ລາດຕະເວນສອງຝ່າຍຢູ່ເຂດຊາຍແດນ ຫວຽດນາມ-ລາວ

ການນໍາກອງບັນຊາການທະຫານຊາຍແດນແຂວງກວາງຈິ ແລະການນໍາກອງບັນຊາການທະຫານແຂວງສາລະວັນ ປະຕິບັດພິທີກໍາຢູ່ຫຼັກໝາຍຊາຍແດນ. ພາບ: ວິງຟານ

ກອງບັນຊາການທະຫານຊາຍແດນແຂວງກວາງຈິ ໄດ້ແຈ້ງໃຫ້ຊາບວ່າ ກອງລາດຕະເວນສອງຝ່າຍລະຫວ່າງກອງບັນຊາການທະຫານຊາຍແດນແຂວງກວາງຈິ ແລະກອງບັນຊາການທະຫານແຂວງສາລະວັນ ໄດ້ດໍາເນີນການກວດກາເສັ້ນຊາຍແດນ, ກວດກາສະພາບຄວາມປອດໄພຂອງລະບົບຫຼັກໝາຍຊາຍແດນຫວຽດນາມ-ລາວ ແຕ່ເຂດຫຼັກໝາຍຊາຍແດນທີ 634 ເຖິງ 636.

ກອງບັນຊາການທະຫານຊາຍແດນແຂວງກວາງຈິ ສົມທົບກັບກອງບັນຊາການທະຫານແຂວງສາລະວັນ ຈັດຕັ້ງການລາດຕະເວນ ຢູ່ເສັ້ນຊາຍແດນຫວຽດນາມ-ລາວ. ພາບ: ວິງຟານ

ຜ່ານການກວດກາ ໄດ້ຊີ້ໃຫ້ເຫັນວ່າ ເສັ້ນຊາຍແດນ, ບັນດາຫຼັກໝາຍຊາຍແດນແຫ່ງຊາດຮັບປະກັນຢູ່ໃນສະພາບເດີມ, ບໍ່ມີສັນຍານຍັບຍ້າຍ ຫຼື ເປ່ເພ. ປະຊາຊົນທີ່ຢູ່ສອງຟາກຊາຍແດນໄດ້ທໍາມາຫາກິນເປັນປົກກະຕິ, ພັດທະນາເສດຖະກິດ, ປະຕິບັດເອກະສານນິຕິກຳກ່ຽວກັບຊາຍແດນລະຫວ່າງຫວຽດນາມ ແລະລາວ ເປັນຢ່າງດີ.

ສອງກົມກອງໄດ້ຖອດຖອນບົດຮຽນ, ເຫັນດີເປັນເອກະພາບເນື້ອໃນໃຫ້ການລາດຕະເວນຄັ້ງຕໍ່ໄປ ແລະເຊັນບົດບັນທຶກຮັບຮູ້ຜົນການລາດຕະເວນສອງຝ່າຍ. ພາບ: ວິງຟານ

ສິ້ນສຸດການລາດຕະເວນ, ສອງຝ່າຍໄດ້ຖອດຖອນບົດຮຽນ, ແລກປ່ຽນກ່ຽວກັບແຜນນະໂຍບາຍ, ມາດຕະການ, ເຫັນດີເປັນເອກະພາບ ກ່ຽວກັບເວລາ, ຈໍານວນພົນທະຫານໃຫ້ການລາດຕະເວນຄັ້ງຕໍ່ໄປ ແລະເຊັນບົດບັນທຶກຮັບຮູ້ຜົນການລາດຕະເວນສອງຝ່າຍ.

ຕາມນັ້ນແລ້ວ, ສອງຝ່າຍພ້ອມກັນເຫັນດີເປັນເອກະພາບ ຈະສົມທົບກັບຄະນະພັກ, ອໍານາດການປົກຄອງທ້ອງຖິ່ນ ແລະບັນດາກຳລັງເຈົ້າໜ້າທີ່ສອງປະເທດເພີ່ມທະວີວຽກງານໂຄສະນາ, ສຶກສາ, ຂົນຂວາຍປະຊາຊົນຢູ່ເຂດຊາຍແດນເຄົາລົບ ແລະປະຕິບັດສັນຍາວ່າດ້ວຍລະບຽບການຄຸ້ມຄອງຊາຍແດນ ແລະດ່ານຊາຍແດນທາງບົກ ຫວຽດນາມ-ລາວ ຢ່າງເຂັ້ມງວດ.

ສົມທົບກັນແລກປ່ຽນຂໍ້ມູນຂ່າວສານກ່ຽວກັບສະພາບການທີ່ກ່ຽວຂ້ອງເຖິງຊາຍແດນ, ວຽກງານຕໍ່ສູ້ປ້ອງກັນ, ຕ້ານອາດຊະຍາກໍາ ຢ່າງເປັນປະຈໍາ, ເພີ່ມທະວີວຽກງານລາດຕະເວນ, ຄວບຄຸມບັນດາທາງນ້ອຍ, ທາງຮ່ອມໃຫ້ແໜ້ນແຟ້ນ,  ສົມທົບກັນໃນວຽກງານຄຸ້ມຄອງປົກປັກຮັກສາຊາຍແດນ, ຮັກສາຄວາມສະຫງົບ ຄວາມເປັນລະບຽບຮຽບຮ້ອຍຢູ່ເຂດຊາຍແດນ, ກໍ່ສ້າງເສັ້ນຊາຍແດນສາມັກຄີ, ສັນຕິພາບ, ມິດຕະພາບ.

ໂດຍ: ໄຊນີດາ