ໜັງສືພິມກອງທັບປະຊາຊົນ ໄດ້ເລືອກເອົາ 10 ຂີດໝາຍພົ້ນເດັ່ນຂອງຫວຽດນາມ ໃນປີ 2024 ຄື:
1. ບູລະນະນາມຕໍາແໜ່ງຜູ້ນໍາຫຼັກແຫຼ່ງ ໃຫ້ສົມບູນແບບ
ປີ 2024, ບັນດາຕໍາແໜ່ງຜູ້ນໍາຫຼັກແຫຼ່ງຂອງປະເທດເຮົາ ໄດ້ຮັບການບູລະນະໃຫ້ສົມບູນແບບ. ວັນທີ 3 ສິງຫາ, ຄະນະບໍລິຫານງານສູນກາງພັກ ໄດ້ເລືອກຕັ້ງສະຫາຍ ໂຕເລິມ ດໍາລົງຕໍາແໜ່ງເປັນເລຂາທິການໃຫຍ່. ທີ່ກອງປະຊຸມສະໄໝສາມັນ ເທື່ອທີ 7, ສະພາແຫ່ງຊາດ ໄດ້ເລືອກຕັ້ງສະຫາຍ ເຈິ່ນແທັງເໝິນ ດໍາລົງຕໍາແໜ່ງເປັນປະທານສະພາແຫ່ງຊາດ. ທີ່ກອງປະຊຸມສະໄໝສາມັນ ເທື່ອທີ 8, ສະພາແຫ່ງຊາດ ໄດ້ເລືອກຕັ້ງສະຫາຍ ເລືອງເກື່ອງ ດໍາລົງຕໍາແໜ່ງປະທານປະເທດ.
2. ການປະຕິວັດກ່ຽວກັບການສັບຊ້ອນກົງຈັກລະບົບການເມືອງໃຫ້ກະທັດຮັດ
ຕົ້ນເດືອນທັນວາ ປີ 2024, ຄະນະບໍລິຫານງານສູນກາງພັກ ຊຸດທີ 13 ໄດ້ດໍາເນີນການສະຫຼຸບມະຕິເລກທີ 18-NQ/TW ລົງວັນທີ 25 ຕຸລາ 2017 ຂອງຄະນະບໍລິຫານງານສູນກາງພັກ ຊຸດທີ 12 “ບາງບັນຫາກ່ຽວກັບການສືບຕໍ່ປ່ຽນແປງໃໝ່, ສັບຊ້ອນການຈັດຕັ້ງກົງຈັກລະບົບການເມືອງ ໃຫ້ກະທັດຮັດ, ເຄື່ອນໄຫວໃຫ້ມີຜົນສັກສິດ, ປະສິດທິພາບ”, ດຳເນີນການປະຕິວັດກ່ຽວກັບການຈັດຕັ້ງກົງຈັກຂອງລະບົບການເມືອງ. ດ້ວຍພະນັກງານ, ພາລະກອນ, ລັດຖະກອນປະມານ 2,5 ລ້ານຄົນ, ຫຼາຍກວ່າ 3,5 ລ້ານຄົນໄດ້ຮັບເງິນບໍານານ ແລະເງິນອຸດໜູນ, 70% ຂອງງົບປະມານແມ່ນໃຊ້ເຂົ້າໃນການເຄື່ອນໄຫວເປັນປົກກະຕິ, ເຫຼືອພຽງແຕ່ 30% ໃຫ້ການລົງທຶນພັດທະນາ. ເປົ້າໝາຍຂອງການສັບຊ້ອນແມ່ນປັບປຸງກົງຈັກລະບົບການເມືອງໃຫ້ກະທັດຮັດ, ຍົກສູງຄຸນນະພາບພະນັກງານ, ມຸ່ງໄປເຖິງກົງຈັກທີ່ມີປະສິດທິຜົນກວ່າ, ຕອບສະໜອງຄວາມຮຽກຮ້ອງຕ້ອງການພັດທະນາປະເທດຊາດໃນໄລຍະໃໝ່.
3. ສະເຫຼີມສະຫຼອງບັນດາວັນບຸນທີ່ສຳຄັນຂອງປະເທດ
ປີ 2024, ພັກ, ລັດ ໄດ້ຈັດພິທີສະຫຼີມສະຫຼອງ 70 ປີແຫ່ງວັນໄຊຊະນະດ້ຽນບຽນຝູ (7-5-1954 / 7-5-2024), 70 ປີແຫ່ງວັນປົດປ່ອຍນະຄອນຫຼວງ (10-10-1954 / 10-10-2024) ແລະພິທີສະເຫຼີມສະຫຼອງລະດັບຊາດ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ, 35 ປີແຫ່ງວັນບຸນປ້ອງກັນຊາດທົ່ວປວງຊົນ ຢ່າງສົມກຽດ.
4. GDP ເຕີບໂຕປະມານ 7%, ລື່ນຄາດໝາຍທີ່ວາງອອກ
ປີ 2024, ຜ່ານຜ່າຄວາມຫຍຸ້ງຍາກ, ສິ່ງທ້າທາຍ, ຄວາມເສຍຫາຍຢ່າງໜັກໜ່ວງຍ້ອນໄພທຳມະຊາດກໍ່ຂຶ້ນ, ໃນນັ້ນມີພະຍຸໄຕ້ຝຸ່ນ ຢາກີ (ພະຍຸ ລູກທີ 3) ແລະໄພນ້ຳຖ້ວມ, ເສດຖະກິດ-ສັງຄົມຂອງປະເທດມີບາດກ້າວພັດທະນາຢ່າງຕັ້ງໜ້າ, ບັນລຸໄດ້ 15/15 ຄາດໝາຍທີ່ວາງອອກ, ການເຕີບໂຕ GDP ບັນລຸປະມານ 7%, ລື່ນກາຍຄາດໝາຍເຕີບໂຕ 6-6,5% ທີ່ສະພາແຫ່ງຊາດ ແລະລັດຖະບານ ໄດ້ວາງອອກແຕ່ຕົ້ນປີ.
5. ສໍາເລັດໂຄງການສາຍໄຟຟ້າ 500kV ວົງຈອນທີ 3
ໂຄງການສາຍໄຟຟ້າ 500kV ວົງຈອນທີ 3 ຈາກ ກວາງແຈກ (ແຂວງກວາງບິ່ງ) ຮອດ ໂຟ໊ໂນ໊ຍ (ແຂວງຮຶງອຽນ) ມີຄວາມຍາວທັງໝົດປະມານ 519 ກິໂລແມັດ, ມີ 1.177 ຖັນ; ໃນນັ້ນຖັນສູງສຸດແມ່ນ 145 ແມັດ, ຖັນໜັກກວ່າໝູ່ແມ່ນ 415 ໂຕນ, ເຊິ່ງໄດ້ຮັບການກໍ່ສ້າງໃນສະພາບດິນຟ້າອາກາດຮ້າຍແຮງ ແລະໄປຜ່ານພູມີປະເທດທີ່ທຸລະກັນດານ. ແຕ່ດ້ວຍການຊີ້ນຳຢ່າງຂ້ຽວຂາດຂອງນາຍົກລັດຖະມົນຕີ, ຄວາມເປັນເຈົ້າການ, ມີຫົວຄິດປະດິດສ້າງໃນການບໍລິຫານກະຊວງອຸດສາຫະກຳ ແລະການຄ້າ ແລະບັນດາກະຊວງ, ຂະແໜງການ, ທ້ອງຖິ່ນ, ການສະໜັບສະໜູນຂອງປະຊາຊົນ, ພາຍຫຼັງດຳເນີນການກໍ່ສ້າງເປັນເວລາພຽງ 6 ເດືອນ, ສາຍໄຟຟ້າ 500kV ວົງຈອນທີ 3 ໄດ້ສໍາເລັດ.
    |
 |
|
ການກໍ່ສ້າງສາຍໄຟຟ້າ 500kV ວົງຈອນທີ 3. ພາບ: ຕວ໊ນຮຸຍ |
6. ປັບປຸງຖານະບົດບາດໃນເວທີສາກົນ
ປີ 2024, ຫວຽດນາມ ໄດ້ຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດຮອບດ້ານກັບ ອົດສະຕາລີ, ຝລັ່ງ, ມາເລເຊຍ; ຍົກລະດັບການພົວພັນຄູ່ຮ່ວມມືຍຸດທະສາດກັບ ບຣາຊິນ; ສ້າງຕັ້ງການພົວພັນຄູ່ຮ່ວມມືຮອບດ້ານກັບ ມົງໂກນ, ສະຫະລັດອາຣັບ ເອມີເຣດ (UAE)... ຖ້າ ມາເລເຊຍ ແມ່ນປະເທດທຳອິດໃນອາຊຽນ ເຊິ່ງຫວຽດນາມ ມີການພົວພັນຄູ່ຮ່ວມມືຍຸດທະສາດຮອບດ້ານ, ຝຣັ່ງ ແມ່ນປະເທດທຳອິດໃນສະຫະພາບເອີລົບ ທີ່ມີການພົວພັນຄູ່ຮ່ວມມືຍຸດທະສາດຮອບດ້ານກັບຫວຽດນາມ. ພິເສດ, ການລົງນາມກັບ ຝລັ່ງ ສ້າງຂີດໝາຍວ່າ ຫວຽດນາມ ມີການພົວພັນຄູ່ຮ່ວມມືຍຸດທະສາດຮອບດ້ານກັບ 4/5 ສະມາຊິກຖາວອນ ຂອງສະພາຄວາມໝັ້ນຄົງສະຫະປະຊາຊາດ, ໃນນັ້ນມີ ອາເມລິກາ, ລັດເຊຍ, ຈີນ ແລະຝລັ່ງ.
7. ຮັບຮອງເອົາກົດໝາຍ ແລະແຜນນະໂຍບາຍສຳຄັນຫຼາຍສະບັບ
ປີ 2024, ສະພາແຫ່ງຊາດ ໄດ້ຮັບຮອງເອົາກົດໝາຍ, ໂຄງການເປົ້າໝາຍແຫ່ງຊາດ ແລະແຜນນະໂຍບາຍລົງທຶນສຳຄັນຫຼາຍສະບັບຄື: ຮ່າງກົດໝາຍວ່າດ້ວຍທີ່ດິນ (ສະບັບປັບປຸງ), ໂຄງການທາງລົດໄຟຄວາມໄວສູງເໜືອ-ໃຕ້ ດ້ວຍຍອດຈຳນວນທຶນ 1.713.548 ຕື້ດົ່ງ ແລະລົງທຶນໂຄງການໄຟຟ້ານິວເຄຼຍ ນິງຖ້ວນ; ຮັບຮອງເອົາມະຕິກ່ຽວກັບແຜນນະໂຍບາຍລົງທຶນໂຄງການເປົ້າໝາຍແຫ່ງຊາດກ່ຽວກັບການພັດທະນາວັດທະນະທຳໄລຍະ 2025-2035...
8. ຜັນຂະຫຍາຍມະຕິຂອງພັກ ກ່ຽວກັບການກໍ່ສ້າງກອງທັບ ໃຫ້ຍອດຢ້ຽມ, ກະທັດຮັດ, ເຂັ້ມແຂງ
ໂດຍປະຕິບັດຫົວຂໍ້ປີ 2024: “ປີແຫ່ງການດັດປັບກໍາລັງໂດຍພື້ນຖານຕາມທິດຍອດຢ້ຽມ, ກະທັດຮັດ, ເຂັ້ມແຂງ”, ຄະນະພັກການທະຫານສູນກາງ, ກະຊວງປ້ອງກັນປະເທດ ໄດ້ຊີ້ນຳນໍາພາທົ່ວກອງທັບຜັນຂະຫຍາຍບັນດາມາດຕະການແກ້ໄຂຢ່າງຄົບຊຸດ, ຫັນບັນດາມະຕິ, ຄໍາສັ່ງຂອງພັກກ່ຽວກັບການກໍ່ສ້າງກອງທັບໃຫ້ຍອດຢ້ຽມ, ກະທັດຮັດ, ເຂັ້ມແຂງເປັນລະອຽດ. ຄະນະພັກ, ຜູ້ບັນຊາທຸກຂັ້ນໄດ້ຜັນຂະຫຍາຍແຜນການສັງລວມ, ວິທີການດໍາເນີນຢ່າງແໜ້ນແຟ້ນ, ວິທະຍາສາດ, ດັບປັບເພີ່ມ, ຫຼຸດກົງຈັກການຈັດຕັ້ງ ແລະຈໍານວນພົນໃຫ້ເໝາະສົມກັບລັກສະນະພິເສດ, ໜ້າທີ່ຂອງແຕ່ລະອົງການ, ກົມກອງ, ມີໂຄງປະກອບຄົບຊຸດ, ເໝາະສົມລະຫວ່າງບັນດາພາກສ່ວນ, ກໍາລັງ. ທ່ົວກອງທັບໄດ້ດັດປັບ ແລະປະກາດໃຊ້ໂຄງປະກອບການບັນຈຸພະນັກງານໃຫ້ເກືອບ 1.100 ອົງການຈັດຕັ້ງ, ຮັບປະກັນຄວາມເຂັ້ມງວດ, ແໜ້ນແຟ້ນ, ຕອບສະໜອງຄວາມຮຽກຮ້ອງຕ້ອງການ, ໜ້າທີ່ກໍ່ສ້າງກອງທັບໃຫ້ຍອດຢ້ຽມ, ກະທັດຮັດ, ເຂັ້ມແຂງໃນສະພາບການໃໝ່.
9. ຫວຽດນາມ ມີຕື່ມອີກ 2 ມໍລະດົກທີ່ໄດ້ຮັບການຮັບຮອງຈາກ UNESCO
ວັນທີ 8 ພຶດສະພາ 2024, “ເຄື່ອງຫຼໍ່ນູນເທິງໂຖທອງ 9 ອັນ ຢູ່ພະລາຊະວັງເຫ້ວ” ຂອງຫວຽດນາມ ໄດ້ນຳເຂົ້າບັນຊີລາຍຊື່ມໍລະດົກເອກະສານອາຊີ - ປາຊີຟິກ ຂອງ UNESCO ຢ່າງເປັນທາງການ. ວັນທີ 4 ທັນວາ 2024, UNESCO ໄດ້ຮັບຮອງງານບຸນແມ່ພະຍາພູຊາມ ເປັນມໍລະດົກວັດທະນະທຳນາມມະທໍາຂອງມະນຸດ.
10. ເປີດການນໍາໃຊ້ເຄືອຂ່າຍ 5G, ຍູ້ແຮງການຫັນເປັນດີຈີຕອນແຫ່ງຊາດ
ວັນທີ 15 ຕຸລາ 2024, ກຸ່ມບໍລິສັດອຸດສາຫະກຳ-ໂທລະຄົມມະນາຄົມກອງທັບ (Viettel) ໄດ້ສະໜອງການບໍລິການໂທລະຄົມມະນາຄົມ 5G ຢ່າງເປັນທາງການ. ເມື່ອນຳເຂົ້າໃຊ້ງານ, ການບໍລິການ 5G ບໍ່ພຽງແຕ່ຈະປະກອບສ່ວນເຂົ້າໃນການປະຕິບັດເປົ້າໝາຍຫັນເປັນດີຈີຕອນເທົ່ານັ້ນ ຫາກຍັງສົ່ງຜົນກະທົບອັນໃຫຍ່ຫຼວງເຖິງການພັດທະນາເສດຖະກິດ-ສັງຄົມ. ເຄືອຂ່າຍ 5G ຈະແມ່ນເຄື່ອງມືສຳຄັນເພື່ອໃຫ້ຫວຽດນາມ ບັນລຸເປົ້າໝາຍກໍ່ສ້າງພື້ນຖານເສດຖະກິດດີຈີຕອນ, ຄາດວ່າຈະປະກອບສ່ວນ 20% GDP ຂອງປະເທດ ໃນປີ 2025.
ໂດຍ: ທູຈາງ