ການນຳກະຊວງປ້ອງກັນປະເທດ, ກອງທັບບັນດາປະເທດ ຊົມເຊີຍຫວຽດນາມ ຈັດຕັ້ງງານວາງສະແດງປະສົບຜົນສຳເລັດ

ພະຍານຫຼັກຖານທີ່ມີຊີວິດຊີວາຂອງນ້ຳໃຈສາມັກຄີ, ມິດຕະພາບກັບຫວຽດນາມ

ຕອນບ່າຍວັນທີ 19 ທັນວາ, ທີ່ສຳນັກງານກະຊວງປ້ອງກັນປະເທດຫວຽດນາມ, ທ່ານພົນເອກ ຟານວັນຢາງ ໄດ້ພົບປະກັບການນຳກະຊວງປ້ອງກັນປະເທດ, ກອງທັບບັນດາປະເທດ ເນື່ອງໃນໂອກາດມາເຂົ້າຮ່ວມງານວາງສະແດງປ້ອງກັນຊາດສາກົນຫວຽດນາມ 2024 ຢູ່ຫວຽດນາມ.

ທ່ານພົນເອກ ຟານວັນຢາງ ກ່າວຄຳເຫັນທີ່ການຕ້ອນຮັບ. ພາບ: ຕ໊ວນຮຸຍ

ທີ່ການພົບປະ, ທ່ານພົນເອກ ຟານວັນຢາງ ຢັ້ງຢືນວ່າ ງານວາງສະແດງປີນີ້ສືບຕໍ່ໄດ້ຮັບການສະໜັບສະໜູນ, ເຂົ້າຮ່ວມຢ່າງຕັ້ງໜ້າຂອງບັນດາຄູ່ຮ່ວມມື, ເພື່ອນມິດສາກົນ, ວິສາຫະກິດປ້ອງກັນຊາດເຂົ້າຮ່ວມວາງສະແດງ, ແມ່ນພະຍານຫຼັກຖານທີ່ມີຊີວິດຊີວາຂອງນ້ຳໃຈສາມັກຄີ, ມິດຕະພາບຂອງກະຊວງປ້ອງກັນປະເທດ, ກອງທັບບັນດາປະເທດ ທີ່ສະຫງວນໃຫ້ແກ່ຫວຽດນາມ ເວົ້າລວມ ແລະກອງທັບປະຊາຊົນຫວຽດນາມ ເວົ້າສະເພາະ.

ບັນຍາກາດທີ່ການຕ້ອນຮັບ. ພາບ: ຕ໊ວນຮຸຍ

ເມື່ອເນັ້ນໜັກເຖິງຄວາມໝາຍຂອງງານວາງສະແດງປ້ອງກັນຊາດສາກົນຫວຽດນາມ 2024, ທ່ານພົນເອກ ຟານວັນຢາງ ຫວັງວ່າ ຫວຽດນາມ ປາດຖະໜາຢາກໃຫ້ບັນດາວິສາຫະກິດປ້ອງກັນຊາດຂອງຫວຽດນາມ ແລະບັນດາປະເທດພ້ອມກັນແລກປ່ຽນຂໍ້ມູນຂ່າວສານ, ແນະນຳກ່ຽວກັບຄວາມສາມາດ, ບັນດາຂົງເຂດຂອງແຕ່ລະວິສາຫະກິດທີ່ມີຄວາມສາມາດບົ່ມຊ້ອນ ເພື່ອເພີ່ມທະວີຄວາມເຂົ້າອົກເຂົ້າໃຈເຊິ່ງກັນ ແລະກັນ, ອຳນວຍຄວາມສະດວກໃຫ້ແກ່ການຊອກຫາກາລະໂອກາດຮ່ວມມືໃນອະນາຄົດ; ເປັນເຈົ້າການຍົກອອກແນວຄວາມຄິດ, ໂຄງການຮ່ວມມືທີ່ມີແງ່ຫວັງ, ໂດຍສະເພາະແມ່ນບັນດາໂຄງການຮ່ວມມືຮ່ວມທຸລະກິດພ້ອມກັນຜະລິດບັນດາຜະລິດຕະພັນທີ່ໃຊ້ໄດ້ສອງໜ້າທີ່, ທັນສະໄໝ, ສາມາດຕອບສະໜອງຕາມຄວາມຮຽກຮ້ອງຕ້ອງການຂອງຕະຫຼາດພາກພື້ນ ກໍ່ຄື ໂລກ.

ການນຳກະຊວງປ້ອງກັນປະເທດ, ກອງທັບບັນດາປະເທດທີ່ມາເຂົ້າຮ່ວມງານວາງສະແດງປ້ອງກັນຊາດສາກົນຫວຽດນາມ 2024. ພາບ: ຕ໊ວນຮຸຍ

ຫວຽດນາມ ຊົມເຊີຍບັນດາກຸ່ມວິສາຫະກິດ, ວິສາຫະກິດອຸດສາຫະກຳປ້ອງກັນຊາດບັນດາປະເທດ ໃຫ້ຄໍາປຶກສາຫາລື ແລະຄໍາສະເໜີແນະໃຫ້ກະຊວງປ້ອງກັນປະເທດ ແລະລັດຖະບານຫວຽດນາມ ກ່ຽວກັບມາດຕະການສ້າງກົນໄກ, ສ້າງເງື່ອນໄຂສະດວກພັດທະນາການພົວພັນຮ່ວມມືອຸດສາຫະກຳປ້ອງກັນຊາດລະຫວ່າງຫວຽດນາມ ແລະບັນດາປະເທດ; ປະກອບສ່ວນຊຸກຍູ້ການຮ່ວມມືທີ່ແທດຈິງກັບບັນດາຄູ່ຮ່ວມມືບົນພື້ນຖານສະເໝີພາບ, ຕ່າງຝ່າຍຕ່າງມີຜົນປະໂຫຍດ, ສອດຄ່ອງກັບຫຼັກການພື້ນຖານຂອງກົດໝາຍສາກົນ.

ກາລະໂອກາດຊຸກຍູ້ຂະແໜງອຸດສາຫະກຳປ້ອງກັນຊາດພາກພື້ນ ແລະທົ່ວໂລກ

ທີ່ການພົບປະ, ຕາງໜ້າການນຳກະຊວງປ້ອງກັນປະເທດ, ກອງທັບບັນດາປະເທດເຂົ້າຮ່ວມງານວາງສະແດງປ້ອງກັນຊາດສາກົນຫວຽດນາມ 2024, ທ່ານພົນໂທ ຄຳລຽງ ອຸທະໄກສອນ, ລັດຖະມົນຕີກະຊວງປ້ອງກັນປະເທດແຫ່ງ ສປປ ລາວ ກ່າວຄໍາເຫັນຊົມເຊີຍ ຫວຽດນາມ ທີ່ໄດ້ຈັດຕັ້ງງານວາງສະແດງ, ສະແດງຄວາມຂອບອົກຂອບໃຈຕໍ່ການຕ້ອນຮັບຢ່າງອົບອຸ່ນຂອງປະເທດຫວຽດນາມ; ຕີລາຄາສູງ ແລະສະແດງຄວາມຂອບອົກຂອບໃຈກະຊວງປ້ອງກັນປະເທດຫວຽດນາມ ຈັດຕັ້ງເຫດການສຳຄັນນີ້ປະສົບຜົນສຳເລັດ.

ທ່ານພົນໂທ ຄຳລຽງ ອຸທະໄກສອນ, ລັດຖະມົນຕີກະຊວງປ້ອງກັນປະເທດແຫ່ງ ສປປ ລາວ (ເບື້ອງຊ້າຍ) ກ່າວຄໍາເຫັນຊົມເຊີຍຫວຽດນາມ. ພາບ: ຕ໊ວນຮຸຍ

ທ່ານພົນໂທ ຄຳລຽງ ອຸທະໄກສອນ ຖືວ່າ ງານວາງສະແດງປ້ອງກັນຊາດສາກົນຫວຽດນາມ 2024 ໄດ້ນໍາມາເຊິ່ງບັນດາຄຸນຄ່າພ້ອມດ້ວຍກາລະໂອກາດ ເພື່ອໃຫ້ຂະແໜງອຸດສາຫະກໍາປ້ອງກັນຊາດພາກພື້ນ ແລະທົ່ວໂລກ ຄົ້ນພົບເຕັກໂນໂລຢີປ້ອງກັນຊາດ, ເຕັກໂນໂລຢີການທະຫານ; ພັດທະນາ ແລະຊຸກຍູ້ການຄົ້ນຄວ້າວິທະຍາສາດ, ຜະລິດໃນຂະແໜງອຸດສາຫະກຳປ້ອງກັນຊາດ, ແລກປ່ຽນຂໍ້ມູນຂ່າວສານ, ຮ່ວມມືໃນຂົງເຂດນີ້, ເພື່ອສັນຕິພາບ ແລະຄວາມໝັ້ນຄົງພາກພື້ນ ແລະໂລກ.

ທ່ານພົນຈັດຕະວາ Pehin Halbi, ລັດຖະມົນຕີກະຊວງປ້ອງກັນປະເທດຜູ້ທີສອງ ແຫ່ງ ບຣູໄນ ດາຣູຊາລາມ ກ່າວຄຳເຫັນທີ່ການຕ້ອນຮັບ. ພາບ: ຕ໊ວນຮຸຍ

ສ່ວນທ່ານພົນຈັດຕະວາ Pehin Halbi, ລັດຖະມົນຕີກະຊວງປ້ອງກັນປະເທດຜູ້ທີສອງ ແຫ່ງ ບຣູໄນ ດາຣູຊາລາມ ກໍສະແດງຄວາມປະທັບໃຈຕໍ່ພິທີເປີດງານວາງສະແດງ ເປັນການສົ່ງສານທີ່ມີຄວາມໝາຍ “ສັນຕິພາບ, ມິດຕະພາບ, ຮ່ວມມື ພ້ອມກັນພັດທະນາ”, ໃຫ້ຄຳໝັ້ນສັນຍາວ່າ ບຣູໄນ ຈະຮ່ວມມືກັບບັນດາປະເທດ ເພື່ອຮັກສາສັນຕິພາບຢູ່ພາກພື້ນອາຊຽນ; ປາດຖະໜາຢາກມີຫຼາຍກາລະໂອກາດ ເພື່ອຊຸກຍູ້ການຮ່ວມມືກັບຫວຽດນາມ, ບັນດາປະເທດອາຊຽນ ແລະບັນດາປະເທດຢູ່ນອກພາກພື້ນ.

ທ່ານພົນເອກ ຟານວັນຢາງ ຖ່າຍຮູບເປັນທີ່ລະນຶກກັບການນຳກະຊວງປ້ອງກັນປະເທດ, ກອງທັບບັນດາປະເທດທີ່ມາເຂົ້າຮ່ວມງານວາງສະແດງປ້ອງກັນຊາດສາກົນຫວຽດນາມ 2024. ພາບ: ຕ໊ວນຮຸຍ

ທ່ານ Phumtham Wechayachai, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດແຫ່ງ ລາຊະອານາຈັກໄທ ຖືວ່າ ນີ້ແມ່ນກາລະໂອກາດເພື່ອຄົ້ນຫາກ່ຽວກັບປະເທດຫວຽດນາມ, ເພີ່ມທະວີຄວາມເຂົ້າອົກເຂົ້າໃຈ, ແລກປ່ຽນບົດຮຽນ ແລະຮຽນຮູ້ນຳກັນ, ຈາກນັ້ນພັດທະນາການພົວພັນໃນຂົງເຂດປ້ອງກັນຊາດ; ພ້ອມທັງສະແດງຄວາມຂອບໃຈຕໍ່ກັບຄວາມຮັກແພງແຂກຄົນ ແລະວຽກງານກະກຽມຢ່າງລອບຄອບຖີ່ຖ້ວນຂອງກະຊວງປ້ອງກັນປະເທດຫວຽດນາມ.

ການຈັດຕັ້ງຢ່າງອາລັງການ, ປະທັບໃຈ

ຕອນບ່າຍວັນທີ 19 ທັນວາ, ຢູ່ຮ່າໂນ້ຍ, ທ່ານພົນເອກ ຫງວຽນເຕິນເກືອງ, ກຳມະການສູນກາງພັກ, ຄະນະປະຈໍາຄະນະພັກການທະຫານສູນກາງ, ຫົວໜ້າກົມໃຫຍ່ເສນາທິການກອງທັບປະຊາຊົນຫວຽດນາມ, ຮອງລັດຖະມົນຕີກະຊວງປ້ອງກັນປະເທດຫວຽດນາມ ໄດ້ຕ້ອນຮັບທ່ານພົນເອກ Samuel Paparo, ຜູ້ບັນຊາການກອງບັນຊາການມະຫາສະໝຸດອິນເດຍ-ປາຊີຟິກ ຂອງອາເມລິກາ.

ທ່ານພົນເອກ ຫງວຽນເຕິນເກືອງ ຕ້ອນຮັບທ່ານພົນເອກ Samuel Paparo. ພາບ: ຕ໊ວນຮຸຍ

ທ່ານພົນເອກ ຫງວຽນເຕິນເກືອງ ສະແດງຄວາມຂອບອົກຂອບໃຈ ອາເມລິກາ ທີ່ໄດ້ຈັດສົ່ງຄະນະຜູ້ແທນຂັ້ນສູງພ້ອມດ້ວຍຫຼາຍວິສາຫະກິດ ແລະວັດຖຸອຸປະກອນປ້ອງກັນຊາດ ມາເຂົ້າຮ່ວມງານວາງສະແດງປ້ອງກັນຊາດສາກົນຫວຽດນາມ 2024; ເນັ້ນໜັກວ່າ ໃນໄລຍະຜ່ານມາ, ການຮ່ວມມືປ້ອງກັນຊາດຫວຽດນາມ-ອາເມລິກາ ໄດ້ຜັນຂະຫຍາຍຢ່າງມີປະສິດທິຜົນໃນຫຼາຍຂົງເຂດ: ການບຳລຸງສ້າງ, ການແພດທະຫານ, ຮັກສາສັນຕິພາບສະຫະປະຊາຊາດ, ຊ່ວຍເຫຼືອດ້ານມະນຸດສະທຳ, ຄວາມປອດໄພດ້ານໄຊເບີ, ອຸດສາຫະກຳປ້ອງກັນຊາດ, ຫຼາຍຝ່າຍ...

ທ່ານພົນເອກ ຫງວຽນເຕິນເກືອງ ສະແດງຄວາມຂອບອົກຂອບໃຈກະຊວງປ້ອງກັນປະເທດ ອາເມລິກາ ເວົ້າລວມ ແລະກອງບັນຊາການມະຫາສະໝຸດອິນເດຍ-ປາຊີຟິກ ເວົ້າສະເພາະ ທີ່ໃຫ້ຄຳໝັ້ນສັນຍາວ່າ ຈະຮ່ວມມືແກ້ໄຂຜົນຮ້າຍຢ້ອນຫຼັງຈາກສົງຄາມຢູ່ຫວຽດນາມ; ຊອກຫາ, ທ້ອນໂຮມອັດຖິທະຫານຫວຽດນາມ ທີ່ເສຍສະຫຼະຊີວິດ, ຫາຍສາບສູນໃນປາງສົງຄາມ. ຫວຽດນາມ ໃຫ້ຄຳໝັ້ນສັນຍາວ່າ ຈະສ້າງເງື່ອນໄຂສະດວກເພື່ອຜັນຂະຫຍາຍບັນດາການເຄື່ອນໄຫວຊອກຫາອັດຖິທະຫານອາເມລິກາ ທີ່ຫາຍສາບສູນໃນປາງສົງຄາມ ຢ່າງມີປະສິດທິຜົນທີ່ສຸດ.

ທ່ານພົນເອກ ຫງວຽນເຕິນເກືອງ ສະເໜີວ່າ ໃນໄລຍະຈະມາເຖິງ, ກອງທັບສອງປະເທດສືບຕໍ່ສົມທົບກັນຢ່າງແໜ້ນແຟ້ນເພື່ອຜັນຂະຫຍາຍບັນດາເນື້ອໃນທີ່ໄດ້ຕົກລົງ, ສຸມໃສ່ຊຸກຍູ້ການຮ່ວມມືໃນຂົງເຂດຕ່າງໆ: ແລກປ່ຽນຄະນະ, ເຈລະຈາ-ປຶກສາຫາລື, ບຳລຸງສ້າງ, ແກ້ໄຂຜົນຮ້າຍຢ້ອນຫຼັງຈາກສົງຄາມ, ຮັກສາສັນຕິພາບສະຫະປະຊາຊາດ, ຄວາມໝັ້ນຄົງທະເລ, ການແພດທະຫານ, ຊ່ວຍເຫຼືອດ້ານມະນຸດສະທຳ-ກູ້ຊ່ວຍໄພພິບັດ, ອຸດສາຫະກຳປ້ອງກັນຊາດ.

ຫວຽດນາມ ແລະຕວກກີ ເພີ່ມທະວີການຮ່ວມມືດ້ານອຸດສາຫະກຳປ້ອງກັນຊາດ

ຕອນບ່າຍວັນດຽວກັນ, ຢູ່ຮ່າໂນ້ຍ, ທ່ານພົນໂທ ຟ້າມຮວ່າຍນາມ, ກຳມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດຫວຽດນາມ ໄດ້ຕ້ອນຮັບທ່ານ  Musa Heybet ຮອງລັດຖະມົນຕີກະຊວງປ້ອງກັນປະເທດຕວກກີ. ທ່ານພົນໂທ ຟ້າມຮວ່າຍນາມ ສະແດງຄວາມຍິນດີຕ້ອນຮັບ ແລະຊົມເຊີຍທ່ານ Musa Heybet ມາເຂົ້າຮ່ວມງານວາງສະແດງປ້ອງກັນຊາດສາກົນຫວຽດນາມ 2024.

ກ່ຽວກັບການພົວພັນດ້ານປ້ອງກັນຊາດສອງຝ່າຍ, ທ່ານພົນໂທ ຟ້າມຮວ່າຍນາມ ຕີລາຄາວ່າ ໃນໄລຍະຜ່ານມາ, ສອງຝ່າຍໄດ້ຜັນຂະຫຍາຍການຮ່ວມມືຕັ້ງໜ້າ, ພົ້ນເດັ່ນແມ່ນການແລກປ່ຽນຄະນະຜູ້ແທນ, ການຮ່ວມມືອຸດສາຫະກຳປ້ອງກັນຊາດ, ສະໜັບສະໜູນ ແລະເຂົ້າຮ່ວມງານວາງສະແດງກ່ຽວກັບອຸດສາຫະກຳປ້ອງກັນຊາດ ໂດຍແຕ່ລະຝ່າຍຈັດຕັ້ງ. ທ່ານພົນໂທ ຟ້າມຮວ່າຍນາມ ສະເໜີວ່າ ໃນໄລຍະຈະມາເຖິງ, ສອງຝ່າຍສືບຕໍ່ສຸມໃສ່ຊຸກຍູ້ບັນດາເນື້ອໃນຮ່ວມມື, ຄື: ແລກປ່ຽນຄະນະຜູ້ແທນທຸກຂັ້ນ, ໂດຍສະເພາະແມ່ນຂັ້ນສູງ ເພື່ອເພີ່ມທະວີຄວາມເຂົ້າອົກເຂົ້າໃຈ, ການຮ່ວມມືທີ່ມີປະສິດທິຜົນລະຫວ່າງສອງຝ່າຍ; ບຳລຸງສ້າງ; ອຸດສາຫະກຳປ້ອງກັນຊາດ..., ຜ່ານນັ້ນນຳການຮ່ວມມືປ້ອງກັນຊາດສອງຝ່າຍໃຫ້ນັບມື້ນັບເຂົ້າສູ່ລວງເລິກ, ມີປະສິດທິຜົນ, ແທດຈິງ.

ທ່ານພົນໂທ ຟ້າມຮວ່າຍນາມ ຕ້ອນຮັບທ່ານ  Musa Heybet. ພາບ: ຕ໊ວນຮຸຍ

ສ່ວນທ່ານ Musa Heybet ໄດ້ສົ່ງຄໍາອວຍພອນ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ; ສະແດງຄວາມຂອບອົກຂອບໃຈຕໍ່ການຊ່ວຍເຫຼືອ ເຊິ່ງ ຫວຽດນາມ ສະຫງວນໃຫ້ຕວກກີ ໃນເຫດການແຜ່ນດິນໄຫວ ໃນປີ 2023. ທ່ານ Musa Heybet ຢັ້ງຢືນວ່າ ຕວກກີ ຖືເປັນສຳຄັນ ແລະປາດຖະໜາຢາກເພີ່ມທະວີການພົວພັນກັບຫວຽດນາມ, ພ້ອມທັງຫວັງວ່າ ຫວຽດນາມ ສະໜັບສະໜູນ, ຊ່ວຍເຫຼືອ ຕວກກີ ຊຸກຍູ້ການພົວພັນກັບອາຊຽນ. ທ່ານ Musa Heybet ໃຫ້ຮູ້ວ່າ ເລື່ອງເຂົ້າຮ່ວມງານວາງສະແດງປ້ອງກັນຊາດສາກົນຫວຽດນາມ 2024 ແມ່ນເພື່ອແນໃສ່ປະກອບສ່ວນເພີ່ມທະວີຄວາມເຂົ້າອົກເຂົ້າໃຈກັນ, ອຳນວຍຄວາມສະດວກຊຸກຍູ້ການຮ່ວມມືດ້ານປ້ອງກັນຊາດລະຫວ່າງສອງປະເທດ; ສະແດງຄວາມປາດຖະໜາວ່າ ການຮ່ວມມືດ້ານປ້ອງກັນຊາດ ຈະມີຫຼາຍບາດກ້າວພັດທະນາໃໝ່ໃນໄລຍະຈະມາເຖິງ.

ໂດຍ: ແສງເດືອນ