ຕີລາຄາສູງກຳລັງຄວາມສາມາດຂອງຂະແໜງອຸດສາຫະກຳປ້ອງກັນຊາດຫວຽດນາມ, ທ່ານພົນຈັດຕະວາ Leang Sovannara, ທີ່ປຶກສາທູດປ້ອງກັນຊາດກຳປູເຈຍ ປະຈຳຫວຽດນາມ ໄດ້ສະແດງຄວາມປະທັບໃຈຕໍ່ວຽກງານຈັດຕັ້ງ ກໍ່ຄືຄຸນນະພາບຂອງຜະລິດຕະພັນທີ່ໄດ້ນຳມາແນະນໍາ, ວາງສະແດງ. ທ່ານພົນຈັດຕະວາ Leang Sovannara ໃຫ້ຮູ້ວ່າ: “ຫວ່າງມໍ່ໆມານີ້ ຂ້າພະເຈົ້າໄດ້ເຂົ້າຮ່ວມງານວາງສະແດງທີ່ພົ້ນເດັ່ນຂອງຫວຽດນາມ 2 ຄັ້ງ ນັ້ນແມ່ນງານວາງສະແດງປ້ອງກັນຊາດສາກົນຫວຽດນາມ 2024 ແລະງານວາງສະແດງຜົນງານຂອງປະເທດ.

ນີ້ລ້ວນແຕ່ແມ່ນງານວາງສະແດງທີ່ມີຂະໜາດດ້ວຍວັດຖຸອຸປະກອນ, ອາວຸດເຕັກໂນໂລຢີໃໝ່ຢູ່ຫຼາຍຂົງເຂດນັບຫຼາຍພັນລາຍການ. ສິ່ງເຫຼົ່ານີ້ ໄດ້ສ້າງຄວາມປະທັບໃຈທີ່ສຸດເມື່ອໄດ້ຢ້ຽມຊົມງານວາງສະແດງຂອງກະຊວງປ້ອງກັນປະເທດຫວຽດນາມ ນັ້ນແມ່ນວຽກງານກະກຽມຢ່າງລະອຽດ, ສະຖານທີ່ວາງສະແດງກວ້າງໃຫຍ່ ດ້ວຍອາວຸດຍຸດໂທປະກອນຫຼາຍຢ່າງ, ເຕັກໂນໂລຢີທັນສະໄໝ”.

leftcenterrightdel
ທ່ານພົນຈັດຕະວາ Leang Sovannara, ທີ່ປຶກສາທູດປ້ອງກັນຊາດກຳປູເຈຍ ປະຈຳ ຫວຽດນາມ ຢ້ຽມຊົມງານວາງສະແດງຂອງກະຊວງປ້ອງກັນປະເທດຫວຽດນາມ. ພາບ: qdnd.vn

ທີ່ປຶກສາທູດປ້ອງກັນຊາດກໍາປູເຈຍ ໃຫ້ຂໍ້ສັງເກດວ່າ ຫວຽດນາມ ບັນລຸໄດ້ ບາດກ້າວຢ່າງວ່ອງໄວໃນຂົງເຂດອຸດສາຫະກໍາປ້ອງກັນຊາດ. ໃນຮອບ 80 ປີ ນັບແຕ່ຍາດໄດ້ເອກະລາດມາຮອດປະຈຸບັນ, ສະແດງອອກໃຫ້ເຫັນຢ່າງຈະແຈ້ງ ການພັດທະນາກະໂດດຂັ້ນກ່ຽວກັບຍຸດໂທປະກອນ, ພື້ນຖານວັດຖຸ-ເຕັກນິກການທະຫານ ກໍ່ຄືເຕັກໂນໂລຢີຜະລິດບັນດາຜະລິດຕະພັນປ້ອງກັນຊາດຂອງຫວຽດນາມ.

ຕາມທ່ານພົນຈັດຕະວາ Leang Sovannara ແລ້ວ, ສິ່ງທີ່ນຳມາວາງສະແດງຢູ່ໃນງານຄັ້ງນີ້ບໍ່ພຽງແຕ່ປະກອບສ່ວນເຊີດຊູໄລຍະທາງທີ່ສະຫງ່າງາມຂອງກອງທັບປະຊາຊົນຫວຽດນາມ ເທົ່ານັ້ນ ຫາກຍັງຢັ້ງຢືນທີ່ຕັ້ງ, ອິດທິພົນຊື່ສຽງທີ່ນັບມື້ນັບເພີ່ມຂຶ້ນຂອງຫວຽດນາມ ຢູ່ເວທີສາກົນ. ທ່ານພົນຈັດຕະວາ Leang Sovannara ສະແດງຄວາມເຊື່ອໝັ້ນວ່າ ໃນອະນາຄົດອັນໃກ້ນີ້, ຫວຽດນາມ ຈະສືບຕໍ່ສະເໜີອາວຸດຍຸດໂທປະກອນຫຼາຍຊະນິດ, ເຕັກໂນໂລຢີທັນສະໄໝ ແລະຈະມີຄວາມປະທັບໃຈກວ່ານີ້ອີກ.

ສຳລັບທ່ານພັນເອກ S. Muthukrishnan, ທີ່ປຶກສາທູດປ້ອງກັນຊາດ ອິນເດຍ ປະຈຳ ຫວຽດນາມ ກໍ່ໃຫ້ຂໍ້ສັງເກດວ່າ ເຂດວາງສະແດງຂອງກະຊວງປ້ອງກັນປະເທດຫວຽດນາມ ແມ່ນໜຶ່ງໃນບັນດາຮ້ານວາງສະແດງທີ່ມີຄວາມປະທັບໃຈເລິກເຊິ່ງທີ່ສຸດຢູ່ທີ່ງານວາງສະແດງ. ທ່ານ ກໍ່ໃຫ້ຮູ້ວ່າ, ທີ່ງານວາງສະແດງຄັ້ງນີ້, ກຸ່ມບໍລິສັດອຸດສາຫະກຳ-ໂທລະຄົມມະນາຄົມກອງທັບ (Viettel) ໄດ້ວາງສະແດງ 50 ຜະລິດຕະພັນເຕັກໂນໂລຢີພົນລະເຮືອນ ແລະການທະຫານ, ໃນນັ້ນ ມີຫຼາຍຜະລິດຕະພັນຂຶ້ນກັບບັນດາກຸ່ມເຕັກໂນໂລຢີຍຸດທະສາດແຫ່ງຊາດ. ທີ່ປຶກສາທູດປ້ອງກັນຊາດອິນເດຍ ໃຫ້ຂໍ້ສັງເກດວ່າ, ບັນດາຜະລິດຕະພັນຂອງ Viettel ໄດ້ເຂົ້າເຖິງເຕັກໂນໂລຊີໃໝ່ໃນໂລກ.

ທ່ານ ພັນເອກ S. Muthukrishnan ຖືວ່າ: “ເຂດວາງສະແດງແມ່ນໃຫຍ່ຫຼວງ ແລະປະທັບໃຈທີ່ສຸດ. ບັນດາຜະລິດຕະພັນ ແລະເຕັກໂນໂລຊີທີ່ນຳມາວາງສະແດງ ຄື: ເຮືອບິນບໍ່ມີຄົນຂັບ, ໝາໂຣໂບດ... ສະແດງໃຫ້ເຫັນວ່າ, ຫວຽດນາມ ຖືເປັນສໍາຄັນຕໍ່ການພັດທະນາອຸດສາຫະກຳປ້ອງກັນຊາດ. ຂ້າພະເຈົ້າ ຖືວ່າ ຫວຽດນາມ ແລະອິນເດຍ ມີຄວາມສາມາດບົ່ມຊ້ອນຫຼາຍຢ່າງເພື່ອເພີ່ມທະວີການຮ່ວມມືໃນຂົງເຂດນີ້”.

ຕາມທ່ານ ພັນເອກ S. Muthukrishnan ແລ້ວ, ງານວາງສະແດງຜົນງານແຫ່ງຊາດແມ່ນໂອກາດທີ່ດີເພື່ອຊອກຮູ້ ແລະຜ່ານງານນີ້ໄດ້ແລກປ່ຽນ, ຊຸກຍູ້ການຮ່ວມມືໃນຂົງເຂດອຸດສາຫະກໍາປ້ອງກັນຊາດ. ປະຈຸບັນ, ຫວຽດນາມ ແລະອິນເດຍ ໄດ້ສ້າງຕັ້ງການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບໃນຫຼາຍຂົງເຂດ, ໃນນັ້ນ ພົ້ນເດັ່ນແມ່ນການຮ່ວມມືລະຫວ່າງເຫຼົ່າທັບ, ເຫຼົ່າຮົບ (ທະຫານບົກ, ທະຫານເຮືອ, ທະຫານອາກາດ, ຕໍາຫຼວດທະເລ). ໃນໄລຍະຈະມາເຖິງ, ຫວຽດນາມ ແລະອິນເດຍ ສາມາດຄົ້ນຄວ້າຜັນຂະຫຍາຍການຮ່ວມມືດ້ານເຕັກໂນໂລຊີລູກສອນໄຟ, ເຕັກໂນໂລຊີປືນໃຫຍ່ໄລຍະໄກ, ການຕໍ່ກຳປັ່ນ. “ຂ້າພະເຈົ້າ ຖືວ່າ 2 ຝ່າຍມີຄວາມສາມາດບົ່ມຊ້ອນອັນໃຫຍ່ຫຼວງໃນຂົງເຂດຄວາມໝັ້ນຄົງທາງທະເລ, ແມ່ນຂົງເຂດທີ່ມີບົດບາດສຳຄັນຍິ່ງໃນສະພາບການປະຈຸບັນ”.

ໃນຂະນະນັ້ນ, ສຳລັບແຂກທ່ອງທ່ຽວສາກົນຈຳນວນຫຼາຍກໍ່ໄດ້ເຫັນກັບຕາບັນດາອາວຸດຍຸດໂທປະກອນການທະຫານທີ່ທັນສະໄໝຂອງຫວຽດນາມ. ອ້າຍ Hwang Sungkeun, ມາຈາກ ສ.ເກົາຫຼີ, ປະຈຸບັນແມ່ນຄູສອນພາສາເກົາຫຼີ ຢູ່ຮ່າໂນ້ຍ, ໃຫ້ຮູ້ວ່າ, ຜ່ານຂໍ້ມູນຂ່າວສານ, ຂ້າພະເຈົ້າ ຈຶ່ງຮູ້ຈັກງານວາງສະແດງຜົນງານຂອງປະເທດ ແລະໄດ້ຊວນເພື່ອນໄປຢ້ຽມຊົມແຕ່ມື້ທໍາອິດທີ່ເປີດງານ. ເຖິງວ່າໄດ້ໄປຢ້ຽມຊົມງານວາງສະແດງຫຼາຍຄັ້ງທີ່ຈັດຂຶ້ນຢູ່ຫວຽດນາມ ແລ້ວກໍ່ຕາມ, ແຕ່ຕາມອ້າຍ Hwang ແລ້ວ, ນີ້ແມ່ນງານວາງສະແດງທີ່ມີຂະໜາດໃຫຍ່ທີ່ສຸດ. ອ້າຍມີຄວາມປະທັບໃຈຢ່າງເລິກເຊິ່ງຕໍ່ເຂດວາງສະແດງອາວຸດຍຸດໂທປະກອນເຕັກນິກ ແລະຜະລິດຕະພັນອຸດສາຫະກຳປ້ອງກັນຊາດຂອງຫວຽດນາມ. ອ້າຍ ຖືວ່າ, ງານວາງສະແດງໄດ້ຊ່ວຍໃຫ້ນັກທ່ອງທ່ຽວຕ່າງປະເທດ ຄືອ້າຍ ມີຄວາມເຂົ້າໃຈກວ່າກ່ຽວກັບຄວາມສາມາດຂອງກຳລັງປະກອບອາວຸດຫວຽດນາມ.

ໂດຍ: ໄຊນີດາ