ແຂວງຈໍາປາສັກ ປາດຖະໜາຢາກຮຽນເອົາບົດຮຽນການຄຸ້ມຄອງຂອງນະຄອນໂຮ່ຈີມິນ

ສະຫາຍ ຫງວຽນໂຮ່ຫາຍ ຮອງເລຂາຜູ້ປະຈໍາການພັກນະຄອນໂຮ່ຈີມິນ ຕ້ອນຮັບສະຫາຍ ອະລຸນໄຊ ສູນນະລາດ ເລຂາພັກແຂວງ, ເຈົ້າແຂວງໆ ຈໍາປາສັກ. ພາບ: ຫວຽດຢຸ້ງ.

ຂອບໃຈຕໍ່ການຕ້ອນຮັບຢ່າງສົມກຽດ, ຈິງໃຈຂອງການນໍາ ແລະປະຊາຊົນນະຄອນໂຮ່ຈີມິນ ທີ່ສະຫງວນໃຫ້ແກ່ຄະນະຜູ້ແທນແຂວງຈໍາປາສັກ, ສະຫາຍ ອະລຸນໄຊ ສູນນະລາດ ໃຫ້ຮູ້ວ່າ ຈຸດປະສົງຂອງການຢ້ຽມຢາມ ແລະເຮັດວຽກຢູ່ນະຄອນໂຮ່ຈີມິນ ແມ່ນເພື່ອຜັນຂະຫຍາຍບົດບັນທຶກຊ່ວຍຈໍາວ່າດ້ວຍການຮ່ວມມືລະຫວ່າງສອງທ້ອງຖິ່ນ. ສະຫາຍ ອະລຸນໄຊ ສູນນະລາດ ຕີລາຄາສູງການພັດທະນາຂອງນະຄອນໂຮ່ຈີມິນ, ຖືການຢ້ຽມຢາມ ແລະເຮັດວຽກຄັ້ງນີ້ແມ່ນໂອກາດເພື່ອໃຫ້ຄະນະຜູ້ແທນແຂວງຈໍາປາສັກ ໄດ້ຮຽນເອົາບົດຮຽນກ່ຽວກັບການຄຸ້ມຄອງຢູ່ໃນຫຼາຍຂົງເຂດຂອງນະຄອນໂຮ່ຈີມິນ.

ບັນຍາກາດທີ່ການຕ້ອນຮັບ. ພາບ: ຫວຽດຢຸ້ງ.

ທ່ານ ອະລຸນໄຊ ສູນນະລາດ ໃຫ້ຮູ້ວ່າ ດ້ວຍຄວາມປາດຖະໜາຢາກນໍາ ແຂວງຈໍາປາສັກ ໃຫ້ກາຍເປັນໜຶ່ງໃນບັນດາທ້ອງຖິ່ນພັດທະນາແຖວໜ້າຂອງລາວ, ນອກຈາກເສີມຂະຫຍາຍກໍາລັງແຮງພາຍໃນແລ້ວ, ແຂວງຈໍາປາສັກ ປາດຖະໜາຢາກໄດ້ຮັບການຮ່ວມມື, ໜູນຊ່ວຍຈາກບັນດາປະເທດ, ໃນນັ້ນມີຫວຽດນາມ. ແຂວງຈໍາປາສັກ ພວມມີຄວາມຕ້ອງການຮຽກຮ້ອງການລົງທຶນເຂົ້າໃນບັນດາຂົງເຂດ ຄື ໂລຈິດສະຕິກ, ອຸດສາຫະກໍາເບົາ, ກະສິກໍາ ແລະການບໍລິການທ່ອງທ່ຽວ.

ສະຫາຍ ຫງວຽນໂຮ່ຫາຍ ຮອງເລຂາຜູ້ປະຈໍາການພັກນະຄອນໂຮ່ຈີມິນ ມອບຂອງຂວັນໃຫ້ສະຫາຍ ອະລຸນໄຊ ສູນນະລາດ ເລຂາພັກແຂວງ, ເຈົ້າ ແຂວງໆຈໍາປາສັກ. ພາບ: ຫວຽດຢຸ້ງ.

ຕີລາຄາສູງຕໍ່ຄໍາສະເໜີກ່ຽວກັບການເພີ່ມທະວີການຮ່ວມມືລະຫວ່າງສອງທ້ອງຖິ່ນຂອງສະຫາຍ ອະລຸນໄຊ ສູນນະລາດ, ສະຫາຍ ຫງວຽນໂຮ່ຫາຍ ຢັ້ງຢືນວ່ານີ້ແມ່ນໜຶ່ງໃນບັນດາຄວາມປາດຖະໜາຂອງການນໍາ ແລະປະຊາ ຊົນສອງຝ່າຍ. ຕາມສະຫາຍ ຫງວຽນໂຮ່ຫາຍ, ການພົວພັນຮ່ວມມືລະຫວ່າງຫວຽດນາມ - ລາວ ກໍຄື ນະຄອນໂຮ່ຈີມິນ - ແຂວງຈໍາປາສັກ ໄດ້ພັດທະນາອັນດີງາມ ໃນໄລຍະຜ່ານມາ; ພ້ອມທັງໃຫ້ຄໍາໝັ້ນສັນຍາວ່າ ການນໍານະຄອນ ໂຮ່ຈີມິນ ຈະເຮັດຈົນສຸດຄວາມສາມາດຂອງຕົນ ເພື່ອຍູ້ແຮງການຮ່ວມມືລະຫວ່າງ ສອງທ້ອງຖິ່ນ.

ສະຫາຍ ຫງວຽນໂຮ່ຫາຍ ຫວັງວ່າ ນອກຈາກການຜັນຂະຫຍາຍບັນດາໂຄງການຮ່ວມມືລະຫວ່າງສອງຝ່າຍ, ການຢ້ຽມຢາມ ແລະເຮັດວຽກຂອງຄະນະຜູ້ແທນແຂວງຈໍາປາສັກ ໃນຄັ້ງນີ້ຈະເປີດທິດທາງຮ່ວມມືໃໝ່ລະຫວ່າງສອງທ້ອງຖິ່ນ ໃນໄລຍະຈະມາເຖິງ.

ໂດຍ: ໄຊຊະນະ