືແຂກມາຢ້ຽມຊົມ.
ໂດຍ: ຈາງຫງວຽນ