ຕາມ ທ່ານ ໂດ໋ຮຸ່ງຫວຽດ ຮອງລັດຖະມົນຕີກະຊວງການຕ່າງປະເທດຫວຽດນາມ ແລ້ວ, ນີ້ແມ່ນການໄປປະຕິບັດງານດ້ວຍຄັ້ງທໍາອິດທີ່ມີຄວາມພິເສດ. ສໍາລັບຫວຽດນາມ, ນີ້ແມ່ນການຢ້ຽມຢາມຕ່າງປະເທດຂອງການນໍາຫຼັກແຫຼ່ງໃນປີ 2025, ໃນຂະນະນັ້ນ ສໍາລັບ ລາວ, ນີ້ກໍແມ່ນຄະນະປະມຸກລັດຕ່າງປະເທດທໍາອິດມາຢ້ຽມຢາມລາວ ໃນປີ 2025. ສິ່ງນີ້ສະແດງໃຫ້ເຫັນວ່າ ທັງສອງປະເທດ ລ້ວນແຕ່ສະຫງວນບຸລິມະສິດສູງສຸດໃຫ້ແກ່ການປັບປຸງ ແລະພັດທະນາການພົວພັນສອງຝ່າຍ, ສະແດງໃຫ້ເຫັນການພົວ ພັນພິເສດໜຶ່ງບໍ່ມີສອງ, ສັດຊື່ບໍລິສຸດຜຸດຜ່ອງ, ສະໜິດຕິດພັນຄືອ້າຍນ້ອງໃນຄອບຄົວດຽວກັນ.
ເຖິງວ່າ ດໍາເນີນໄປພຽງແຕ່ໃນສອງວັນກໍຕາມ ແຕ່ການຢ້ຽມຢາມ ມີການເຄື່ອນໄຫວເກືອບ 20 ກິດຈະກໍາ, ໃນນັ້ນ ທ່ານນາຍົກລັດຖະມົນຕີ ໄດ້ພົບປະກັບທຸກໆສະຫາຍການນໍາຂັ້ນສູງສຸດຂອງລາວ ແລະເປັນປະທານຮ່ວມ 3 ເຫດການສໍາຄັນພິເສດ ນັ້ນແມ່ນກອງປະຊຸມ ຄັ້ງທີ 47 ຄະນະກໍາມະການຮ່ວມມືທະວີພາຄີລະຫວ່າງລັດຖະບານ ຫວຽດນາມ-ລາວ, ກອງປະຊຸມຮ່ວມມືລົງທຶນຫວຽດນາມ-ລາວ ແລະພິທີວາງສີລາລືກໂຄງການກໍ່ສ້າງສວນສາທາລະນະມິດຕະພາບ ຫວຽດນາມ - ລາວ.
    |
 |
|
ທ່ານ ຟ້າມມິງຈີ້ງ ນາຍົກລັດຖະມົນຕີຫວຽດນາມ ແລະທ່ານ ສອນໄຊ ສີພັນດອນ ນາຍົກລັດຖະມົນຕີລາວ ເຂົ້າຮ່ວມພິທີວາງສີລາລືກໂຄງການກໍ່ສ້າງສວນສາທາລະນະມິດຕະພາບ ຫວຽດນາມ - ລາວ. ພາບ: ສໍານັກຂ່າວສານຫວຽດນາມ. |
ທ່ານ ໂດ໋ຮຸ່ງຫວຽດ ຕີລາຄາວ່າ ການໄປປະຕິບັດງານຂອງ ທ່ານນາຍົກລັດຖະມົນຕີ ໄດ້ປະສົບຜົນສໍາເລັດຢ່າງຈົບງາມ ແລະບັນລຸໝາກຜົນສໍາຄັນຫຼາຍຢ່າງ, ມີປະສິດທິຜົນ, ແທດຈິງ ແລະຮອບດ້ານ, ປະກອບສ່ວນຊຸກຍູ້ການພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານ ຫວຽດນາມ-ລາວ ຢ່າງແຂງແຮງ, ແມ່ນບາດກ້າວຜັນຂະຫຍາຍແນວທາງການຕ່າງປະເທດຂອງກອງປະຊຸມໃຫຍ່ທົ່ວປະເທດ ຄັ້ງທີ XIII ຂອງພັກ ຢ່າງແຂງແຮງ. ພົ້ນເດັ່ນດ້ວຍບັນດາຂີດໝາຍດັ່ງນີ້:
ທີໜຶ່ງແມ່ນ, ການນໍາຂັ້ນສູງສອງປະເທດ ໄດ້ເຫັນດີເປັນເອກະພາບສືບຕໍ່ຮັກສາການພົບປະ, ແລກປ່ຽນຄະນະຜູ້ແທນຂັ້ນສູງ ແລະທຸກຂັ້ນທັງດ້ານສອງຝ່າຍ ແລະຫຼາຍຝ່າຍຢ່າງເປັນປະຈໍາ; ຜັນຂະຫຍາຍກົນໄກຮ່ວມມື, ປຶກສາຫາລືສອງຝ່າຍໃຫ້ເປັນຢ່າງດີ; ເພີ່ມທະວີການແລກປ່ຽນທິດສະດີ, ບົດຮຽນກໍ່ສ້າງພັກ, ພັດທະນາເສດຖະກິດ-ສັງຄົມ, ເຊື່ອມໂຍງເຂົ້າກັບສາກົນ; ສືບຕໍ່ສຶກສາອົບຮົມຄົນຮຸ່ນໜຸ່ມສອງປະເທດ ຮັບຮູ້ຢ່າງຈະແຈ້ງກ່ຽວກັບຄວາມສໍາຄັນ ແລະການຕັດສິນໃຈປັບປຸງ, ເສີມສ້າງການພົວພັນທີ່ສັດຊື່ບໍລິສຸດຜຸດຜ່ອງ, ໃສແຈ້ງ, ຄວາມສາມັກຄີພິເສດລະຫວ່າງສອງປະເທດຢ່າງ ບໍ່ຢຸດຢັ້ງ, ຖືນີ້ແມ່ນຊັບສົມບັດອັນລໍ້າຄ່າທີ່ຄວນໄດ້ຮັບການຮັກສາ, ພັດທະນາ ແລະສືບທອດໃຫ້ຄົນພາຍພາກໜ້າ.
ທີສອງແມ່ນ, ພາຍໃຕ້ການຊີ້ນໍາຢ່າງໃກ້ຊິດຕິດແທດຂອງການນໍາຂັ້ນສູງ ແລະຄວາມຮີບດ່ວນຂອງບັນດາກະຊວງ, ຂະແໜງການ, ທ້ອງຖິ່ນ, ສອງຝ່າຍໄດ້ແກ້ໄຂຫຼາຍໂຄງການທີ່ຄົງຄ້າງຢ່າງເດັດຂາດ, ສ້າງທ່າໃຫ້ແກ່ໄລຍະຮ່ວມມືພັດທະນາໃໝ່ທີ່ຂະຫຍັນຂັນເຄື່ອນ, ແທດຈິງກວ່າ.
ທີສາມແມ່ນ, ສອງຝ່າຍເຫັນດີເປັນເອກະພາບສູງຕໍ່ແຜນນະໂຍບາຍ, ການກໍານົດທິດບັນດາໂຄງການຍຸດທະສາດໃນການເຊື່ອມຕໍ່ພື້ນຖານໂຄງລ່າງ, ການຄົມມະນາຄົມ, ພະລັງງານ, ເພີ່ມທະວີການເຊື່ອມຕໍ່ວິສາຫະກິດເພື່ອເປີດສັງກາດຮ່ວມມືທີ່ມີລັກສະນະເຊື່ອມຕໍ່ສູງລະຫວ່າງສອງພື້ນຖານເສດຖະກິດ; ຕັດສິນໃຈຊຸກຍູ້ການພົວພັນຕາມທິດໃໝ່, ເອົາໃຈໃສ່ປະສິດທິຜົນທີ່ແທດຈິງ, ຫຼີກລ້ຽງການຟຸມເຟືອຍ, ມີຈຸດສຸມ, ຈຸດໃຈກາງ ເພື່ອນໍາການພົວພັນໃຫ້ພັດທະນາຢ່າງແທດຈິງ, ໜູນຊ່ວຍຕັ້ງໜ້າໃຫ້ແກ່ການກໍ່ສ້າງພື້ນຖານເສດຖະກິດເອກະລາດ, ເປັນເຈົ້າຕົນເອງຂອງແຕ່ລະປະເທດ.
ທີສີ່ແມ່ນ, ດ້ວຍຈິດໃຈສາມັກຄີສະໜິດຕິດພັນທີ່ເປັນມູນເຊື້ອ, ການຊ່ວຍເຫຼືອເຊິ່ງກັນແລະກັນລະຫວ່າງສາມປະເທດ ຫວຽດນາມ-ລາວ-ກໍາປູເຈຍ, ສອງຝ່າຍໄດ້ເຫັນດີສືບຕໍ່ແລກປ່ຽນ, ສົມທົບກັບກໍາປູເຈຍ ພ້ອມກັນຊຸກຍູ້ບັນດາໂຄງການ, ການຮ່ວມມືລະຫວ່າງສາມປະເທດ ເພື່ອນໍາມາ ເຊິ່ງ ປະສິດທິຜົນດ້ານເສດຖະກິດທີ່ແທດຈິງ, ສອດຄ່ອງກັບຄວາມຕ້ອງການພັດທະນາ ໃນໄລຍະໃໝ່, ຍົກສູງການສະໜິດຕິດພັນດ້ານເສດຖະກິດໃຫ້ສົມກັບການ ພົວພັນດ້ານການເມືອງ-ການຕ່າງປະເທດ. ທ່ານ ຟ້າມມິງຈີ້ງ ຢັ້ງຢືນວ່າ ຫວຽດນາມ ມີຄວາມສະເໝີຕົ້ນສະເໝີປາຍ, ໃຫ້ບຸລິມະສິດພັດທະນາການພົວພັນກັບບັນດາປະເທດບ້ານໃກ້ເຮືອນຄຽງທີ່ສະໜິດສະໜົມ ຄື ລາວ ແລະ ກໍາປູເຈຍ, ກຽມພ້ອມ ແລະສົ່ງເສີມວິສາຫະກິດຮ່ວມມືລົງທຶນ, ດໍາເນີນທຸລະກິດ, ພ້ອມກັນເຮັດ, ພ້ອມກັນຊົມໃຊ້, ພ້ອມກັນພັດທະນາ.
ທີຫ້າແມ່ນ ກ່ຽວກັບການຮ່ວມມືໃນຂອບເຂດຫຼາຍຝ່າຍ, ສອງຝ່າຍ ໄດ້ໃຫ້ຄໍາໝັ້ນສັນຍາສືບຕໍ່ສົມທົບກັນຢ່າງແໜ້ນແຟ້ນທີ່ເວທີປາໄສສາກົນ ແລະພາກພື້ນ, ພິເສດແມ່ນອາຊຽນ, ພ້ອມກັນຕັ້ງໜ້າປະກອບສ່ວນກໍ່ສ້າງປະຊາຄົມສາມັກຄີ ແລະບົດບາດໃຈກາງຂອງອາຊຽນ ໃນການແກ້ໄຂສິ່ງທ້າທາຍລວມ, ໃນນັ້ນມີ ບັນດາທະເລຕາເວັນອອກ, ແຫຼ່ງນໍ້າແມ່ນໍ້າຂອງ...
ໂດຍ: ໄຊຊະນະ