ກົມໜູນຊ່ວຍການເຄື່ອນໄຫວຮັກສາສັນຕິພາບ ທີ່ສຳນັກງານ ສປຊ ຢ້ຽມຢາມກອງຊ່າງແສງ ເລກ 3 ຂອງຫວຽດນາມ

26 ພະຈິກ 2024 20:16

ກປ.ອອນໄລ - ໃນຂອບເຂດການຢ້ຽມຢາມບັນດາກົມກອງ ຂຶ້ນກັບຄະນະປະຕິບັດງານຄວາມໝັ້ນຄົງຊ່ົວຄາວ ສະຫະປະຊາຊາດ (ສປຊ) ຢູ່ເຂດ Abyei (UNISFA), ວັນທີ 24 ພະຈິກ, ທ່ານ Vadim Potanin, ຫົວໜ້າຜູ້ຕາງໜ້າພະນັກງານຂັ້ນສູງ ຂອງກົມໜູນຊ່ວຍການເຄື່ອນໄຫວຮັກສາສັນຕິພາບຢູ່ສໍານັກງານ ສປຊ, ນິວຢອກ ແລະທ່ານນາງ Uchenna Odenigbo, ຫົວໜ້າພະແນກໜູນຊ່ວຍຄະນະປະຕິບັດງານ UNISFA ໄດ້ມາຢ້ຽມຢາມ ແລະເຮັດວຽກກັບກອງຊ່າງແສງເລກ 3 ຂອງຫວຽດນາມ ແລະສະແດງຄວາມປະທັບໃຈອັນດີງາມ.

ທີ່ການຕ້ອນຮັບ, ທ່ານພັນໂທ ຟ້າມວັນຫາວ, ຫົວໜ້າກອງຊ່າງແສງ ເລກ 3, ຜູ້ບັນຊາການກໍາລັງຂອງຫວຽດນາມ ທີ່ເຂົ້າຮ່ວມການເຄື່ອນໄຫວຮັກສາສັນຕິພາບ ສປຊ ຢູ່ຄະນະປະຕິບັດງານ UNISFA ໄດ້ແນະນໍາກ່ຽວກັບພາລະບົດບາດ, ໜ້າທີ່ຂອງກົມກອງ, ໝາກຜົນທີ່ບັນລຸໄດ້, ວຽກງານທີ່ກໍາລັງປະຕິບັດ ແລະທິດທາງໃນໄລຍະຈະມາເຖິງ.

ນັບແຕ່ໄດ້ຮັບການຜັນຂະຫຍາຍຢູ່ບໍລິເວນດັ່ງກ່າວ, ກອງຊ່າງແສງເລກ 3 ຂອງຫວຽດນາມ ໄດ້ຈັດຕັ້ງຜັນຂະຫຍາຍວຽກງານຮອບດ້ານ, ພົ້ນເດັ່ນແມ່ນວຽກງານສ້ອມແປງ ແລະຍົກລະດັບເສັ້ນທາງສາຍສຳຄັນ ເພື່ອຮັບປະກັນການສະໜອງຂອງຄະນະປະຕິບັດງານ ແລະການເຄື່ອນໄຫວໄປມາຂອງປະຊາຊົນ; ການກໍ່ສ້າງ SmartCamp ຕາມແຜນການຂອງຄະນະປະຕິບັດງານ, ການເຄື່ອນໄຫວໜູນຊ່ວຍດ້ານມະນຸດສະທໍາໃຫ້ແກ່ປະຊາຊົນທ້ອງຖິ່ນໄດ້ຮັບການຕີລາຄາສູງຈາກຄະນະປະຕິບັດງານ.

ຜ່ານການກວດກາ ແລະລົງຢ້ຽມຢາມກົມກອງ, ທ່ານ Vadim Potanin ຕີລາຄາສູງຄວາມສາມາດດ້ານການຈັດຕັ້ງປະຕິບັດໜ້າທີ່ຂອງກໍາລັງຊ່າງແສງ ຫວຽດນາມ, ໃນນັ້ນສະແດງຄວາມປະທັບໃຈຕໍ່ກັບເຕັກນິກການກໍ່ສ້າງເສັ້ນທາງ, ສະໜາມບິນກາງສະໜາມ ແລະSmartCamp, ປະຕິບັດວຽກງານວາງແຜນ ແລະຊັບຊ້ອນເຂດເຕັກນິກເປັນຢ່າງດີ; ນອກຈາກການສະໜອງສະບຽງອາຫານຂອງ ສປຊ, ທະຫານ “ໝວກເບເລສີຟ້າ” ຂອງຫວຽດນາມ ໄດ້ປະຕິບັດວຽກງານວາງແຜນການປູກຜັກເພີ່ມອີກເພື່ອປັບປຸງ ແລະຍົກສູງຊີວິດການເປັນຢູ່, ດັດປັບທັດສະນີຍະພາບສິ່ງແວດລ້ອມ, ທີ່ສະອາດ, ສີຂຽວ, ສວຍງາມ ແລະປ້ອງກັນ, ຕ້ານໂລກລະບາດ. ທ່ານ Vadim Potanin ຮຽກຮ້ອງໃຫ້ກອງຊ່າງແສງເລກ 3 ຂອງຫວຽດນາມ ເປັນເຈົ້າການແກ້ໄຂຄວາມຫຍຸ້ງຍາກເພື່ອສືບຕໍ່ປະຕິບັດໜ້າທີ່ທີ່ສະຫະປະຊາຊາດມອບໝາຍໃຫ້ເປັນຢ່າງດີ, ພ້ອມກັບການເຄື່ອນໄຫວໜູນຊ່ວຍທ້ອງຖິ່ນໃຫ້ເປັນປົກກະຕິ ແລະພັດທະນາ.