ລັດຖະບານລາວ ປະດັບຫຼຽນໄຊ, ຫຼຽນກາ ແລະໃບຍ້ອງຍໍໃຫ້ໝູ່ຄະນະ, ບຸກຄົນທີ່ແຂວງຮວ່າບິງ

ຜູ້ຕາງໜ້າບັນດາໝູ່ຄະນະ, ບຸກຄົນຂອງແຂວງຮວ່າບິງ ທີ່ໄດ້ຮັບຫຼຽນໄຊ, ຫຼຽນກາ ແລະໃບຍ້ອງຍໍຈາກລັດຖະບານລາວ. ພາບ: ເຈິ່ນຫາວ

ລັດຖະບານລາວ ໄດ້ປະດັບຫຼຽນໄຊພັດທະນາຊັ້ນ 1 ໃຫ້ຄະນະກໍາມະການປະຊາຊົນແຂວງຮວ່າບິງ; ປະດັບຫຼຽນໄຊແຮງງານຊັ້ນ 2 ໃຫ້ 2 ໝູ່ຄະນະ, 5 ບຸກຄົນ; ຫຼຽນໄຊແຮງງານຊັ້ນ 3 ໃຫ້ 4 ບົກຄົນ; ປະດັບຫຼຽນກາແຮງງານໃຫ້ 5 ບຸກຄົນ; ມອບໃບຍ້ອງຍໍໃຫ້ 3 ໝູ່ຄະນະທີ່ມີຜົນງານໃນການກໍ່ສ້າງໂຮງຮຽນມັດທະຍົມຕອນປາຍ ເມືອງຫົວເມືອງ, ແຂວງຫົວພັນໄລຍະ 2019-2024.

ທີ່ພິທີ, ທ່ານ ບຸ່ຍດຶກຫິງ ປະທານຄະນະກໍາມະການປະຊາຊົນແຂວງຮວ່າບິງ ເນັ້ນໜັກວ່າ ໂຄງການກໍ່ສ້າງໂຮງຮຽນມັດທະຍົມຕອນປາຍເມືອງຫົວເມືອງ, ແຂວງຫົວພັນ ໄລຍະ 2019-2024 ແມ່ນຂອງຂວັນທີ່ມີຄວາມໝາຍຂອງລັດຖະບານ ແລະປະຊາຊົນຫວຽດນາມ ທີ່ສະຫງວນໃຫ້ລັດຖະບານ ແລະປະຊາຊົນປະເທດເພື່ອນລາວ.

ເມື່ອນຳເຂົ້າເຄື່ອນໄຫວ, ໂຄງການຈະສ້າງເງື່ອນໄຂສະດວກໃຫ້ການຮໍ່າຮຽນຂອງນັກຮຽນ ແລະວຽກງານສິດສອນ, ຄຸ້ມຄອງຂອງຄູສອນ, ຍົກສູງຄຸນນະພາບການສຶກສາແຕ່ຊັ້ນມັດທະຍົມຕອນຕົ້ນເຖິງຊັ້ນມັດທະຍົມຕອນປາຍຢູ່ເມືອງຫົວເມືອງ, ແຂວງຫົວພັນ; ສຶກສາແຫຼ່ງພະນັກງານຢູ່ກັບທີ່, ເປີດທິດທາງໃໝ່ທີ່ມີຫຼາຍແງ່ຫວັງໃຫ້ແກ່ການພັດທະນາການສຶກສາ ແລະຍົກສູງລະດັບຄວາມຮູ້ໃຫ້ປະຊາຊົນໃນເມືອງ.

ທ່ານ ຄໍາແພງ ໄຊສົມແພງ ເລຂາພັກແຂວງ, ເຈົ້າແຂວງໆຫົວພັນ ເນັ້ນໜັກວ່າ: ຫວຽດນາມ-ລາວ; ແຂວງຮວ່າບິງ-ແຂວງຫົວພັນ ມີມູນເຊື້ອສາມັກຄີມາແຕ່ດົນນານ. ແຂວງຫົວພັນ ຍາມໃດກໍ່ໄດ້ຮັບການຊ່ວຍເຫຼືອ, ການສະໜັບສະໜູນຂອງແຂວງຮວ່າບິງ, ນັ້ນແມ່ນການເພີ່ມພູນຄູນສ້າງຄວາມສາມັກຄີມິດຕະພາບແບບພິເສດ ແລະການຮ່ວມມືຮອບດ້ານ, ປະກອບສ່ວນພັດທະນາເສດຖະກິດ-ສັງຄົມແຂວງຫົວພັນ.

ພາຍຫຼັງເກືອບ 4 ປີດໍາເນີນການກໍ່ສ້າງ, ມາຮອດປະຈຸບັນໂຄງການໄດ້ສໍາເລັດ, ມອບ-ຮັບ ແລະນໍາເຂົ້າເຄື່ອນໄຫວໃນວັນທີ 3 ມິຖຸນາ 2024, ສໍາເລັດວຽກງານກວດກາຊຳລະສະສາງເງິນລົງທຶນ (ສ່ວນທຶນຂອງລັດຖະບານຫວຽດນາມ).

ໂດຍ: ໄຊນີດາ