ສາຍໃຈຫວຽດນາມ-ລາວ ຢູ່ປະເທດຝຣັ່ງ ເນື່ອງໃນໂອກາດວັນຊາດລາວ
ກປ.ອອນໄລ - ວັນທີ 29 ພະຈິກ, ທ່ານ ດິງຕວ່ານຖັງ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳ ຝຣັ່ງ ໄດ້ນຳໜ້າຄະນະຜູ້ແທນສະຖານທູດ ແລະບັນດາອົງການຕາງໜ້າຂອງຫວຽດນາມ ປະຈຳ ຝຣັ່ງ ໄປອວຍພອນສະຖານທູດລາວ ປະຈໍາ ຝຣັ່ງ ເນື່ອງໃນໂອກາດສະເຫຼີມສະຫຼອງ 49 ປີແຫ່ງວັນຊາດ ສປປ ລາວ (2 ທັນວາ 1975 / 2 ທັນວາ 2024).
ໃນບັນຍາກາດອັນສະໜິດສະໜົມ, ທ່ານເອກອັກຄະລັດຖະທູດ ດິງຕວ່ານຖັງ ໄດ້ສະແດງຄວາມປິຕິຊົມຊື່ນຕໍ່ບັນດາຜົນງານອັນສຳຄັນໃນທຸກຂົງເຂດທີ່ປະເທດລາວອ້າຍນ້ອງບັນລຸໄດ້ໃນໄລຍະ 49 ປີຜ່ານມາ, ກໍ່ຄືການພັດທະນາຢ່າງແຮງໃນການພົວພັນລະຫວ່າງສອງປະເທດ.
    |
 |
|
ທ່ານເອກອັກຄະລັດຖະທູດ ດິງຕວ່ານຖັງ ແລະທ່ານເອກອັກຄະລັດຖະທູດ ຄຳອິນ ຄິດຈະເດດ ປາດຖະໜາວ່າ ພະນັກງານ, ພາລະກອນຂອງບັນດາອົງການຜູ້ຕາງໜ້າຂອງຫວຽດນາມ ແລະລາວ ຈະຮ່ວມມືຢ່າງແໜ້ນແຟ້ນຢູ່ຝຣັ່ງ, ຕັ້ງໜ້າປະກອບສ່ວນໃຫ້ການພົວພັນແບບພິເສດລະຫວ່າງສອງປະເທດ. ພາບ: ມິງຢຸຍ. |
ໂດຍເນັ້ນໜັກເຖິງການຊາບຊືມທິດນຳຂອງການນຳສອງປະເທດໃນການເພີ່ມພູນຄູນສ້າງ, ເພີ່ມທະວີສາຍພົວພັນມິດຕະພາບອັນຍິ່ງໃຫຍ່ລະຫວ່າງສອງປະເທດອ້າຍນ້ອງຢ່າງບໍ່ຢຸດຢັ້ງ, ທ່ານເອກອັກຄະລັດຖະທູດ ດິງຕວ່ານຖັງ ໄດ້ຕີລາຄາສູງຄວາມຕັດສິນໃຈ ແລະຄວາມມານະພະຍາຍາມຂອງບັນດາອົງການຕາງໜ້າຫວຽດນາມ ແລະລາວ ຢູ່ຝຣັ່ງ ເພື່ອແນໃສ່ຮັກສາ ແລະເສີມຂະຫຍາຍມູນເຊື້ອອັນດີງາມ, ການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະປະຊາຊົນສອງຊາດ.
ສ່ວນທ່ານ ຄຳອິນ ຄິດຈະເດດ ເອກອັກຄະລັດຖະທູດລາວ ປະຈຳ ຝຣັ່ງ ໄດ້ຂອບອົກຂອບໃຈຄະນະຜູ້ແທນບັນດາອົງການຕາງໜ້າຫວຽດນາມ ທີ່ໄດ້ມາອວຍພອນເນື່ອງໃນໂອກາດວັນຊາດລາວ. ທ່ານເອກອັກຄະລັດຖະທູດ ຄໍາອິນ ຄິດຈະເດດ ຕີລາຄາສູງການສະໜັບສະໜູນ ແລະຈິດໃຈຄຽງບ່າຄຽງໄລ່ຂອງຫວຽດນາມ ທີ່ສະຫງວນໃຫ້ພັກ, ລັດ, ລັດຖະບານ ແລະປະຊາຊົນ ລາວ ໃນພາລະກິດສ້າງສາ, ປົກປັກຮັກສາ ແລະພັດທະນາປະເທດ, ເປັນຕົ້ນແມ່ນໜູນຊ່ວຍລາວ ສຳເລັດໜ້າທີ່ເປັນປະທານອາຊຽນ ໃນປີ 2024 ເປັນຢ່າງດີ.
ທີ່ການພົບປະ, ສອງຝ່າຍໄດ້ເຫັນດີເປັນເອກະພາບສົມທົບກັນຢ່າງແໜ້ນແຟ້ນ, ຊຸກຍູ້ການປະຕິບັດບັນດາຂໍ້ຕົກລົງລະຫວ່າງສອງພັກ, ສອງປະເທດ ກໍ່ຄືບັນດາຖະແຫຼງການຮ່ວມສອງຝ່າຍ, ບັນດາຂໍ້ຕົກລົງຮ່ວມມືລະຫວ່າງລັດຖະບານສອງປະເທດຫວຽດນາມ - ລາວ.
ໂດຍ: ຈາງຫງວຽນ