ແຂວງກວາງນາມ ແລະເຊກອງ ເພີ່ມທະວີການຮ່ວມມືໃນການປ້ອງກັນ, ຕ້ານຢາເສບຕິດ

ໃນໄລຍະຜ່ານມາ, ສະພາບອາດຊະຍາກໍາຢາເສບຕິດ ແລະໄພຢາເສບຕິດຢູ່ບໍລິເວນແຂວງກວາງນາມ ສືບຕໍ່ຜັນແປຢ່າງສັບສົນ. ແຕ່ຕົ້ນປີ 2024 ມາຮອດປະຈຸບັນ, ບັນດາກໍາລັງທີ່ກ່ຽວຂ້ອງຂອງແຂວງກວາງນາມ ໄດ້ພົບເຫັນ, ຈັບໄດ້ 217 ຄະດີ, 388 ເປົ້າໝາຍອາດຊະຍາກໍາກ່ຽວກັບຢາເສບຕິດ, ຢຶດຢາເສບຕິດປະເພດຕ່າງໆກວ່າ 319 ກີໂລກຣາມ. ໃນຈໍານວນບັນດາເປົ້າໝາຍທີ່ຈັບໄດ້ມີ 3 ຄົນຖືສັນຊາດລາວ.

ກໍາລັງຕໍາຫຼວດສືບສວນອາດຊະຍາກໍາຢາເສບຕິດສອງແຂວງກວາງນາມ ແລະເຊກອງ ເຂົ້າຮ່ວມປະຊຸມວິຊາການ. ພາບ: ງອັກທິ

ເຖິງວ່າຕໍາຫຼວດແຂວງກວາງນາມ ແລະຕໍາຫຼວດແຂວງເຊກອງ ໄດ້ຜັນຂະຫຍາຍການຮ່ວມມືຕ້ານ ແລະສະກັດກັ້ນຢາເສບຕິດຕາມບົດບັນທຶກຊ່ວຍຈໍາຂອງກະຊວງຕໍາຫຼວດຫວຽດນາມ ແລະກະຊວງປ້ອງກັນຄວາມສະຫງົບລາວ ແລະບົດບັນທຶກຊ່ວຍຈໍາລະຫວ່າງຕໍາຫຼວດສອງແຂວງແລ້ວກໍຕາມ, ແຕ່ການຮ່ວມມືກໍຍັງບໍ່ຕອບສະໜອງຄວາມຮຽກຮ້ອງຕ້ອງການຂອງວຽກງານຕໍ່ສູ້ຕ້ານ ແລະສະກັດກັ້ນອາດຊະຍາກໍາກ່ຽວກັບຢາເສບຕິດລະຫວ່າງຕໍາຫຼວດສອງແຂວງ.

ສະນັ້ນ, ທີ່ກອງປະຊຸມວິຊາການຕ້ານ ແລະສະກັດກັ້ນຢາເສບຕິດຄັ້ງນີ້, ກໍາລັງຕໍາຫຼວດສືບສວນອາດຊະຍາກໍາຢາເສບຕິດສັງກັດຕໍາຫຼວດສອງແຂວງກວາງນາມ ແລະເຊກອງ ໄດ້ເຫັນດີເປັນເອກະພາບຫຼາຍເນື້ອໃນສໍາຄັນ, ໃນນັ້ນສອງຝ່າຍໄດ້ເອົາໃຈໃສ່ເປັນສໍາຄັນຍົກສູງການຮ່ວມມືຕ້ານ ແລະສະກັດກັ້ນໃຫ້ມີປະສິດທິຜົນກວ່າອີກ; ສົມທົບ, ໜູນຊ່ວຍສືບສວນບັນດາຄະດີກ່ຽວກັບຢາເສບຕິດມີເປົ້າໝາຍພົນລະເມືອງຂອງແຕ່ລະປະເທດ, ແຕ່ລະແຂວງປະຕິບັດຖືກຕາມເນື້ອໃນຈິດໃຈບົດບັນທຶກຊ່ວຍຈໍາກ່ຽວກັບການຮ່ວມມືຕ້ານ ແລະສະກັດກັ້ນຢາເສບຕິດລະຫວ່າງກະຊວງຕໍາຫຼວດຫວຽດນາມ ແລະກະຊວງປ້ອງກັນຄວາມສະຫງົບລາວ.

ກໍາລັງຕໍາຫຼວດສືບສວນອາດຊະຍາກໍາກ່ຽວກັບຢາເສບຕິດສອງແຂວງກວາງນາມ ແລະເຊກອງ ກໍ່ໄດ້ປຶກສາຫາລືເນື້ອໃນຮ່າງເອກະສານຂໍ້ຕົກລົງລະຫວ່າງຕໍາຫຼວດສອງແຂວງກ່ຽວກັບການຮ່ວມມືກໍານົດ, ຕໍ່ສູ້ຄະດີລວມ ແລະໜູນຊ່ວຍສືບສວນບັນດາຄະດີກ່ຽວກັບຢາເສບຕິດທີ່ກ່ຽວຂ້ອງເຖິງພົນລະເມືອງຂອງແຕ່ລະປະເທດ ເພື່ອເປັນເສນາທິການເອົາເພີ່ມເຂົ້າເນື້ອໃນເຮັດວຽກທີ່ຈະມາເຖິງລະຫວ່າງຄະນະຫົວໜ້າຕໍາຫຼວດສອງແຂວງ.

ໂດຍ: ດັ້ງເກື່ອງ