ແຮງດຶງດູດກັບວິສາຫະກິດ ແລະຊັບພະຍາກອນມະນຸດດ້ານເຕັກໂນໂລຊີ

ໃນສະພາບການແກ່ງແຍ້ງຢ່າງດຸເດືອດລະຫວ່າງບັນດາພື້ນຖານເສດຖະກິດກ່ຽວກັບການພັດທະນາຂົງເຂດ Semiconductor, ຫວຽດນາມ ພວມພົ້ນເດັ່ນຂຶ້ນປຽບເໝືອນດັ່ງສະຖານທີ່ດຶງດູດໃຈນັກລົງທຶນໃນຂະແໜງອຸດສາຫະກໍາ Semiconductor. ກຸ່ມບໍລິສັດ NVIDIA - ກຸ່ມບໍລິສັດ ທີ່ມີທຶນຈົດທະບຽນຫຼາຍທີ່ສຸດໃນໂລກ, ພາຍຫຼັງທີ່ມີການສໍາຫຼວດບັນດາຕະຫຼາດຢູ່ອາຊີຕາເວັນອອກສ່ຽງໃຕ້ ແລະໃນໂລກຫຼາຍຄັ້ງໄດ້ຕັດສິນມາລົງທຶນຢູ່ຫວຽດນາມ. ລະອຽດ, NVIDIA ໄດ້ລົງນາມຂໍ້ຕົກລົງກັບບາງຄູ່ຮ່ວມມືກ່ຽວກັບການເຄື່ອນຍ້າຍຕ່ອງໂສ້ການຜະລິດຈາກປະເທດອື່ນມາຫວຽດນາມ, ສະໜອງ GPU ແລະອຸປະກອນເຊື່ອມຕໍ່ ດ້ວຍຄໍາໝັ້ນສັນຍາລົງທຶນ 4-4,5 ຕື້ໂດລາສະຫະລັດ ໃນຮອບ 4 ປີຈະມາເຖິງຢູ່ 6 ທ້ອງຖິ່ນ. ວັນທີ 5 ທັນວາ, ຂໍ້ຕົກລົງຮ່ວມມືລະຫວ່າງລັດຖະບານຫວຽດນາມ ແລະກຸ່ມບໍລິສັດ NVIDIA ໄດ້ຮັບການລົງນາມ ເພື່ອຮ່ວມມືສ້າງຕັ້ງສູນຄົ້ນຄວ້າ ແລະພັດທະນາປັນຍາປະດິດ (AI), ສູນຂໍ້ມູນ AI ຢູ່ຫວຽດນາມ. ຂໍ້ຕົກລົງນີ້ໄດ້ນໍາເອົາຊື່ສຽງອັນໃຫຍ່ຫຼວງມາໃຫ້ ແລະຖານະບົດບາດ, ທີ່ຕັ້ງຂອງຫວຽດນາມ ຢູ່ພາກພື້ນ ແລະໃນໂລກ ແມ່ນສະຖານທີ່ລົງທຶນຂອງເຕັກໂນໂລຊີສູງ, ເຕັກໂນໂລຊີ Semiconductor ແລະ AI.

ບັນດານັກຊ່ຽວຊານ ໃຫ້ຂໍ້ສັງເກດວ່າການຮ່ວມມືກັບ NVIDIA ມີຜົນກະທົບອັນໃຫຍ່ຫຼວງ, ດຶງດູດຄວາມສົນໃຈຂອງນັກລົງທຶນເຕັກໂນໂລຊີສູງອື່ນຢູ່ໃນໂລກ, ພິເສດແມ່ນໃນຂົງເຂດ AI, Semiconductor ມາລົງທຶນຢູ່ຫວຽດນາມ, ພ້ອມທັງດຶງດູດ, ຮັກສາຜູ້ມີຄວາມຮູ້ຄວາມສາມາດດ້ານເຕັກໂນໂລຊີ AI ແລະ Semiconductor ໄວ້ໄດ້, ຈະແມ່ນແປ້ນຢັນສໍາຄັນຊ່ວຍໃຫ້ຫວຽດນາມ ມີບາດກ້າວກະໂດດຂັ້ນກ່ຽວກັບເຕັກໂນໂລຊີ ໃນໄລຍະຈະມາເຖິງ. ຫຼາຍກຸ່ມບໍລິສັດເຕັກໂນໂລຊີແຖວໜ້າອື່ນ ຄື Qualcomm, LAM Research, Qorvo, AlChip... ໄດ້ມີແຜນການເຄື່ອນຍ້າຍຕ່ອງໂສ້ການສະໜອງມາຕັ້ງຢູ່ຫວຽດນາມ ເພື່ອພັດທະນາສູນຄົ້ນຄວ້າ, ເປີດກວ້າງການລົງທຶນ, ດໍາເນີນທຸລະກິດ, ຜະລິດຢູ່ຫວຽດນາມ.

leftcenterrightdel
ງານວາງສະແດງຂະແໜງອຸດສາຫະກໍາ Semiconductor ຫວຽດນາມ 2024 ໄດ້ດຶງດູດໃຈຄູ່ຮ່ວມມືເຕັກໂນໂລຊີໃຫຍ່ໃນຂົງເຂດ Semiconductor. ພາບ: ດຶກຈຸງ.

ໃນຕົວຈິງ, ຫວຽດນາມ ພວມກາຍເປັນໜຶ່ງໃນບັນດາໂຮງງານໃຫຍ່ຂອງໂລກ ດ້ວຍການປະກົດຕົວຂອງບັນດາໂຮງງານທີ່ມີຊື່ສຽງໃນໂລກ. ປັດຈຸບັນ, ຫວຽດນາມ ມີ 174 ໂຄງການ FDI ໃນຂົງເຂດ Semiconductor ດ້ວຍທຶນຈົດທະບຽນທັງໝົດແມ່ນເກືອບ 11,6 ຕື້ໂດລາສະຫະລັດ. ພ້ອມກັນນັ້ນ, ດ້ວຍວິໄສທັດຢ່າງຍາວນານ ແລະການໜູນຊ່ວຍຢ່າງແຂງແຮງຈາກລັດຖະບານ, ຫຼາຍວິສາຫະກິດເຕັກໂນໂລຊີຫວຽດນາມ ໄດ້ລົງທຶນເຂົ້າໃນການຄົ້ນຄວ້າ ແລະພັດທະນາ ກໍຄື ຮ່ວມມືສາກົນ ເພື່ອກໍາໄດ້ເຕັກໂນໂລຊີ ອອກແບບ chip ກ້າວໜ້າ, ຄ່ອງໆນໍາຫວຽດນາມ ເຂົ້າເລິກກວ່າໃນຕ່ອງໂສ້ມູນຄ່າທົ່ວໂລກຂອງຂະແໜງ Semiconductor ເທື່ອລະກ້າວ. ໃນການແຂ່ງຂັນນີ້, ກຸ່ມບໍລິສັດອຸດສາຫະກໍາ-ໂທລະຄົມມະນາຄົມກອງທັບ (Viettel) ແລະກຸ່ມບໍລິສັດ FPT ເຊິ່ງແມ່ນສອງວິສາຫະກິດຫວຽດນາມ ນໍາໜ້າ ແລະບັນລຸໄດ້ບັນດາຜົນງານໃນເບື້ອງຕົ້ນ. FPT ໄດ້ສະໜອງບັນດາບໍລິການອອກແບບ microchip ແລະອອກແບບ chip Semiconductor; ໃນຂະນະນັ້ນ Viettel ໄດ້ຜະລິດ chip ຮັບໃຊ້ອຸປະກອນ 5G. ບໍ່ພຽງແຕ່ ຢຸດຢູ່ທີ່ການອອກແບບເທົ່ານັ້ນ, ດ້ວຍບົດບາດນໍາໜ້າຂະແໜງ Semiconductor ຫວຽດນາມ ກ້າວຂຶ້ນ, Viettel ແລະ FPT ຍັງກໍານົດທິດຈະເປັນເຈົ້າຕົນເອງໃນການຜະລິດ ແລະຫຸ້ມຫໍ່ chip ໃນອະນາຄົດ.

ອະນາຄົດທີ່ໝາຍໝັ້ນ

ປີ 2024, ຂະແໜງອຸດສາຫະກໍາ Semiconductor ທົ່ວໂລກ ຕ້ອງເລັ່ງຄວາມໄວ ແລະບັນລຸມູນຄ່າເກືອບ 600 ຕື້ໂດລາສະຫະລັດ. ຄາດວ່າຕະຫຼາດນີ້ ຈະສືບຕໍ່ເຕີບໂຕຕາມແບບເລກກໍາລັງ ໃນເມື່ອຄວາມຕ້ອງການ chip ຮັບໃຊ້ AI ເພີ່ມຂຶ້ນສູງ; ຂະແໜງອຸດສາຫະກໍາລົດໄຟຟ້າພັດທະນາໄວ ແລະກາຍເປັນທ່າອ່ຽງທົ່ວໂລກ; ການກະຈາຍຄື້ນເຄືອຂ່າຍ 5G ສືບຕໍ່ເຮັດໃຫ້ຄວາມຕ້ອງການກ່ຽວກັບ chip ເພີ່ມຂຶ້ນ. ນອກຈາກນີ້, ເມື່ອບັນດາປະເທດ ສືບຕໍ່ເພີ່ມທະວີການນໍາໃຊ້ເຕັກໂນໂລຊີທີ່ກ້າວໜ້າເຂົ້າໃນຫຼາຍຂົງເຂດ, ຄື ການເປີດກວ້າງການນໍາໃຊ້ IoT ໃນບັນດານະຄອນອັດສະລິຍະ, ການຫັນອຸດສາຫະກໍາ, ກະສິກໍາ ແລະສົ່ງເສີມສຸຂະພາບເປັນອັດຕະໂນມັດ ກໍພວມຊຸກຍູ້ຄວາມຕ້ອງການກ່ຽວກັບອຸປະກອນ Semiconductor ຄື: microcontroller, ເຊັນເຊີ, ແລະ chip ເຊື່ອມຕໍ່... ຈະສ້າງເປັນຕະຫຼາດ Semiconductor ທີ່ມີຄວາມຟົດຟື້ນ ແລະເຕັມໄປດ້ວຍແງ່ຫວັງ.

ຂະແໜງອຸດສາຫະກໍາ Semiconductor ພົ້ນເດັ່ນຂຶ້ນເປັນໜຶ່ງໃນບັນດາເສົາຄໍ້າຍຸດທະສາດຂອງສະຕະວັດທີ 21. ອຸດສາຫະກໍາ Semiconductor ບໍ່ພຽງແຕ່ແມ່ນພື້ນຖານໃຫ້ແກ່ບັນດາອຸປະກອນເຕັກໂນໂລຊີ ເທົ່ານັ້ນ ຫາກຍັງຮັກສາບົດບາດຫຼັກແຫຼ່ງແກ່ນສານໃນພື້ນຖານເສດຖະກິດດີຈີຕອນຂອງແຕ່ລະປະເທດ. ຕາມທ່ານ ຫງວຽນແມ້ງຮຸ່ງ ລັດຖະມົນຕີກະຊວງຖະແຫຼງຂ່າວ ແລະສື່ສານ, ໃນການແຂ່ງຂັນເປັນເຈົ້າຂອງຕ່ອງໂສ້ການສະໜອງຂະແໜງ Semiconductor, ບັນດາບໍລິສັດໃຫຍ່ຂະແໜງເຕັກໂນໂລຊີ ລ້ວນແຕ່ມີຄວາມຕ້ອງການຊອກຮູ້ສະຖານທີ່ລົງທຶນຕື່ມອີກ ແລະຫວຽດນາມ ແມ່ນສະຖານທີ່ລົງທຶນທີ່ປອດໄພໃຫ້ແກ່ຂະແໜງອຸດສາຫະກໍາ Semiconductor ທົ່ວໂລກ.

ອະທິບາຍກ່ຽວກັບຄວາມດຶງດູດໃຈຂອງຫວຽດນາມ, ທ່ານ ຫງວຽນຈິຢຸ້ງ ລັດຖະມົນຕີກະຊວງແຜນການ ແລະການລົງທຶນ ໃຫ້ຮູ້ວ່າ ຫວຽດນາມ ມີຊັບພະຍາກອນມະນຸດທີ່ມີຄຸນນະພາບສູງ ດ້ວຍລາຄາຖືກ; ການລົງທຶນ ແລະຍົກລະດັບຢ່າງແຂງແຮງກ່ຽວກັບພື້ນຖານໂຄງລ່າງ; ກົນໄກ, ນະໂຍບາຍ ນັບມື້ນັບປອດໂປ່ງ, ເປີດອົກເປີດໃຈ; ພິເສດ, ການຕັດສິນໃຈດ້ານການເມືອງສູງຂອງການນໍາພັກ, ລັດ, ໂດຍສະເພາະແມ່ນການເອົາໃຈໃສ່, ຊີ້ນໍາຢ່າງໃກ້ຊິດຕິດແທດຂອງນາຍົກລັດຖະມົນຕີ. ໃນໄລຍະທີ່ຜ່ານມາ, ຫວຽດນາມ ໄດ້ສ້າງຕັ້ງຄະນະຊີ້ນໍາແຫ່ງຊາດກ່ຽວກັບການພັດທະນາຂະ ແໜງອຸດສາຫະກໍາ Semiconductor ໂດຍ ນາຍົກລັດຖະມົນຕີ ເປັນຫົວໜ້າຄະນະ; ປະກາດໃຊ້ໂຄງການພັດທະນາຊັບພະຍາກອນມະນຸດ ແລະຍຸດທະສາດພັດທະນາຂະແໜງອຸດສາຫະກໍາ Semiconductor... ນອກຈາກນີ້, ລັດຖະບານ ກໍໄດ້ປະກາດໃຊ້ “ຍຸດທະສາດພັດທະນາອຸດສາຫະກໍາ Semiconductor ຫວຽດນາມ ຮອດປີ 2030 ແລະວິໄສທັດ 2050” ວາງອອກຫຼາຍຄາດໝາຍທີ່ລະອຽດ, ສ້າງພື້ນຖານອັນໜັກແໜ້ນໃຫ້ແກ່ຂະແໜງອຸດສາຫະກໍາ Semiconductor ພາຍໃນປະເທດ, ມຸ່ງໄປເຖິງ ການພັດທະນາແບບຍືນຍົງ ແລະເຊື່ອມໂຍງເຂົ້າກັບຕ່ອງໂສ້ການສະໜອງທົ່ວໂລກ ຢ່າງເລິກເຊິ່ງກວ້າງຂວາງ. ບົນພື້ນຖານການກໍານົດທິດສໍາຄັນນີ້, ບັນດາກະຊວງ, ຂະແໜງການ ພວມເລັ່ງຄວາມໄວປັບປຸງຄຸນນະພາບຊັບພະຍາກອນມະນຸດ, ລະບົບພື້ນຖານໂຄງລ່າງ, ແຫຼ່ງສະໜອງພະລັງງານ, ປະຕິຮູບການບໍລິຫານເພື່ອເພີ່ມກໍາລັງແກ່ງແຍ້ງ, ສ້າງເງື່ອນໄຂໃຫ້ແກ່ວິສາຫະກິດພາຍໃນ ແລະນັກລົງທຶນຕ່າງປະເທດຜະລິດ Semiconductor ຢູ່ຫວຽດນາມ.

ຫວຽດນາມ ພວມຢືນຢູ່ຕໍ່ໜ້າໂອກາດເຂົ້າຮ່ວມຂະແໜງອຸດສາຫະກໍາ Semiconductor ຢ່າງເລິກເຊິ່ງ ແລະໄດ້ສະແດງໃຫ້ເຫັນຢ່າງຈະແຈ້ງຄວາມປາດຖະໜາ ທີ່ບໍ່ພຽງແຕ່ກາຍເປັນຕ່ອງໂສ້ໃນລະບົບຕ່ອງໂສ້ການສະໜອງ Semiconductor ທົ່ວໂລກເທົ່ານັ້ນ ຫາກຍັງມຸ່ງໄປເຖິງການກໍ່ສ້າງລະບົບນິເວດອຸດສາຫະກໍາ Semiconductor ທີ່ກ້າວໜ້າ, ດຶງດູດໃຈຂອງພາກພື້ນ ແລະໃນໂລກ, ຊ່ວຍໃຫ້ຫວຽດນາມ ເປັນເຈົ້າຂອງ ແລະພັດທະນາແບບຍືນຍົງໃນຂົງເຂດນີ້ອີກດ້ວຍ. ຫວຽດນາມ ມີເງື່ອນໄຂຢ່າງຄົບຖ້ວນ ເພື່ອພ້ອມແລ້ວທີ່ຈະຮັບ, ຮ່ວມມືກັບວິສາຫະກິດ, ນັກລົງທຶນມາຈາກທຸກແຫ່ງຫົນ ໃນທົ່ວໂລກ ໃນຂົງເຂດອຸດສາຫະກໍາ Semiconductor. 

ໂດຍ: ໄຊຊະນະ