ທ່ານນາຍົກລັດຖະມົນຕີການາດາ ຂອບອົກຂອບໃຈທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ທີ່ເຂົ້າຮ່ວມກອງປະຊຸມສຸດຍອດ G7 ເປີດກວ້າງ
ກປ.ອອນໄລ - ວັນທີ 11 ມິຖຸນາ, ແວັບໄຊຂອງຫ້ອງວ່າການລັດຖະບານການາດາ, ໄດ້ລົງຂໍ້ມູນກ່ຽວກັບການພົບປະຂອງທ່ານນາຍົກລັດຖະມົນຕີ Justin Trudeau ກັບທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ທີ່ນະຄອນ Quebec ຂຶ້ນກັບແຂວງ Quebec ຂອງການາດາ.
ເນື້ອໃນບົດຂຽນຊີ້ແຈ້ງວ່າ, ທ່ານນາຍົກລັດຖະມົນຕີ Trudeau ໄດ້ໃຫ້ການຕ້ອນຮັບທ່ານນາຍົກລັດຖະມົນຕີ ຫງວຽນຊວນຟຸກ ພາຍຫຼັງສິ້ນສຸດກອງປະຊຸມສຸດຍອດກຸ່ມບັນດາປະເທດອຸດສາຫະກຳພັດທະນາແຖວໜ້າໃນໂລກ (G7). ທີ່ການພົບປະ, ໄດ້ດຳເນີນໄປກົງກັບເວລາທີ່ສອງປະເທດສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດສອງຝ່າຍ, ນາຍົກລັດຖະມົນຕີສອງທ່ານໄດ້ເນັ້ນໜັກເຖິງສາຍພົວພັນແບບຍືນຍົງ ແລະການພົບປະແລກປ່ຽນປະຊາຊົນຢ່າງແຮງ.
|
|
ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ແລະທ່ານນາຍົກລັດຖະມົນຕີການາດາ Justin Trudeau. ພາບ: ສໍານັກຂ່າວສານຫວຽດນາມ. |
ນາຍົກລັດຖະມົນຕີສອງທ່ານ ກໍ່ໄດ້ປຶກສາຫາລືກ່ຽວກັບບາງບູລິມະສິດລວມກ່ຽວຂ້ອງເຖິງສັນຕິພາບ ແລະຄວາມໝັ້ນຄົງຢູ່ພາກພື້ນ ແລະທົ່ວໂລກ; ແລກປ່ຽນກ່ຽວກັບການຮ່ວມມືພັດທະນາມຸ່ງໄປເຖິງການປະຕິບັດສຳເລັດບັນດາເປົ້າໝາຍພັດທະນາແບບຍືນຍົງໃນປີ 2030; ຊຸກຍູ້ຄວາມສະເໝີພາບລະຫວ່າງຍິງ-ຊາຍ...
ທ່ານນາຍົກລັດຖະມົນຕີ Trudeau ຂອບໃຈທ່ານນາຍົກລັດຖະມົນຕີ ຫງວຽນຊວນຟຸກ ທີ່ໄດ້ເຂົ້າຮ່ວມກອງປະຊຸມສຸດຍອດ G7 ເປີດກວ້າງ. ນອກຈາກນັ້ນ, ຜູ້ນຳສອງທ່ານກໍ່ຢັ້ງຢືນເຖິງເປົ້າໝາຍລວມແມ່ນນຳເອົາສັນຍາຄູ່ຮ່ວມມືຮອບດ້ານ ແລະກ້າວໜ້າຂ້າມປາຊີຟິກ (CPTPP) ໃຫ້ມີຜົນສັກສິດໂດຍໄວ.
ແປໂດຍ: ຮຸຍດົງ