ທີ່ການຕ້ອນຮັບ, ທ່ານເລຂາທິການໃຫຍ່ ສະແດງຄວາມປິຕິຊົມຊື່ນ ແລະຕີລາຄາສູງບາດກ້າວພັດທະນາໃນການພົວພັນສອງປະເທດໃນທຸກຂົງເຂດ, ດ້ວຍຫຼາຍໝາກຜົນທີ່ຕັ້ງໜ້າ, ໃນນັ້ນພົ້ນເດັ່ນແມ່ນຮັກສາທ່າພັດທະນາການພົວພັນເສດຖະກິດ-ການຄ້າ-ການລົງທຶນ ໃຫ້ມີຄວາມໝັ້ນຄົງ, ໂດຍສະເພາະແມ່ນໃນສະພາບການສອງປະເທດພວມມີຫຼາຍກິດຈະກຳແທດຈິງສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດ ແລະ 2 ປີແຫ່ງການພົວພັນຄູ່ຮ່ວມມືຍຸດທະສາດຮອບດ້ານ.
ທ່ານເລຂາທິການໃຫຍ່ ຢືນຢັນວ່າ ຫວຽດນາມ ສະເໝີຕົ້ນສະເໝີປາຍຖື ອາເມລິກາ ແມ່ນຄູ່ຮ່ວມມືຍຸດທະສາດແຖວໜ້າ ແລະປາດຖະໜາຢາກຮ່ວມມືຢ່າງແໜ້ນແຟ້ນກັບອາເມລິກາ ເພື່ອນໍາການພົວພັນສອງປະເທດໃຫ້ນັບມື້ນັບພັດທະນາແທດຈິງ, ເຂົ້າສູ່ລວງເລິກ, ປະຕິບັດຕາມຖະແຫຼງການຮ່ວມ ແລະແຜນການກະທໍາຜັນຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານຢ່າງມີປະສິດທິິຜົນເພື່ອຜົນປະໂຫຍດລວມຂອງສອງປະເທດ ແລະເພື່ອສັນຕິພາບ, ການຮ່ວມມື ແລະພັດທະນາແບບຍືນຍົງຢູ່ພາກພື້ນກໍ່ຄືໃນໂລກ.
    |
 |
|
ທ່ານ ໂຕເລິມ ເລຂາທິການໃຫຍ່ ຕ້ອນຮັບທ່ານເອກອັກຄະລັດຖະທູດ Marc E.Knapper. ພາບ: ຟ້າມກຽນ |
ທ່ານເລຂາທິການໃຫຍ່ ຮັບຮູ້ຄວາມມານະພະຍາຍາມຂອງທ່ານເອກອັກຄະລັດຖະທູດ Marc E.Knapper ແລະພະນັກງານ, ພາລະກອນທັງໝົດຂອງສະຖານທູດອາເມລິກາ ປະຈຳ ຫວຽດນາມ ໃນການຊຸກຍູ້, ຜັນຂະຫຍາຍຂໍ້ຕົກລົງຂັ້ນສູງ, ເນື້ອໃນຮ່ວມມືໃນກອບການພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ-ອາເມລິກາ ຢ່າງມີປະສິດທິຜົນ, ໃນນັ້ນສຸມໃສ່ຊຸກຍູ້ການພົບປະຂັ້ນສູງ, ກໍ່ສ້າງ ແລະປັບປຸງຄວາມໄວ້ເນື້ອເຊື່ອໃຈດ້ານການເມືອງ, ພ້ອມທັງເປີດກວ້າງການຮ່ວມມືໃນທຸກຂົງເຂດ, ຄື: ການດໍາເນີນທຸລະກິດ, ວັດທະນະທໍາ, ການສຶກສາ, ດ້ວຍການຢ້ຽມຢາມ ແລະເຂົ້າຮ່ວມຢ່າງຕັ້ງໜ້າຂອງບັນດາຄະນະວິສາຫະກິດ, ຄະນະບັນດາມະຫາວິທະຍາໄລ...
ໃນຂົງເຂດເສດຖະກິດ-ການຄ້າ-ການລົງທຶນ, ທ່ານເລຂາທິການໃຫຍ່ ໃຫ້ຮູ້ວ່າ ກະຊວງ, ຂະແໜງການ, ອົງການທີ່ກ່ຽວຂ້ອງຂອງຫວຽດນາມ ພວມຕັ້ງໜ້າແກ້ໄຂບັນດາບັນຫາທີ່ອາເມລິກາ ສົນໃຈໃນປະຈຸບັນຂອງ, ບົນຈິດໃຈສົ່ງເສີມເພີ່ມການນໍາເຂົ້າຜະລິດຕະພັນທີ່ມີທ່າແຮງຂອງອາເມລິກາ ເຊິ່ງຫວຽດນາມ ມີຄວາມຕ້ອງການ, ພິເສດແມ່ນຜະລິດຕະພັນກະເສດ ແລະຜະລິດຕະພັນເຕັກໂນໂລຢີສູງ. ພັກ, ລັດຫວຽດນາມ ຍາມໃດກໍ່ເອົາໃຈໃສ່, ສ້າງສະພາບແວດລ້ອມລົງທຶນສະດວກ, ໜູນຊ່ວຍບັນດາວິສາຫະກິດຕ່າງປະເທດເວົ້າລວມ ແລະອາເມລິກາ ເວົ້າສະເພາະເປີດກວ້າງການຮ່ວມມື, ລົງທຶນເຂົ້າຫວຽດນາມ, ຮັກສາທ່າພັດທະນາການພົວພັນເສດຖະກິດມີຄວາມດູ່ນດ່ຽງ, ກົມກ່ຽວກັນ, ເຕີບໂຕແບບຍືນຍົງ ແລະນຳຜົນປະໂຫຍດຢ່າງແທດຈິງໃຫ້ແກ່ປະຊາຊົນສອງປະເທດ.
ທ່ານເອກອັກຄະລັດຖະທູດ Marc E.Knapper ຢືນຢັນວ່າ ອໍານາດການປົກຄອງທ່ານປະທານາທິບໍດີ Donald Trump ຖືເປັນສໍາຄັນການພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ-ອາເມລິກາ ແລະປາດຖະໜາຢາກສອງປະເທດສືບຕໍ່ເພີ່ມທະວີການຮ່ວມມື, ຜັນຂະຫຍາຍມີປະສິດທິຜົນ, ແທດຈິງ, ເຂົ້າສູ່ລວງເລິກ, ນຳມາເຊິ່ງຜົນປະໂຫຍດແທດຈິງໃຫ້ແກ່ປະຊາຊົນສອງປະເທດ.
ໂດຍ: ດັ້ງເກື່ອງ