ຊຸກຍູ້ການຮ່ວມມືລະຫວ່າງຕໍາຫຼວດທະເລຫວຽດນາມ ແລະກຳລັງປະຕິບັດກົດໝາຍຢູ່ທະເລປະເທດຕ່າງໆ

ທີ່ການຕ້ອນຮັບ, ທ່ານພົນເອກ ຟານວັນຢາງ ໃຫ້ຮູ້ວ່າ ຫວຽດນາມ ຢືນຢັນຫຼັກໝັ້ນສະເໝີຕົ້ນສະເໝີປາຍກ່ຽວກັບຄວາມສຳຄັນຂອງສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພໃນການເດີນທະເລ, ການບິນຢູ່ທະເລຕາເວັນອອກເພື່ອສັນຕິພາບ ແລະສະຖຽນລະພາບຢູ່ພາກພື້ນ. ທຸກການຂັດແຍ້ງ, ຄວາມບໍ່ລົງລອຍກັນຕ້ອງໄດ້ຮັບການແກ້ໄຂໂດຍສັນຕິວິທີ, ສອດຄ່ອງກັບກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ ປີ 1982 (UNCLOS 1982).

ບັນຍາກາດທີ່ການຕ້ອນຮັບ. ພາບ: ຫງອັກທື

ສໍາລັບລາຍການພົບປະແລກປ່ຽນ “ຕໍາຫຼວດທະເລຫວຽດນາມ ກັບເພື່ອນມິດ”,  ທ່ານພົນເອກ ຟານວັນຢາງ ໃຫ້ຂໍ້ສັງເກດວ່າ ລາຍການດັ່ງກ່າວໄດ້ປະກອບສ່ວນຫັນແຜນນະໂຍບາຍ, ແນວທາງການພົວພັນຕ່າງປະເທດຂອງພັກ, ລັດ, ມະຕິ, ຄໍາສັ່ງຂອງຄະນະພັກການທະຫານສູນກາງ, ກະຊວງປ້ອງກັນປະເທດກ່ຽວກັບການເຊື່ອມໂຍງເຂົ້າກັບສາກົນ ແລະການພົວພັນຕ່າງປະເທດດ້ານປ້ອງກັນຊາດໃຫ້ປະກົດຜົນເປັນຈິງ, ດ້ວຍຈິດໃຈ “ເປັນເຈົ້າການ, ຕັ້ງໜ້າ, ມີໄຫວພິບ, ມີຫົວຄິດປະດິດສ້າງ, ແທດຈິງ ແລະມີປະສິດທິຜົນ”. ໃນໄລຍະຈະມາເຖິງ, ທ່ານພົນເອກ ຟານວັນຢາງ ປາດຖະໜາວ່າ ກຳລັງປະຕິບັດກົດໝາຍຢູ່ທະເລບັນດາປະເທດໃນພາກພື້ນ ແລະພິເສດແມ່ນບັນດາປະເທດມີເຂດທະເລຕິດກັບຫວຽດນາມ ສືບຕໍ່ສົມທົບກັບຕຳຫຼວດທະເລຫວຽດນາມ ແບ່ງປັນບົດຮຽນ, ແບ່ງປັນຂໍ້ມູນຂ່າວສານ, ລາດຕະເວນຮ່ວມ ແລະຮ່ວມມືໃນການເຄື່ອນໄຫວປະຕິບັດກົດໝາຍຢູ່ທະເລ, ພິເສດແມ່ນການຮ່ວມມືໃນຂົງເຂດກູ້ໄພກູ້ຊີບ.

ທ່ານພົນເອກ ຟານວັນຢາງ ຖ່າຍຮູບພ້ອມກັບບັນດາຜູ້ແທນ. ພາບ: ຫງອັກທື

ຂອບໃຈທ່ານພົນເອກ ຟານວັນຢາງ ທີ່ໄດ້ສະຫຼະເວລາຕ້ອນຮັບຄະນະ, ທ່ານພົນຕີ Songrit Chatngern, ຮອງເລຂາທິການໃຫຍ່, ສູນບັນຊາການເດີນທະເລໄທ ເນັ້ນໜັກເຖິງຄວາມສໍາຄັນຂອງການເພີ່ມທະວີການພົວພັນລະຫວ່າງອົງການປະຕິບັດກົດໝາຍຢູ່ທະເລບັນດາປະເທດໃນພາກພື້ນ, ພິເສດແມ່ນບັນດາປະເທດບ້ານໃກ້ເຮືອນຄຽງ, ພ້ອມທັງຕີລາຄາສູງຂໍ້ລິເລີ່ມຈັດຕັ້ງລາຍການພົບປະແລກປ່ຽນຕໍາຫຼວດທະເລຫວຽດນາມ, ເຊື່ອໝັ້ນວ່າ ລາຍການຈະນຳມາເຊິ່ງກາລະໂອກາດຮ່ວມມືໃໝ່.

* ຕອນເຊົ້າວັນດຽວກັນ, ລາຍການພົບປະແລກປ່ຽນ “ຕໍາຫຼວດທະເລຫວຽດນາມ ກັບເພື່ອນມິດ” ຄັ້ງທີ 2 ປີ 2024 ໄດ້ໄຂຂຶ້ນຢ່າງເປັນທາງການຢູ່ຮ່າໂນ້ຍ.

ໂດຍ: ເຈິ່ນຮວ່ຽນ