ພົນເອກ ຟານວັນຢາງ ຕ້ອນຮັບຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດລາວ
ກປ.ອອນໄລ - ຕອນບ່າຍວັນທີ 6 ພຶດສະພາ, ຢູ່ນະຄອນ ດ້ຽນບຽນຝູ, ແຂວງ ດ້ຽນບຽນ, ທ່ານພົນເອກ ຟານວັນຢາງ, ກໍາມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດຫວຽດນາມ ໄດ້ໃຫ້ການຕ້ອນຮັບທ່ານພົນເອກ ຈັນສະໝອນ ຈັນຍາລາດ, ກໍາມະການກົມການເມືອງສູນກາງພັກປະຊາຊົນ ປະຕິວັດລາວ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ເນື່ອງໃນໂອກາດມາເຂົ້າຮ່ວມພິທີສະເຫຼີມສະຫຼອງ 70 ປີແຫ່ງໄຊຊະນະ ດ້ຽນບຽນຝູ.
ທີ່ການຕ້ອນຮັບ, ທ່ານພົນເອກ ຟານວັນຢາງ ເນັ້ນໜັກວ່າ ໄຊຊະນະ ດ້ຽນບຽນຝູ ແມ່ນໜຶ່ງໃນບັນດາເຫດການປະຫວັດສາດ, ມີຄວາມໝາຍອັນໃຫຍ່ຫຼວງສຳລັບປະຊາຊົນຫວຽດນາມ ແລະປະຊາຊົນທີ່ຮັກຫອມສັນຕິພາບໃນໂລກ; ແມ່ນສັນຍາລັກທີ່ມີຊີວິດຊີວາແຫ່ງຄວາມສາມັກຄີ, ການຮ່ວມສຳພັນສູ້ຮົບອັນຍິ່ງໃຫຍ່ລະຫວ່າງສອງກອງທັບ ແລະປະຊາຊົນສອງປະເທດຫວຽດນາມ - ລາວ ເວົ້າສະເພາະ ແລະສາມປະເທດອິນດູຈີນ ເວົ້າລວມ; ແມ່ນປະຖົມປັດໄຈເພື່ອໃຫ້ຊາດຫວຽດນາມ ແລະປະຊາຊົນລາວ ທັບມ້າງແອກປົກຄອງຂອງລະບອບລ່າເມືອງຂຶ້ນ, ຍາດເອົາເອກະລາດ, ເສລີພາບມາໃຫ້ປະເທດຊາດ.
|
|
ບັນຍາກາດທີ່ການຕ້ອນຮັບ. ພາບ: ຫວຽດຈຸງ |
ທ່ານພົນເອກ ຟານວັນຢາງ ກໍ່ສະແດງຄວາມຕື້ນຕັນໃຈເມື່ອຮູ້ວ່າ, ໃນວັນທີ 6 ພຶດສະພາ, ພັກ, ລັດຖະບານ ແລະລັດລາວ ກໍ່ໄດ້ຈັດຕັ້ງການໂຮມຊຸມນຸມມິດຕິງລະດັບຊາດ ເພື່ອສະເຫຼີມສະຫຼອງ 70 ປີແຫ່ງໄຊຊະນະ ດ້ຽນບຽນຝູ; ໂດຍຢືນຢັນວ່າ ນີ້ແມ່ນການເຄື່ອນໄຫວທີ່ມີຄວາມໝາຍທາງດ້ານການເມືອງຢ່າງເລິກເຊິ່ງ, ແມ່ນໂອກາດເພື່ອໃຫ້ສອງປະເທດເພີ່ມທະວີການໂຄສະນາ, ສຶກສາອົບຮົມໃຫ້ລຸ້ນໜຸ່ມກ່ຽວກັບສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດຫວຽດນາມ - ລາວ; ພ້ອມທັງສະແດງຄວາມຮູ້ບຸນຄຸນ, ຢ້ຽມຢາມຖາມຂ່າວບັນດານັກຮົບເກົ່າລາວ ທີ່ເຄີຍ “ຄຽງບ່າຄຽງໄຫຼ່” ພ້ອມກັບກອງທັບປະຊາຊົນຫວຽດນາມ ໃນໄລຍະຕໍ່ສູ້, ເປັນຕົ້ນແມ່ນການຕໍ່ສູ້ຕ້ານລັດທິລ່າເມືອງຂຶ້ນຝຣັ່ງ ແລະບັ້ນຮົບດ້ຽນບຽນຝູ.
|
|
ທ່ານພົນເອກ ຟານວັນຢາງ ແລະທ່ານພົນເອກ ຈັນສະໝອນ ຈັນຍາລາດ ພ້ອມດ້ວຍຄະນະທີ່ການຕ້ອນຮັບ. ພາບ: ຫວຽດຈຸງ |
ທ່ານພົນເອກ ຟານວັນຢາງ ແລະທ່ານພົນເອກ ຈັນສະໝອນ ຈັນຍາລາດ ເຫັນດີເປັນເອກະພາບຕໍ່ການຕີລາຄາການຮ່ວມມືດ້ານປ້ອງກັນຊາດລະຫວ່າງສອງປະເທດໃນໄລຍະຜ່ານມາວ່າ ທັງສອງຝ່າຍໄດ້ຕັ້ງໜ້າຜັນຂະຫຍາຍຕາມແຜນການຮ່ວມມືປີ 2024, ບັນລຸໄດ້ໝາກຜົນທີ່ແທດຈິງ. ສະເໜີວ່າ ໃນໄລຍະຈະມາເຖິງ, ສອງຝ່າຍຄວນສືບຕໍ່ຜັນຂະຫຍາຍບັນດາເອກະສານ, ຂໍ້ຕົກລົງທີ່ໄດ້ລົງນາມໃຫ້ມີປະສິດທິຜົນ, ພິເສດແມ່ນສຸມໃສ່ປະຕິບັດວຽກງານສະຫຼຸບອະນຸສັນຍາວ່າດ້ວຍການຮ່ວມມືດ້ານປ້ອງກັນຊາດສອງຝ່າຍ ຫວຽດນາມ-ລາວ ໄລຍະ 2020-2024 ໃຫ້ເປັນຢ່າງດີ, ຈາກນັ້ນ ແມ່ນສ້າງ ແລະລົງນາມໃນອະນຸສັນຍາວ່າດ້ວຍການຮ່ວມມືໄລຍະ 2025-2029 ດ້ວຍບັນດາເນື້ອໃນການຮ່ວມມືທີ່ແທດຈິງ, ນໍາການຮ່ວມມືດ້ານປ້ອງກັນຊາດລະຫວ່າງ 2 ປະເທດໃຫ້ສືບຕໍ່ເຂົ້າສູ່ລວງເລິກ, ພັດທະນາແບບຍືນຍົງ.
ທ່ານພົນເອກ ຟານວັນຢາງ ຫວັງວ່າ ຈະໄດ້ຕ້ອນຮັບທ່ານຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແລະການນຳກະຊວງປ້ອງກັນປະເທດ, ກົມໃຫຍ່ເສນາທິການ, ກົມໃຫຍ່ການເມືອງກອງທັບປະຊາຊົນລາວ ມາເຂົ້າຮ່ວມພິທີສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ, 35 ປີແຫ່ງວັນບຸນທົ່ວປວງຊົນປ້ອງກັນຊາດ ແລະງານວາງສະແດງປ້ອງກັນຊາດສາກົນຫວຽດນາມ 2024 ຢູ່ນະຄອນຫຼວງຮ່າໂນ້ຍ, ໃນລະຫວ່າງວັນທີ 19-22 ທັນວາ ປີ 2024.
ໂດຍ: ຈາງຫງວຽນ