ການສົ່ງອອກ ບັນລຸສະຖິຕິໃໝ່
ປີ 2024, ການສົ່ງອອກຂອງຫວຽດນາມ ໄດ້ຮັບຂ່າວດີຢ່າງຕໍ່ເນື່ອງ ໃນຂະນະທີ່ສະພາບຕະຫຼາດລວມປະສົບຄວາມຫຍຸ້ງຍາກຫຼາຍຢ່າງ. ເປັນຄັ້ງທໍາອິດທີ່ການສົ່ງອອກຜະລິດຕະພັນກະເສດ ລື່ນກາຍລະດັບ 60 ຕື້ໂດລາສະຫະລັດ (ຄາດວ່າບັນລຸ 62,7 ຕື້ໂດລາສະຫະລັດ ໃນປີ 2024), ເພີ່ມຂຶ້ນ 18 ກວ່າ % ເມື່ອທຽບໃສ່ກັບປີ 2023. ພ້ອມກັນນັ້ນ, ບັນດາກຸ່ມສິນຄ້າສົ່ງອອກຫຼັກແຫຼ່ງ ທີ່ປະສົບຄວາມຫຍຸ້ງຍາກໃນປີ 2023 ໄດ້ມີການຟື້ນຟູຢ່າງໄວ, ຟື້ນຟູທ່າເຕີບໂຕສູງຢູ່ໃນລະດັບ 2 ຕົວເລກ ຄື: ຄອມພິວເຕີ, ຜະລິດຕະພັນເອເລັກໂຕນິກ ແລະເຄື່ອງອາໄຫຼ່ ບັນລຸ 71,7 ຕື້ໂດລາສະຫະລັດ, ເພີ່ມຂຶ້ນ 25%; ເຄື່ອງຈັກ, ອຸປະກອນ, ເຄື່ອງອາໄຫຼ່ອື່ນບັນລຸ 52,6 ຕື້ໂດລາສະຫະລັດ, ເພີ່ມຂຶ້ນ 22%; ເຄື່ອງຕໍ່າແຜ່ນຕັດຫຍິບ ບັນລຸ 37 ຕື້ໂດລາສະຫະລັດ, ເພີ່ມຂຶ້ນ 11,2%; ເກີບທຸກປະເພດ ບັນລຸ 22,9 ຕື້ໂດລາສະຫະລັດ, ເພີ່ມຂຶ້ນ 13%; ໄມ້ ແລະຜະລິດຕະພັນຈາກໄມ້ ບັນລຸ 16,2 ຕື້ໂດລາສະຫະລັດ, ເພີ່ມຂຶ້ນ 20,3%; ເຫຼັກ, ເຫຼັກກ້າ ບັນລຸ 9,3 ຕື້ໂດລາສະຫະລັດ, ເພີ່ມຂຶ້ນ 11,8%...
ບົດລາຍງານຂອງກະຊວງອຸດສາຫະກໍາ ແລະການຄ້າຫວຽດນາມ ໃຫ້ຮູ້ວ່າ, ປີ 2024, ບັນດາວິສາຫະກິດ ໄດ້ຕັ້ງໜ້າຍາດແຍ່ງໂອກາດຈາກການຟື້ນຟູຂອງ ບັນດາຕະຫຼາດໃຫຍ່, ຕະຫຼາດມູນເຊື້ອເພື່ອຍູ້ແຮງການສົ່ງອອກ, ຍົກວົງເງິນສົ່ງອອກ-ນໍາເຂົ້າທົ່ວປີ 2024 ບັນລຸສະຖິຕິໃໝ່, ຄາດວ່າບັນລຸ 783 ຕື້ໂດລາສະຫະລັດ; ໃນນັ້ນ ສົ່ງອອກຄາດວ່າບັນລຸ 403 ຕື້ໂດລາສະຫະລັດ; ນໍາເຂົ້າຄາດວ່າບັນລຸ 380 ຕື້ໂດລາສະຫະລັດ, ລື່ນກວ່າ 100 ຕື້ໂດລາສະຫະລັດ ເມື່ອທຽບໃສ່ກັບລະດັບ 681 ຕື້ໂດລາສະຫະລັດຂອງປີ 2023, ເພີ່ມຂຶ້ນ 15%, ສູງທົບເກືອບ 2,5 ເທົ່າ ເມື່ອທຽບໃສ່ກັບຄາດໝາຍແຜນການທີ່ລັດຖະບານ ມອບໃຫ້ແມ່ນປະມານ 6%; ດຸນການຄ້າ ຮັກສາການສົ່ງອອກເກີນດຸນ ຢູ່ໃນລະດັບສູງ, ເກືອບ 25 ຕື້ໂດລາສະຫະລັດ, ຮັບຮູ້ການສົ່ງອອກເກີນດຸນ ເປັນປີທີ 9 ຕິດຕໍ່ກັນ. ທົ່ວປະເທດ ມີ 36 ປະເພດສິນຄ້າ ບັນລຸວົງເງິນສົ່ງອອກກວ່າ 1 ຕື້ໂດລາສະຫະລັດ (ໄລຍະດຽວກັນຂອງປີກາຍແມ່ນມີສິນຄ້າແຕ່ 33 ປະເພດ), ກວມເອົາ 94,1% ລວມຍອດວົງເງິນສົ່ງອອກ.
    |
 |
|
ການເຄື່ອນໄຫວຜະລິດຢູ່ບໍລິສັດ Yazaki ຫາຍຟ່ອງຫວຽດນາມ ຈໍາກັດສາຂາຢູ່ແຂວງຖ໋າຍບິ່ງ. ພາບ: ຈິ້ງຢ້ວນ. |
ຕາມທ່ານນາງ ຟານທິຖັງ ຮອງລັດຖະມົນຕີກະຊວງອຸດສາຫະກໍາ ແລະການຄ້າ, ໂຄງປະກອບສິນຄ້າສົ່ງອອກສືບຕໍ່ໄດ້ຮັບການປັບປຸງຕາມທິດຕັ້ງໜ້າ, ຫຼຸດຜ່ອນປະລິມານສົ່ງອອກທີ່ເປັນວັດຖຸດິບ, ເພີ່ມການສົ່ງອອກຜະລິດຕະພັນປຸງແຕ່ງ, ຜະລິດຕະພັນອຸດສາຫະກໍາ, ສ້າງເງື່ອນໄຂໃຫ້ແກ່ສິນຄ້າຫວຽດນາມ ໄດ້ເຂົ້າຮ່ວມເລິກໃນຕ່ອງໂສ້ການຜະລິດ ແລະສະໜອງທົ່ວໂລກ. ກຸ່ມອຸດສາຫະກໍາປຸງແຕ່ງຟື້ນຟູໄວ, ແມ່ນກໍາລັງໜູນປະກອບສ່ວນສໍາຄັນເຂົ້າໃນວົງເງິນສົ່ງອອກລວມຂອງທົ່ວປະເທດ (ກວມເອົາເກືອບ 85%). ສິ່ງທີ່ໜ້າເອົາໃຈໃສ່ແມ່ນການເຄື່ອນໄຫວສົ່ງອອກນໍາເຂົ້າໄດ້ໝູນໃຊ້, ຂຸດຄົ້ນຄໍາໝັ້ນສັນຍາເປີດປະຕູຕະຫຼາດຈາກສັນຍາການຄ້າເສລີ (FTA) ຢ່າງມີປະສິດທິຜົນ, ການເຕີບໂຕສົ່ງອອກຂອງຫວຽດນາມ ດ້ວຍຕະຫຼາດສ່ວນຫຼາຍທີ່ໄດ້ລົງນາມ FTA ລ້ວນແຕ່ເພີ່ມຂຶ້ນ. ການສົ່ງອອກ ໄປຍັງອາເມລິກາ - ຕະຫຼາດສົ່ງອອກໃຫຍ່ສຸດຂອງຫວຽດນາມ ຄາດວ່າບັນລຸ 119,7 ຕື້ໂດລາສະຫະລັດ, ກວມເອົາ 29,5% ລວມຍອດວົງເງິນສົ່ງອອກ, ເພີ່ມຂຶ້ນເຖິງ 23,4% ເມື່ອທຽບໃສ່ກັບປີ 2023 (ປີ 2023 ຫຼຸດລົງ 11,3%); ການສົ່ງອອກໄປຍັງຕະຫຼາດອີຢູ ຄາດວ່າ ບັນລຸ 51,6 ຕື້ໂດລາສະຫະລັດ, ເພີ່ມຂຶ້ນ 18,3% (ປີ 2023 ຫຼຸດລົງ 6,8%); ການສົ່ງອອກໄປຍັງຕະຫຼາດອາຊຽນ ເພີ່ມຂຶ້ນ 13,6%; ສົ່ງອອກໄປຍັງຕະຫຼາດ ສ.ເກົາຫຼີ ຄາດວ່າບັນລຸ 25,5 ຕື້ໂດລາສະຫະລັດ, ເພີ່ມຂຶ້ນ 8,6% (ປີ 2023 ຫຼຸດລົງ 3,4%); ການສົ່ງອອກໄປຍັງຕະຫຼາດ ຍີ່ປຸ່ນ ຄາດວ່າບັນລຸ 24,6 ຕື້ໂດລາສະຫະລັດ, ເພີ່ມຂຶ້ນ 5,5% (ປີ 2023 ຫຼຸດລົງ 3,7%).
ຕາມການຕີລາຄາຂອງກະຊວງອຸດສາຫະກໍາ ແລະການຄ້າ ກໍສະແດງໃຫ້ເຫັນວ່າ, ກໍາລັງການຜະລິດ ແລະສົ່ງອອກຂອງວິສາຫະກິດພາຍໃນປະເທດ ນັບມື້ນັບໄດ້ຮັບການປັບປຸງ. ລະດັບເຕີບໂຕສົ່ງອອກໃນຂົງເຂດເສດຖະກິດພາຍໃນປະເທດ (18,9%) ສູງກວ່າເມື່ອທຽບໃສ່ກັບຂົງເຂດ FDI (11,6%); ພ້ອມກັນນັ້ນ, ມາດຕາຖ່ວງໃນລວມຍອດວົງເງິນສົ່ງອອກທົ່ວປະເທດສູງກວ່າ ເມື່ອທຽບໃສ່ໄລຍະດຽວກັນຂອງປີກາຍ (28,9% ເມື່ອທຽບກັບ 26,9%). ຄຽງຂ້າງນັ້ນ, ການເຄື່ອນໄຫວນໍາເຂົ້າໄດ້ຮັບການຮັບປະກັນ ດ້ວຍໂຄງປະກອບທີ່ເໝາະສົມ, ຕອບສະໜອງຄວາມຕ້ອງການວັດຖຸດິບຮັບໃຊ້ການຜະລິດ, ສົ່ງອອກ ແລະບໍລິໂພກໂດຍພື້ນຖານ. ໃນນັ້ນ, ກຸ່ມສິນຄ້າຕ້ອງນໍາເຂົ້າສືບຕໍ່ກວມເອົາມາດຕະຖ່ວງສູງ (ເກືອບ 89%). ເລື່ອງນໍາເຂົ້າບັນດາປະເພດສິນຄ້າເຄື່ອງອາໄຫຼ່, ເຄື່ອງຈັກ, ວັດຖຸດິບສົ້ນເຂົ້າໃຫ້ແກ່ ການຜະລິດ ໄດ້ເຕີບໂຕຄືນໃໝ່ ເຊິ່ງ ສະແດງໃຫ້ເຫັນການຟື້ນຟູຂອງການ ເຄື່ອນໄຫວຜະລິດ, ດໍາເນີນທຸລະກິດໃນພື້ນຖານເສດຖະກິດ ກໍຄື ບັນດາສັນ ຍານທີ່ຕັ້ງໜ້າກ່ຽວກັບ ອໍເດີ ໄດ້ຮັບໃນໄລຍະຈະມາເຖິງ.
ເປົ້າໝາຍສູງກວ່າ, ຄວາມພະຍາຍາມໃຫຍ່ກວ່າ
ປີ 2025, ເພື່ອປະກອບສ່ວນໃຫ້ແກ່ເປົ້າໝາຍເຕີບໂຕ GDP ຢູ່ໃນລະດັບສູງແມ່ນ 8%, ກະຊວງອຸດສາຫະກໍາ ແລະການຄ້າຫວຽດນາມ ວາງຄາດໝາຍສົ່ງອອກເພີ່ມຂຶ້ນ 12% ເມື່ອທຽບໃສ່ກັບປີ 2024. ຕາມການຕີລາຄາຂອງຊ່ຽວຊານຫຼາຍຄົນ ທີ່ສະແດງໃຫ້ເຫັນວ່າ ໃນສະພາບການຫຼາຍປັດໄຈຜັນແປທີ່ຄາດເດົາໄດ້ຍາກ ໄດ້ສົ່ງຜົນສະທ້ອນເຖິງການເຄື່ອນໄຫວສົ່ງອອກນໍາເຂົ້າສິນຄ້າ, ເປົ້າໝາຍເຕີບໂຕສົ່ງອອກ 12% ແມ່ນສິ່ງທ້າທາຍອັນໃຫຍ່ຫຼວງ, ເພາະສະນັ້ນສະເລ່ຍແຕ່ລະເດືອນ ການສົ່ງອອກຕ້ອງເພີ່ມ 4 ຕື້ໂດລາສະຫະລັດ ເມື່ອທຽບໃສ່ກັບລະດັບສະເລ່ຍຕໍ່ເດືອນຂອງປີ 2024.
ຍົກອອກບາງການກະທົບເຖິງການເຄື່ອນໄຫວສົ່ງອອກໃນປີ 2025, ທ່ານ ເຈິ່ນແທັງຫາຍ, ຮອງຫົວໜ້າກົມສົ່ງອອກ-ນໍາເຂົ້າ (ກະຊວງອຸດສາຫະກໍາ ແລະການຄ້າຫວຽດນາມ) ໃຫ້ຮູ້ວ່າ, ວິກິດການຢູ່ຕາເວັນອອກກາງ ໄດ້ ແລະພວມເຮັດໃຫ້ການຂົນສົ່ງສິນຄ້າໃນໂລກ ແລະຂອງຫວຽດນາມ ໄດ້ຮັບຜົນສະທ້ອນ; ທ່າອ່ຽງປົກປ້ອງການຄ້າໄດ້ປະກົດຕົວຂຶ້ນຫຼາຍກວ່າ; ບັນດາຕະຫຼາດພັດທະນາ ຄື ອີຢູ ກໍໄດ້ວາງອອກຄວາມຮຽກຕ້ອງຕ້ອງການ ໃໝ່ກ່ຽວກັບການພັດທະນາແບບຍືນຍົງ...
ຄວາມມານະພະຍາຍາມຮັກສາທ່າເຕີບໂຕຂອງຂະແໜງຕໍ່າແຜ່ນຕັດຫຍິບ, ທ່ານ ກາວຫຶວຫ໊ຽວ ຜູ້ອໍານວຍການກຸ່ມບໍລິສັດຕໍ່າແຜ່ນຕັດຫຍິບຫວຽດນາມ ໃຫ້ຮູ້ວ່າ, ປີ 2025, ກຸ່ມບໍລິສັດ ສຸມໃສ່ຍູ້ໄວການປ່ຽນແປງໃໝ່ວິທີບໍລິຫານ; ຄົ້ນຄວ້າພັດທະນາຜະລິດຕະພັນໃໝ່, ຕະຫຼາດຍ່ອຍ, ສ້າງຄຸນຄ່າສະເພາະນອກຈາກຜະລິດເຄື່ອງຕໍ່າແຜ່ນຕັດຫຍິບທໍາມະດາ; ໝູນໃຊ້ເຕັກໂນໂລຊີອັດຕະໂນມັດ, ປັນຍາປະດິດ ເພື່ອຫຼຸດຜ່ອນການອີງໃສ່ແຮງງານໃນຂະແໜງຕໍ່າແຜ່ນຕັດຫຍິບ ເພື່ອໃຫ້ທັນບາດກ້າວເດີນຂອງເສດຖະກິດທົ່ວປະເທດ.
ເພື່ອຊຸກຍູ້ການສົ່ງອອກ-ນໍາເຂົ້າໃນປີ 2025, ທ່ານນາງ ຟານທິຖັງ ຮອງລັດຖະມົນຕີກະຊວງອຸດສາຫະກໍາ ແລະການຄ້າຫວຽດນາມ ໃຫ້ຮູ້ວ່າ ກະຊວງອຸດສາຫະກໍາ ແລະການຄ້າ ຈະສືບຕໍ່ຕິດຕາມ ແລະແຈ້ງຂ່າວຢ່າງທັນການໃຫ້ບັນດາສະມາຄົມຂະແໜງສິນຄ້າ ແລະວິສາຫະກິດກ່ຽວກັບການຜັນແປຂອງຕະຫຼາດສົ່ງອອກ ເພື່ອໃຫ້ມີການດັດປັບແຜນການຜະລິດໃຫ້ສອດຄ່ອງຢ່າງທັນການ, ໂດຍສະເພາະແມ່ນການປ່ຽນແປງໃນນະໂຍບາຍການຄ້າຂອງບັນດາຕະຫຼາດໃຫຍ່ ຄື: ອາເມລິກາ, ຈີນ. ນອກຈາກນີ້, ກະຊວງອຸດສາຫະກໍາ ແລະການຄ້າ ຈະສືບຕໍ່ຮັກສາກອງປະຊຸມແລກປ່ຽນວຽກງານສົ່ງເສີມການຄ້າກັບຫ້ອງການການຄ້າຫວຽດນາມຢູ່ຕ່າງປະເທດ ຢ່າງສະໝໍ່າສະເໝີ. ລະບົບຫ້ອງການການຄ້າຫວຽດນາມ ຢູ່ຕ່າງປະເທດ ອັບເດດຂໍ້ມູນຂ່າວກ່ຽວກັບສະພາບຕະຫຼາດຕ່າງປະເທດ, ບັນດາຂໍ້ກໍານົດ, ມາດຕະຖານ, ເງື່ອນໄຂຂອງຕະຫຼາດຕ່າງປະເທດ ຢ່າງເປັນປະຈໍາ ທີ່ອາດສາມາດກະທົບເຖິງການເຄື່ອນໄຫວສົ່ງອອກນໍາເຂົ້າຂອງຫວຽດນາມ ແລະມີການຕັກເຕືອນ ສໍາລັບບັນດາທ້ອງຖິ່ນ, ສະມາຄົມ ແລະວິສາຫະກິດສົ່ງອອກນໍາເຂົ້າ.
ໂດຍ: ໄຊຊະນະ