ສືບຕໍ່ເສີມຂະຫຍາຍນ້ຳໃຈມິດຕະພາບ ແລະການຮ່ວມມືພ້ອມກັນພັດທະນາລະຫວ່າງຮ່າຕິ້ງ ແລະຄຳມ່ວນ

ສະຫາຍ ບຸນມີ ພິມມະສອນ, ຮອງເລຂາພັກແຂວງ, ປະທານສະພາປະຊາຊົນແຂວງຄຳມ່ວນ ຕ້ອນຮັບຄະນະ.

ບັນຍາກາດທີ່ການຕ້ອນຮັບ. ພາບ: baohatinh.vn

ໃນບັນຍາກາດທີ່ເບີກບານມ່ວນຊື່ນ, ສະໜິດສະໜົມ, ໃນນາມອົງຄະນະພັກ, ອໍານາດການປົກຄອງ ແລະປະຊາຊົນແຂວງຮ່າຕິ້ງ, ສະຫາຍ ເຈິ່ນຕູແອງ ໄດ້ສົ່ງຄຳອວຍພອນອັນດີງາມເຖິງອົງຄະນະພັກ, ອໍານາດການປົກຄອງ ແລະປະຊາຊົນແຂວງຄຳມ່ວນ ເນື່ອງໃນໂອກາດບຸນປີໃໝ່ລາວ 2025; ອວຍພອນໃຫ້ນໍ້າໃຈມິດຕະພາບ, ຄວາມສາມັກຄີລະຫວ່າງສອງປະເທດຫວຽດນາມ - ລາວ ເວົ້າລວມ ແລະລະຫວ່າງແຂວງຮ່າຕິ້ງ ແລະຄຳມ່ວນ ເວົ້າສະເພາະນັບມື້ນັບແໜ້ນແຟ້ນກວ່າອີກ.

ສະຫາຍ ເຈິ່ນຕູແອງ ໄດ້ສະແດງຄວາມປິຕິຊົມຊື່ນຕໍ່ໝາກຜົນທີ່ແຂວງຄຳມ່ວນ ບັນລຸໄດ້ໃນປີ 2024, ພ້ອມກັນນັ້ນ ຢືນຢັນວ່າ: ໃນໄລຍະຜ່ານມາ, ສອງແຂວງໄດ້ສະຫງວນໃຫ້ກັນນ້ຳໃຈທີ່ຈິງໃຈ ແລະດີງາມ. ສະຫາຍ ເຈິ່ນຕູແອງ ກໍ່ຫວັງວ່າ ສອງທ້ອງຖິ່ນຈະສືບຕໍ່ຮ່ວມເດີນທາງໃນການພັດທະນາເສດຖະກິດ-ສັງຄົມ, ໜູນຊ່ວຍເຊິ່ງກັນ ແລະກັນ ພັດທະນາໃນທຸກຂົງເຂດ.

ສະຫາຍ ເຈິ່ນຕູແອງ ຮອງປະທານຜູ້ປະຈໍາການສະພາປະຊາຊົນແຂວງຮ່າຕິ້ງ ອວຍພອນອົງຄະນະພັກ, ອໍານາດການປົກຄອງ ແລະປະຊາຊົນແຂວງຄຳມ່ວນ. ພາບ: baohatinh.vn

ສະຫາຍ ບຸນມີ ພິມມະສອນ ໄດ້ຂອບໃຈແຂວງ ຮ່າຕິ້ງ ທີ່ໄດ້ເອົາໃຈໃສ່, ໜູນຊ່ວຍ ແລະຊ່ວຍເຫຼືອໃນຫຼາຍດ້ານໃຫ້ແກ່ການພັດທະນາຂອງແຂວງຄໍາມ່ວນ ໃນໄລຍະທີ່ຜ່ານມາ. ສະຫາຍ ບຸນມີ ພິມມະສອນ ກໍ່ແຈ້ງໃຫ້ຊາບກ່ຽວກັບໝາກຜົນແຫ່ງການພັດທະນາເສດຖະກິດ-ສັງຄົມ ທີ່ແຂວງຄໍາມ່ວນ ບັນລຸໄດ້ໃນປີ 2024. ໃນນັ້ນ, ສະພາບການເມືອງມີຄວາມໝັ້ນຄົງ, ການປ້ອງກັນຊາດ-ປ້ອງກັນຄວາມສະຫງົບໄດ້ຮັບການຮັກສາໄວ້ຢ່າງໝັ້ນຄົງ, ເສດຖະກິດຜ່ານຜ່າຄວາມຫຍຸ້ງຍາກ, ບັນລຸລະດັບເຕີບໂຕ 6,05% (ລື່ນກາຍຄາດໝາຍທີ່ໄດ້ວາງອອກ). ພ້ອມກັນນັ້ນ, ສະຫາຍ ບຸນມີ ພິມມະສອນ ກໍ່ອວຍພອຍໃຫ້ອົງຄະນະພັກ, ອໍານາດການປົກຄອງ ແລະປະຊາຊົນແຂວງຮ່າຕິ້ງ ສືບຕໍ່ບັນລຸໄດ້ບັນດາຜົນງານພົ້ນເດັ່ນໃນທຸກຂົງເຂດ; ຫວັງວ່າຈະສືບຕໍ່ໄດ້ຮັບຄວາມເອົາໃຈໃສ່, ໜູນຊ່ວຍຈາກແຂວງຮ່າຕິ້ງ ໃນໄລຍະຈະມາເຖິງ.

ໂດຍ: ທະນາພອນ