ໂດຍເປັນຫົວໜ້າກ້ອນກຳລັງກອງທັບປະຊາຊົນລາວ ທີ່ເຂົ້າຮ່ວມພິທີເດີນຂະບວນ, ສວນສະໜາມຄັ້ງນີ້, ທ່ານ ຮ້ອຍໂທ ກາຈິມີໄຊ ແບ່ງປັນວ່າ: “ນີ້ແມ່ນຄັ້ງທຳອິດທີ່ຂ້າພະເຈົ້າເຂົ້າຮ່ວມພິທີເດີນຂະບວນ, ສວນສະໜາມ, ຂ້າພະເຈົ້າຮູ້ສຶກວ່າ ປະຊາຊົນຫວຽດນາມ ໄດ້ໃຫ້ການຕ້ອນຮັບຢ່າງອົບອຸ່ນ, ສຸດຈິດສຸດໃຈຫຼາຍ, ຄືດັ່ງຕ້ອນຮັບຄະນະທະຫານໄດ້ຮັບໄຊຊະນະກັບຄືນ. ເຖິງວ່າ ອາກາດປ່ຽນແປງຢ່າງຕໍ່ເນື່ອງ, ແຕ່ພວກຂ້າພະເຈົ້າກໍ່ຍັງຝຶກແອບດ້ວຍຈິດໃຈສູງສຸດ. ຂ້າພະເຈົ້າຮູ້ສຶກມີຄວາມຕື້ນຕັນໃຈ, ເປັນກຽດ ແລະເອກອ້າງທະນົງໃຈທີ່ສຸດ”.

leftcenterrightdel
ກ້ອນກໍາລັງກອງທັບປະຊາຊົນລາວ. ພາບ: qdnd.vn

ໃນການພົບປະ, ລະດົມກຳລັງໃຈທະຫານ 405 ຄົນທີ່ມາຈາກກອງທັບ 4 ປະເທດ ເພື່ອເຂົ້າຮ່ວມພິທີເດີນຂະບວນ, ສວນສະໜາມຄັ້ງນີ້ ໃນຕອນບ່າຍວັນທີ 29 ສິງຫາ ຢູ່ຮ່າໂນ້ຍ, ທ່ານ ພົນໂທ ຮວ່າງຊວັນຈຽນ, ຮອງລັດຖະມົນຕີກະຊວງປ້ອງກັນປະເທດຫວຽດນາມ ຢັ້ງຢືນວ່າ: “ການມີໜ້າຂອງພວກເພື່ອນແມ່ນສັນຍາລັກທີ່ມີຊີວິດຊີວາຂອງນ້ຳໃຈສາມັກຄີສາກົນອັນສູງສົ່ງ ແລະແມ່ນຄຳໝັ້ນສັນຍາພ້ອມກັນຮ່ວມແຮງຮ່ວມໃຈສ້າງໂລກ ແລະພາກພື້ນສັນຕິພາບ, ມິດຕະພາບ, ຮ່ວມມື, ພ້ອມກັນພັດທະນາ. ພວກຂ້າພະເຈົ້າເຊື່ອໝັ້ນວ່າ ພວກເພື່ອນຈະຄຽງບ່າຄຽງໄຫຼ່ພ້ອມກັບກຳລັງປະກອບອາວຸດຂອງຫວຽດນາມ ຢູ່ສະໜາມຫຼວງ ບາດິ່ງ ປະຫວັດສາດ, ພ້ອມກັນປະຕິບັດສຳເລັດໜ້າທີ່ເຂົ້າຮ່ວມພິທີສະເຫຼີມສະຫຼອງວັນບຸນໃຫຍ່ຂອງຊາດຫວຽດນາມ”.

leftcenterrightdel
ກ້ອນກໍາລັງກອງທັບບັນດາປະເທດເຂົ້າຮ່ວມການພົບປະໃນຕອນບ່າຍວັນທີ 29 ສິງຫາ ຢູ່ຮ່າໂນ້ຍ. ພາບ: ພາບ: qdnd.vn

ເລື່ອງຫວຽດນາມ ເຊີນບັນດາປະເທດເພື່ອນທີ່ເປັນມູນເຊື້ອເຂົ້າຮ່ວມພິທີສະເຫຼີມສະຫຼອງ ແລະສົ່ງກໍາລັງເຂົ້າຮ່ວມພິທີເດີນຂະບວນ, ສວນສະໜາມຄັ້ງນີ້ໄດ້ສະແດງໃຫ້ເຫັນນໍ້າໃຈມິດຕະພາບ, ຄວາມສາມັກຄີລະຫວ່າງປະຊາຊົນ ແລະກອງທັບຫວຽດນາມ ກັບປະເທດຕ່າງໆ. ຜ່ານນັ້ນ ກໍ່ຢັ້ງຢືນແຜນນະໂຍບາຍ, ແນວທາງການພົວພັນຕ່າງປະເທດເປັນເອກະລາດ, ເປັນເຈົ້າຕົນເອງ, ຫັນເປັນຫຼາຍຝ່າຍ, ຫັນເປັນຫຼາຍຮູບຫຼາຍແບບ, ຫວຽດນາມ ເປັນເພື່ອນມິດ, ເປັນຄູ່ຮ່ວມມືທີ່ໄວ້ເນື້ອເຊື່ອໃຈຂອງບັນດາປະເທດ ແລະເປັນສະມາຊິກທີ່ມີຄວາມຮັບຜິດຊອບໃນປະຊາຄົມສາກົນ.

ໂດຍ: ຈາງຫງວຽນ