ແຂວງກວາງບິ່ງຂອງຫວຽດນາມ ແລະຄໍາມ່ວນຂອງລາວ ເຊັນຂໍ້ຕົກລົງລາດຕະເວນສອງຝ່າຍ

ໂດຍປະຕິບັດຕາມຂໍ້ຕົກລົງລາດຕະເວນສອງຝ່າຍລະຫວ່າງກອງບັນຊາການທະຫານຊາຍແດນແຂວງກວາງບິ່ງ ກັບກອງບັນຊາການທະຫານແຂວງຄໍາມ່ວນ ລົງວັນທີ 7 ກໍລະກົດ 2013, ມາຮອດປະຈຸບັນ, ສອງຝ່າຍໄດ້ສົມທົບກັນລາດຕະເວນສອງຝ່າຍໄດ້ 136 ຄັ້ງ ໂດຍມີການເຂົ້າຮ່ວມຂອງພະນັກງານ, ນັກຮົບ 1.468 ເທື່ອຄົນ; ໃນນັ້ນໄດ້ສົມທົບກັນລາດຕະເວນສອງຝ່າຍຂັ້ນກອງບັນຊາການ 1 ຄັ້ງ ດ້ວຍການເຂົ້າຮ່ວມຂອງພະນັກງານ, ນັກຮົບ 27 ຄົນ ແລະມີພະນັກງານການນໍາຂັ້ນຄະນະພັກ, ອໍານາດການປົກຄອງທ້ອງຖິ່ນ 15 ຄົນ.

ການນໍາສອງກົມກອງ ເຊັນຂໍ້ຕົກລົງລາດຕະເວນສອງຝ່າຍ. ພາບ: qdnd.vn

ຕໍ່ໜ້າຄວາມຮຽກຮ້ອງຕ້ອງການ, ໜ້າທີ່ຄຸ້ມຄອງ, ປົກປັກຮັກສາຊາຍແດນໃນສະພາບການໃໝ່, ສອງຝ່າຍໄດ້ແລກປ່ຽນ, ຕົກລົງເຫັນດີເປັນເອກະພາບຫຼາຍເນື້ອໃນຮ່ວມມືກ່ຽວກັບການລາດຕະເວນສອງຝ່າຍ. ໃນນັ້ນ, ໄດ້ເອົາໃຈໃສ່ແລກປ່ຽນບັນດາຂໍ້ມູນກ່ຽວກັບການຮັກສາຄວາມໝັ້ນຄົງຢູ່ເຂດຊາຍແດນ; ຕໍ່ສູ້ກັບການເຄື່ອນໄຫວທໍາລາຍຂອງບັນດາເປົ້າໝາຍຢ່າງມີປະສິດທິຜົນ; ກວດກາຊາຍແດນ, ຫຼັກໝາຍຊາຍແດນ, ທາງນ້ອຍຜ່ານຊາຍແດນ ແລະບັນດາກິດຈະກຳທີ່ກ່ຽວຂ້ອງຢູ່ຊາຍແດນ; ມາດຕະການ ແລະວິທີການສົມທົບກັນແກ້ໄຂກໍລະນີ. ພ້ອມທັງກໍ່ສ້າງກົນໄກລາດຕະເວນສອງຝ່າຍຂັ້ນກອງບັນຊາການ ແລະຂັ້ນຄ້າຍທະຫານຊາຍແດນ, ກອງຮ້ອຍທະຫານຊາຍແດນ ເພື່ອແນໃສ່ເພີ່ມທະວີວຽກງານສົມທົບກັນຄຸ້ມຄອງ, ປົກປັກຮັກສາຊາຍແດນສັນຕິພາບ, ມິດຕະພາບ, ການຮ່ວມມື ແລະພັດທະນາ.

ຄະນະປະຕິບັດງານກອງບັນຊາການທະຫານແຂວງຄໍາມ່ວນ ອວຍພອນພະນັກງານ, ນັກຮົບທະຫານຊາຍແດນແຂວງກວາງບິ່ງ ເນື່ອງໃນໂອກາດປີໃໝ່ປະຈຳຊາດປີ 2025. ພາບ: qdnd.vn

ໃນວັນດຽວກັນ, ຄະນະປະຕິບັດງານກອງບັນຊາການທະຫານແຂວງຄໍາມ່ວນ ໂດຍທ່ານພົນຈັດຕະວາ ສົມແຄນ ອັບປະສອນ ຫົວໜ້າການເມືອງກອງບັນຊາການທະຫານແຂວງຄໍາມ່ວນ ເປັນຫົວໜ້າຄະນະ ໄດ້ໄປຢ້ຽມຢາມ, ອວຍພອນພະນັກງານ, ນັກຮົບທະຫານຊາຍແດນແຂວງກວາງບິ່ງ ເນື່ອງໃນໂອກາດບຸນປີໃໝ່ປະຈຳຊາດ ປີ 2025.

ໂດຍ: ໄຊນີດາ